ب / ب راستى سه‌له‌وات زێده د فه‌رن، نه‌خاسمه ده‌مێ ناڤێ پێغه‌مبه‌رى (سلاڤێت خودێ لێ بن) دئێته گۆتن و مرۆڤى گولێ دبيت. پێغه‌مبه‌رى (سلاڤێت خودێ لێ بن) گۆته هه‌ڤالێت خۆ: ((هوين دزانن به‌خيل كيژكه؟))، گۆتن: خودێ و پێغه‌مبه‌رێ وى دزانن، ئينا گۆت: ((به‌خيل ئه‌وه يێ ناڤێ من ل ده‌ف بێته گۆتن و سه‌له‌واتان نه‌ده‌ته سه‌ر من)).
به‌سه ئه‌م بزانين خودێ و ملياكه‌تێت وى سه‌له‌واتان دده‌نه سه‌ر پێغه‌مبه‌رى (سلاڤێت خودێ لێ بن) و ئه‌مرێ مه ژى يێ كرى ئه‌م سه‌له‌واتان بده‌ينه سه‌ر. خودايێ مه‌زن ئه‌مر دكه‌ت:((إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا )) ئانكو: خودێ و ملياكه‌تێت خۆ سه‌له‌واتان دده‌نه سه‌ر پێغه‌مبه‌رى، گه‌لى خودان باوه‌ران.. هوين ژى سه‌له‌واتان و سلاڤان بده‌نه سه‌ر.
و ل سه‌ر خێرا سه‌له‌واتان پێغه‌مبه‌ر (سلاڤێت خودێ لێ بن) دبێژيت: ((يێ سه‌له‌واته‌كێ بده‌ته سه‌ر من، خودێ ده‌ه سه‌له‌واتان پێ دده‌ته سه‌ر)). و سه‌له‌وات ب چه‌ند ره‌نگان يێ ژ پێغه‌مبه‌رى هاتين، ژ وان سه‌حابى خودآ ژ وان رازى بيت دبێژن: ئه‌م ل مالا نوعمانێ كورێ به‌شيرى بووين(خودێ ژێ رازى بيت)، ئێكى پسيار ژ پێغه‌مبه‌رى (سلاڤێت خودێ لێ بن) كر و گۆتێ: ئه‌م دزانين دێ چه‌وا سلاڤ كه‌ينه ته، به‌لێ ئه‌م نوزانين چه‌وا سه‌له‌واتان بده‌ينه سه‌ر ته، ئينا بێهنه‌كا خۆش سه‌رێ خۆ چه‌ماند و نه‌راكر هه‌تا مه گۆت: خۆزى ئه‌ڤ پسياره ژێ نه‌هاتباكرن، پاشى سه‌رێ خۆ راكر و گۆت: ((ب ڤى ره‌نگى سه‌له‌واتان بده‌نه سه‌ر من: (اللهم صَلِّ على مُحَمَّدٍ وَعَلَى آلِ مُحَمَّدٍ كما صَلَّيْتَ على آلِ إبراهيم وَبَاركْ على مُحَمَّدٍ وَعَلَى آلِ مُحَمَّدٍ كما بَارَكْتَ على آلِ إبراهيم في الْعَالَمِينَ إِنَّكَ حَمِيدٌ مَجِيدٌ)، ئيمامێ موسلم ئه‌ڤ حه‌ديسه يا ڤه‌گێراى. و جمهورێ زانايان دبێژن: سه‌له‌وات به‌س ل ته‌حياتا دويماهيێ دئێنه خواندن، به‌لێ هنده‌ك زانايێت دى دبێژن: ته‌حياتا ئێكێ ژى دئێنه گۆتن، و ژ وان زانايان ئه‌لبانى و خودێ چێتر دزانيت.
