ب / ئه‌ز دبێژم ئه‌ڤه نه پسياره‌ك ب تنێيه، هه‌رچه‌نده هه‌مى ب ئێك بابه‌تڤه د گرێداينه، به‌لێ به‌رسڤ يا جودايه، ژبه‌ر هندێ ل سه‌ر پسيارا ئێكێ: هه‌كه خه‌له‌ت بوو و كه‌س نه‌بوو بۆ دورستكه‌ت، ئێك ژ دوويايه: ئه‌گه‌ر د فاتحێدا خه‌له‌ت بوويه و كه‌س نينه بۆ دورستكه‌ت، يێت پشت وى يان دزانن فاتحێ بخوينن و نه نه‌خوانده‌وارن، نه‌دورسته و دڤێت پشت نڤێژ فاتحێ بخوينن، هه‌كه نڤێژا وان نه‌يا دورسته، و نڤێژا وى هه‌كه يێ خوانده‌وار بيت و راوه‌ستيا و فاتحه نه‌خواند نڤێژا وى نه‌يا دورسته. به‌لێ هه‌كه ئه‌و و پشت نڤێژ وه‌كى ئێك بن و د نه‌خوانده‌وار بن، و هه‌ر هندێ ب تنێ دزانن، نڤێژا هه‌ردوو لايان يا دورسته، ئيمامى و يێت پشت وى ژى دكه‌ن، و هه‌كه خه‌له‌تى و راوه‌ستيان نه د فاتحێدا بوو و فاتحه دورست يا خواندى به‌لێ ئه‌و سۆره‌تا پشتى فاتحێ خواندى ل به‌ر خه‌لت بوو، ئان راوه‌ستيا و نه‌شيا تمامكه‌ت و كه‌س نه‌بوو بۆ دورستكه‌ت نڤێژا هه‌ردوويان يا دورسته، چونكى خواندنا چه‌نده‌كێ ژ قورئانێ پشتى فاتحێ سونه‌ته نه‌واجبه و نڤێژێ به‌تال ناكه‌ت.
يا دووێ: هه‌كه ئيمام چه‌ند جاران پێدڤى بوو بۆ بهێته دورستكرن و لێ بێته ڤه‌گێران.. ل سه‌ر ره‌ئيا باراپتر ژ زانايان: چو نينه و دورسته و نڤێژ به‌تال نابيت و نڤێژا هه‌ردوويان يا دورسته.
و پسيارا سيێ: ئه‌رێ دورسته ل ئيمامى بێته ڤه‌گێران و زڤراندن، و هه‌كه ژ بيرێ چۆ پشتنڤێژ بيرا وى بينن و لێ ڤه‌گێرن؟ ب راستى ئه‌ڤه جهێ نه‌لێكيێي و جودابوونێيه د ناڤبه‌را زاناياندا، جمهورێ زانايان: مالكى و شافعي و ئيمام ئه‌حمه‌د خودآ ژ وان رازى بيت دورست ددانن و دورسته لێ بێته ڤه‌گێران و بيرا وى بێته ئينان. و ئه‌ڤه بۆچۆنا ئيمام عوسمان و ئيمام عه‌لى و ئبن عومه‌ريه خودێ ژ هه‌ميان رازى بيت، و عه‌تاْ و حه‌سه‌ن به‌سري و ئبن سيرين و ئبن مه‌عقل و نافع بن جوبه‌ير خودێ ژ هه‌ميان رازى بيت، هه‌ر ڤێ دبێژن، و ئبن مه‌سعوود و شوره‌يح و شه‌عبى و سه‌ورى خودێ ژ هه‌ميان رازى بيت، مه‌كروه و نه‌باش ددانن، و ئه‌بو حهنيفهخودێ ژێ رازى بيت)، نه‌دورست ددانيت، و ژێ هاتيه ڤه‌گوهاستن ئه‌ڤه لێ ڤه‌گێران و بيرئينان نڤێژێ به‌تال دكه‌ت، هه‌رچه‌نده زانايێت مه‌زهه‌بێ حه‌نه‌فى نه‌دورست ددانن، به‌لێ نابێژن: نڤێژ پێ به‌تال دبيت، و ده‌ليلێ وان گۆتنه‌كه دگه‌هيننه ئيمام عه‌لى خودێ ژێ رازى بيت)، (لا يفتح على الامام) ئانكو: بۆ ئيمامى نائێته ڤه‌كرن و لێ نائێته ڤه‌گێران. به‌لێ ئه‌ڤ ئه‌سه‌ره ژ ئيمام عه‌لى يا له‌وازه؛ چونكى حارس د سه‌نه‌د و رێكا وێدايه و شه‌عبى دبێژيت: يێ دره‌وينه، ژ ڤێرێ بۆ مه ديار دبيت بۆچۆنا جمهورى يا دورسته، و دورسته لێ بێته ڤه‌گێران و بۆ بێته دورستكرن؛ ژبه‌ر ئێك ژ پێغه‌مبه‌رێ خودێ (سلاڤێت خودێ لێ بن) هاتيه زانين هه‌روه‌كى ئه‌بو داوود بۆ مه ڤه‌گێراى ئبن عومه‌ر خودێ ژێ رازى بيت)، دبێژيت: پێغه‌مبه‌رێ خودێ (سلاڤێت خودێ لێ بن) نڤێژه‌ك كر به‌ر ئالۆز بوو، ده‌مێ خلاس بووى گۆته ئوبه‌يێ كورێ كه‌عبى: ((ته نڤێژ دگه‌ل مه دكر))، گۆت: به‌لێ، گۆت: ((چ نه‌هێلا تو ل مه ڤه‌گێرى)).
ديسا هه‌ر ئيمام عه‌لى ژى دبێژيت: هه‌كه ئيمامى خوارن ژ هه‌وه خواست خوارنێ بده‌نێ، ئانكو: هه‌كه ئاسێ بوو و ل به‌ر خه‌له‌ت بوو بيرا وى بينن و بۆ دورستكه‌ن. و ديسا پێغه‌مبه‌رێ خودێ (سلاڤێت خودێ لێ بن) دبێژيت: ((هه‌ركه‌سێ تشته‌ك بۆ د نڤێژا ويدا چێبوو، بلا بێژيت: (سبحان الله)، نينه ئێكى گولێ بيت بێژيت: سبحان الله، و نه‌زڤريت)). و هه‌كه ته‌سبيح يا دورست بيت پا چاوا قورئان خواندن و دورستكرنا قورئانێ نه‌يا دورسته و خودێ چێتر دزانيت.
