ب / نڤێژكه‌ر هه‌كه نه‌گه‌هشته ته‌كبيرا ئيحرامێ، رامانا وێ ئه‌و نينه نڤێژا ب جه‌ماعت لێ چۆ، راسته هه‌كه دگه‌ل ئيمامى بگه‌هيته ته‌كبيرا ئيحرامێ ئه‌ڤه باشتره، به‌لێ دگه‌ل هندێ ژى بلا بچيته د نڤێژێدا هه‌كه ركوعێ گه‌هشته ئيمامى، ئه‌ڤه ئه‌و گه‌هشته وێ ركاعه‌تێ يا گه‌هشتيه ركوعا وێ، بلا فاتحا وێ لێ چۆبيت، دێ دوو ته‌كبيرا ئينيت يا ئێكێ يا ئيحرامێيه يا چۆنا د نڤێژێدايه، و يا دووێ يا چۆنا روكنێ ديه، و هه‌كه نه‌گه‌هشته ركوعێ ئه‌ڤه ئه‌و ركاعه‌ت ژێ چۆ، و هۆسا كا چه‌ند ركوعا نه‌گه‌هشتيێ هند ركاعه‌ت يێت ژێ چۆين.
پشتى ئيمام سلاڤا ملان ڤه‌دده‌ت، ئه‌و سلاڤا ملان ناڤه‌ده‌ت، و دێ رابيت كا چه‌ند ركاعه‌ت ژێ چۆينه دێ كه‌ته‌ڤه، و هه‌كه گه‌هشته نڤێژێ يێت د ته‌حياتێدا، دێ روينيته خوارێ دگه‌ل وان ته‌حياتێ خوينيت، و ئه‌و ته‌حيات بۆ نه‌حسێبه، چونكى ركوعا وێ يا ژێ چۆى، هۆسا دبيت د نڤێژا مه‌غره‌بدا چه‌ند جاران ته‌حياتێ بخوينيت، وه‌كى هه‌كه ركاعه‌تا ئێكێ نه‌گه‌هشته نڤێژێ و ركاعه‌تا دووێ ژى پشتى ركوعێ گه‌هشتێ و د ته‌حياتێدا دێ دگه‌ل وان چيته د نڤێژێدا، و ته‌حياتێ دگه‌ل وان خوينيت و بۆ وى نه‌حسێبه، ئيمام دێ رابيت بۆ ركاعه‌تا سيێ ئه‌و ژى دێ رابيت پشتى ئه‌و دروينن ته‌حياتێ دخوينن ئه‌و ژى دگه‌ل وان دێ ته‌حياتێ خوينيت.
پشتى ئيمام سلاڤا ملان ڤه‌دده‌ت ئه‌و دێ رابيت، وى دوو ركاعه‌ت يێت ماين، و هه‌ردوو ركاعه‌تێت دويماهيێ ئه‌ون ئه‌وێت ته‌حيات تێدا، ئه‌و نابێژيت مانێ من ل ركاعه‌تا ئێكێ يا خواندى ئه‌ز ناخوينمه‌ڤه، دڤێت بخوينيت و ركاعه‌تا ئێكێ و دووێ نه‌چاربوو ته‌حياتێ بخوينيت، چونكى يێ ب ئيماميڤه گرێداى بوو، هۆسا دێ بنه چار ته‌حيات د سێ ركاعه‌تاندا و خودێ چێتر دزانيت.
