ب : ده‌ستپێكێ دڤێت ئه‌م بزانین دبێژنه ئیمامی ئیمام ژ به‌ر دوو رامانان، و فه‌ره ئه‌ڤ هه‌ردوو رامانه هه‌بن، ئێك بێته دیتن دا چاڤ لێ بیته‌كرن و دڤێ رامانێدا پێغه‌مبه‌ر سلاڤێت خودێ ل سه‌ربن دبێژیت: (انما جعل الایمام لیؤتم به) ئیمام له‌وا یێ بویه ئیمام دا ل دویف بچن، و رامانا دی یا زمانییه ئیمام له‌وا ئیمامه چونكی جهێ وی ئه‌مامه، پێشاییه، ڤێجا ئه‌ڤه د خوازیت نڤێژكه‌ر پشت ئیمامی بن، و پێشیا وی نه‌كه‌ڤن، و ئه‌ڤ نڤێژكرنا دورسته، به‌لێ هه‌كه پێشكه‌فت كا نڤێژا وی یا دورسته یان نه؟ زانا ل سه‌ر ڤێ یێت بوینه سێ بوچون:
ئێك: نڤێژ یا دورسته ل گه‌ل مه‌كروهیێ و ئه‌ڤه بوچونا مالكیانه و گۆتنا كه‌ڤن یا شافعیه خودێ ژێ رازی بیت چونكی چ حه‌دیس نه‌هاتینه نه‌هیا پێشكه‌فتنێ ژ ئیمامی كربیت و كریارا پێغه‌مبه‌ری ب سونه‌ت دھیته زانین.
دوو: پێشكه‌فتن ل سه‌ر ئیمامی نڤێژێ به‌تالدكه‌ت، و نه‌یا دورسته، و ئه‌ڤه بوچونا ئه‌بو حه‌نیفه‌یه و گۆتنا ئاشكراتر ژ بوچونا شافعی و ئیمام ئه‌حمه‌دیه چونكی نه هاتیه زانین ل سه‌ر ده‌مێ پێغه‌مبه‌ری سلاڤیت خودێ ل سه‌ربن هندی نڤێژ به‌راهیكا موسلمانان كری نڤێژكه‌ره‌ك به‌ری وی كه‌تبیت و هه‌كه نڤێژكه‌ری وه‌كر وی نڤێژا خۆ به‌تالكر و نڤێژا وی نه یا دورسته.
سێ: هه‌كه پێدڤی بۆ هه‌بیت و نه‌چاره‌ییه، دورسته و نڤێژ نه یا به‌تاله، و ئه‌ڤه بوچونا ئیمام ئه‌حمه‌ده د ڤه‌گێره‌كێدا و ئبن ته‌یمیه خودێ ژێ رازی بیت ڤێ بوچونێ دورستتر ددانیت؛ چونكی نڤێژكرن پشت ئیمامی واجبه، هه‌رگاڤا نڤێژكه‌ر نه‌شیا ب وی واجبی راببیت، ئه‌و واجب دراستا ویدا نامینیت و دكه‌ڤیت، وه‌كی هه‌می واجباتیت دی یێت نڤیژی، هه‌ر واجبه‌كێ نه‌شیا بكه‌ت وه‌كی خواندنێ و جلكا و پاقژیێ دراستا ویدا ئه‌و واجب نینه، و هوسا هه‌كه نڤێژكه‌ر نه‌شیا پشت ئیمامی نڤێژێ بكه‌ت و جهـ نه‌بیت شینا ئه‌و ب تنێ بكه‌ت بلا به‌ر سینگێ وی بكه‌ت و دورسته چ نڤێژا خوتبێ بیت یان یا عه‌یدێ یان یا جه‌نه‌زاه‌ی و خودێ چێتر دزانیت.
