ب : نڤێژ دڤێت یا پارازتی بیت، و دڤێت سستی تێدا نه هێته‌كرن، و نه‌هێنه هێلان، هه‌تا ئه‌م ڤێ پسیارێ بكه‌ین، كا دهێنه قه‌زاكرن یان نه؛ چونكی خودایێ مه‌زن فه‌رمانا مه كریه ئه‌م نڤێژیت خۆ ب پاریزین، دبێژیت: (حَافِظُواْ عَلَى الصَّلَوَاتِ والصَّلاةِ الْوُسْطَى) نڤێژان بپاریزن و تایبه‌ت نڤێژا ئێڤاری، و د ئایه‌ته‌كا دیدا دیاره‌دكه‌ت نڤێژ پارێزه‌ر ئه‌ون یێت سه‌رفه‌راز و هه‌ژی خه‌لاتێ به‌حشتێ و هه‌ر و هه‌ر دێ تیدا بن دبێژیت: (وَالَّذِينَ هُمْ عَلَى صَلَوَاتِهِمْ يُحَافِظُونَ أُوْلَئِكَ هُمُ الْوَارِثُونَ الَّذِينَ يَرِثُونَ الْفِرْدَوْسَ هُمْ فِيهَا خَالِدُونَ) و مه دوو ره‌نگێن نڤێژ چونێ یێت هه‌ین، ب عوزر و هجه‌ت، ژ ئه‌گه‌رێ ژبیركرنێ یان نڤستن و ژ خه‌و نه‌رابوونێ، و بێ عوزر، ژ ئه‌گه‌ر سستی و بێ خه‌میێ و خه‌مساریێ، پشكا ئێكێ هه‌می زانا ئێك ده‌نگن، هه‌كه چون و نه‌كرنا نڤێژێ ژ ئه‌گه‌رێ ژ بیركرنێ بیت یان نڤستنێ، هه‌رده‌مێ بیرا وی هاتێ یان ژ خه‌و رابوو هه‌ما ئه‌و ده‌مێ وییه، و دڤێت نڤێژا خۆ بكه‌ت، و دبێژنێ ڤێ ئه‌داكرن نه قه‌زاكرن، بلا وه‌ختێ وێ بوری ژی بیت، ئه‌و نه یێ گونه‌هكاره؛ چونكی خه‌مساری نه‌كریه، و نه ب وی بوویه، و به‌لگه ل سه‌ر ڤێ چه‌ندێ پێغه‌مبه‌ر سلاڤێت خودێ ل سه‌ربن دڤه‌گێرا موسلمیدا دبێژیت: (من نسي الصلاة فليصلها إذا ذكرها، فإن الله تعالى يقول: وأقم الصلاة لذكري) هه‌ركه‌سێ نڤێژ ژبیر كر هه‌كه بیرا وی هاتێ بلا بكه‌ت خودایێ مه‌زن دبێژیت: ده‌مێ بیرئینانا من (كو بیرئینانا نڤێژێیه) نڤێژێ بكه، و دڤه‌گێرا بوخاری و موسلمیدا دبێژیت:( من نسي صلاة أو نام عنها، فكفارتها أن يصليها إذا ذكرها) هه‌ركه‌سێ نڤێژه‌ك ژبیركر یان ژێ نڤست كه‌فاره‌تا وێ ئه‌وه هه‌كه بیرا وی هاتی بكه‌ت، و دڤه‌گێره‌كا موسلمیدا پێغه‌مبه‌رسلاڤێت خودێ ل سه‌ر بن ل وه‌غه‌ره‌كێ ئه‌و یێت ل گه‌ل وه‌ستیان و به‌ری سپێدێ نڤستن، و فه‌رمانا ئێكی كر ئاگه‌ھ ژ وان هه‌بیت، به‌لێ ئه‌و ژی نڤست، و هشیار نه‌بوون هه‌تا هه‌تاڤێ ل وان دای، صه‌حابی دبێژن: (فَجَعَلَ بَعْضُنَا يَهْمِسُ إلى بَعْضٍ ما كَفَّارَةُ ما صَنَعْنَا بِتَفْرِيطِنَا في صَلاتِنَا) مه پسته پست ل گه‌ل ئیك و دوو كر، و مه گۆت: سزایێ سستیا مه دنڤێژا خۆدا كری چیه؟! ئینا پێغه‌مبه‌ری سلاڤێت خودێ ل سه‌ربن گۆته وان: (أَمَا إنه ليس في النَّوْمِ تَفْرِيطٌ إنما التَّفْرِيطُ على من لم يُصَلِّ الصَّلاةَ حتى يَجِيءَ وَقْتُ الصَّلاةِ الأخْرَى فَمَنْ فَعَلَ ذلك فَلْيُصَلِّهَا حين يَنْتَبِهُ) بزانن سستێ د نڤستنیدا نینه، به‌لی ئه‌و یێ سسته یێ نڤێژێ نه‌كه‌ت هه‌تا وه‌ختێ نڤێژا دی دهێت، و یێ نڤست بلا نڤێژێ بكه‌ت ده‌مێ هشیار دبیت.
به‌لێ پشكا دوویێ ئه‌وا بێ عوزر و له‌شگرانی و خه‌مساری نڤێژ چوبن و نه‌كربن، كا د ڤێ ره‌وشیدا دێ ئه‌و نڤێژ هێنه قه‌زاكه‌ت یان نه، ئه‌ڤه جهێ نه‌لێكیێیه دناڤبه‌را زانایاندا ل سه‌ر دوو بوچونان:
ئێك: ئه‌وێ بێ عوزر نڤێژ نه‌كربن و نڤێژ لێ چوبن، قه‌زا ناكه‌ت و قه‌زاكرن لێ ناهیته قه‌بویلكرن؛ چونكی وی بێ عوزر نڤێژ ژ وه‌ختێ وێ ده‌رێخستیه، و چ نڤێژێت دی جهێ نڤێژا چوی ناگرن، یا دوه‌ختێ وێدا نه‌هاتیه‌كرن، و نه‌كرنا نڤێژێ بێ عوزر ژ كه‌بائیرانه، و پێدڤیه یێ هوسا ته‌وبه‌كا راست و دورست بكه‌ت، و زێده سونه‌تا بۆ خۆ بكه‌ت؛ دا ئه‌و سونه‌ت جهێ وان نڤێژێت فه‌رز بگریت، ئه‌وێت بێ عوزر ژێ چووین، و ژ زانایێت ئه‌ڤ بوچونه هه‌لبژارتی ئبن ته‌یمییه خودێ ژێ رازی بیت و ژ ڤه‌ماییان ئبن عثێمین خودێ ژێ رازی بیت.
دوو: كا چاوا نڤێژا هاتیه ژبیركرن دڤێت بێته‌كرنڤه، هوسا یێ بێ عوزر ژی نه‌هاتیه‌كرن دڤێت بێته قه‌زاكرن، وه‌كی یا ب عوزر چوی و نه‌هاتیه‌كرن، و ئه‌ڤه بوچونا جمهورێ زانایانه و ئه‌ڤ بوچونا هه‌ر چار ئیمامێت سه‌ر مه‌زهه‌به.
و كاد ێ چاوا قه‌زاكه‌ت؟ كا ته‌رتیب واجبه یان نه؟ هه‌كه نڤێژێت چویین یێت كێم بن، باشتر ئه‌وه ته‌رتیب بێنه قه‌زاكرن، به‌لێ هه‌كه ئه‌و نڤێژێت چوین گه‌له‌ك بن ده‌ف جمهورێ زانایان ته‌رتیب نه واجبه و دورسته ته‌رتیب نه‌هێنه قه‌زاكرن، و یێ پارازتن بۆ دینێ خۆ ڤیا بلا نڤێژێت ژێ چوین قه‌زابكه‌ت، هه‌كه شیان هه‌بن، و هه‌كه شیان نه‌بن، بلا دورستی ته‌وبه بكه‌ت و ته‌وبه‌كا راست و دورست، و نڤێژێت خۆ نه هێلیته ڤه، و سستییێ تێدا نه‌كه‌ته‌ڤه، ته‌وبه‌یا راست و دورست گونه‌هێت به‌ری خۆ هه‌میان ژێ دبه‌ت و نا هێلیت و خودێ چێتر دزانیت.
