ب : فه‌ره هه‌ركه‌سێ بڤێت ب كه‌ڤیته سه‌ر وێ رێكێ یا وی بگه‌هینیته حه‌ژێكرن و رازیبونا خودێ بلا گرنگیێ ب ده‌ته سونه‌تان هه‌میان، سونه‌تێت نڤێژان، و سونه‌تێت رۆژیان، و سونه‌تێت حه‌جێ، و سونه‌تێت زه‌كاتێ ژ خێر و خیراتان؛ چونكی ب ڤێ چه‌ندێ ده‌رگه‌هێ حه‌ژێكرنا خودێ دقوتێت، و ب ڤێ چه‌ندێ دێ خودێ وی پاریزیت، و ئه‌ندامێت وی ژ گونه‌هێ پارێزیت، و هاریكاریا وان بۆ خێرێ كه‌ت، و دوعایێت وی و داخوازیێت وی ب جھـ ئینیت، و پێغه‌مبه‌ر سلاڤێت خودێ ل سه‌ربن د ڤه‌گێرا بوخاریدا دبیژیت: (إِنَّ اللَّه تعالى قال: مَنْ عادَى ليَ ولِيّاً، فقدْ آذَنْتُهُ بِالحَرْبِ، ومَا تَقَرَّبَ إِليَّ عَبْدِي بِشَيءٍ أَحَبَّ إِلَيَّ مِمَّا افْتَرَضْتُ عَلَيْهِ، وَمَا يَزَالُ عَبْدِي يَتَقَرَّبُ إِلَيَّ بِالنَّوَافِلِ حَتَّى أُحِبَّهُ، فَإذَا أَحْببْتُهُ، كُنْتُ سَمْعَهُ الَّذِي يَسْمَعُ بِهِ، وَبَصَرَهُ الَّذِي يُبْصِرُ بِهِ، ويَدَهُ الَّتي يبْطِشُ بِهَا، وَرجْلَهُ الَّتي يَمْشِي بِها وإنْ سَأَلَني أَعْطَيْتُهُ، وَلَئِنْ اسْتَعَاذَنِي لأُعِيذَنَّهُ) ب راستی خودایێ مەزن دبێژیت: ھەرکەسێ دژمنییا وەلییەکێ من بکەت، ب راستی من ئەو ب شەڕ دگەلکرنێ ئاگەھدارکر. و بەندەیێ من ب چو تشتان خۆشتڤیتر خۆ نێزیکی من ناکەت ژ وی تشێ من ل سەر وی فەرز کری، و بەردەوام بەندەیێ من ب سوننەتان دێ نێزیکی من بیت، حەتا ئەز حەژێ بکەم، ھەکە من حەژێ کر، من گوھێ وی پاراست یێ پێ گولێ دبیت، و چاڤێ وی یێ پێ دبینیت، و دەستێ وی یێ پێ بھێز دگریت، و پێ وی یێ پێ دچیت، و ھەکە داخوازێ ژ من بکەت من دایێ، و ھەکە خۆ ب من بپارێزیت بێ شک دێ پارێزم.
پشتی ڤێ، زانایێ ناڤدار نه‌وه‌وی خودێ ژێ رازی بیت، د مه‌جموعیدا دبێژیت: سونه‌ت یێت ب نڤێژانڤه گریدایی دوو پشكن، ئێك: ئه‌ون یێت ب جه‌ماعه‌ت دهێنه كرن، و پشكا دوویێ: ئه‌ون یێت ب تنێ دهێنه كرن، و ئه‌و پشكا ب جه‌ماعه‌ت دهێنه‌كرن ژ وان ب خیرترن یێت ب تنێ دهێنه‌كرن، و ه‌كی نڤێژا هه‌ردوو عه‌یدان، راسته سونه‌ته به‌لێ ژ وان سونه‌تانه یێت سه‌رێ رێزێ دهێن، له‌وا پێغه‌مبه‌ری سلاڤێت خودێ ل سه‌ربن ئه‌مری ژنان یا شویكری و نه شویكری كریه ب ده‌ركه‌ڤنه نڤێژا عه‌یدێ، دویفرا نڤێژا غه‌یرینا رۆژێیه پاشی نڤێژا غه‌یرینا هه‌یڤێ، پاشی نڤێژا بارانخوازتنێ، و پاشی دیسا زانا سونه‌تێت نڤێژێ دویف ده‌مێ وان دكه‌نه دوو پشك، پشكا ئێكێ: ئه‌و سونه‌تێت شه‌ڤێ دهێنه‌كرن و پشكا دوویێ: سونه‌تێت ب رۆژ دهێنه‌كرن، و ل ده‌ف زانایان سونه‌تا ب شه‌ڤ دهێته‌كرن ب خێرتره ژ سونه‌تا رۆژ دهێته‌كرن، ژ به‌ر ڤه‌گێرا موسلمی، پێغه‌مبه‌ر سلاڤێت خودێ ل سه‌ربن دبێژیت: (وأفضل الصلاة بعد الفريضة صلاة الليل) و دیسا زانا نه ئیك بۆچونن كا ره‌واتب ب خێرترن یان نڤێژیت ته‌هه‌جودا نڤێژێت شه‌ڤێ ل سه‌ر دوو بوچونان:
ئێك: نڤێژێت شه‌ڤێ ژ هه‌می نڤێژان ب خێرترن، خۆ ژ راتبان ژی ب خێرترن؛ ژبه‌ر گۆتنا پێغه‌مبه‌ری سلاڤێت خودێ ل سه‌ربن (وأفضل الصلاة بعد الفريضة صلاة الليل) و دڤه‌گێره‌كا دیدا یا موسلمیدا هاتیه (أَفْضَلُ الصَّلاةِ بَعْدَ الصَّلاةِ الْمَكْتُوبَةِ الصَّلاةُ في جَوْفِ اللَّيْلِ) ئه‌ڤ هه‌ردوو ڤه‌گێره دئاشكرانه نڤێژا شه‌ڤێ، ئانكو ته‌هه‌جود ژ هه‌می سونه‌تان ب خێرترن، و ژ راتبان ژی، و ئه‌ڤه بۆچونا ئه‌بی ئیسحاقێ مروزییه ژ شافعیان و نه‌وه‌وی خودێ ژێ رازی بیت دبێژیت و ئه‌ڤ بوچونه ب هێزتره و پتر ل گه‌ل حه‌دیسێ دهیت.
دوو: حمهورێ زانایان هه‌روه‌كی ئبن ره‌جبێ حه‌نبه‌لی دبێژیت دبیژن سونه‌تێت راتب ژ هه‌می سونه‌تان ب خێرترن.
و ئه‌ز دبینم بۆچونا جمهوری ب هێزتره ژ به‌ر ڤان ئه‌گه‌ران:
ئێك: پێغه‌مبه‌ری سلاڤێت خودێ ل سه‌ربن به‌رده‌وامی دایه راتبان دگه‌ل هندێ ئه‌و دراستا ویدا سونه‌ت بوون، و به‌رده‌وامی دایه ته‌هه‌جودان ژی به‌لێ ئه‌و ل سه‌ر فه‌رز بوون.
دوو: ده‌مێ وان ب ده‌مێ نڤێژا فه‌رزڤه گرێدایه و هوسا وه‌كی فه‌رزانه.
سێ: گۆتنا پێغه‌مبه‌ری سلاڤێت خودێ ل سه‌ربن (بعد الفریضة ) یان (بعد المكتوبة) ڤێ رامانێ دگه‌هینێت هه‌روه‌كی مه‌ناوی خودێ ژێ رازی بیت دبێژیت پشتی یێت فه‌رز و گرێدایی وان و سونه‌تا راتیبه گرێدایێ وانه.
ژ به‌ر ئه‌ڤا بوری ئه‌ز دبینم بۆچونا ب هێزتر یا جمهورێ زانایانه و سونه‌تێت راتب ژ هه‌می سونه‌تان ب خێرترن و خودێ چێتر دزانیت.
