ب / ل دۆر خواندنا قنوتێ د نڤێژا سپێدێدا.. زانايان چه‌ند ره‌ئيێت جودا جودا يێت هه‌ين:
ـ ل ده‌ف ئيمام مالك(خودێ ژێ رازى بيت)، قنوت موسته‌حه‌به د نڤێژا سپێدێدا، ئانكو: نه ژ سونه‌تێت زێده فه‌ره هه‌كه تو بخوينى باشه و هه‌كه نه‌خوينى چو نينه.
ـ ل ده‌ف ئيمامێ شافعى(خودێ ژێ رازى بيت)، سونه‌ته و ژ سونه‌تێت فه‌ره.
ـ ل ده‌ف ئيمامێ ئه‌بو حه‌نيفه(خودێ ژێ رازى بيت)، نه‌يا دورسته، ناچێبيت بێته خواندن.
ـ هه‌روه‌سا ل ده‌ف حه‌نبه‌ليان ژى نه‌دورسته قنوت د نڤێژا سپێدێدا بێته خواندن.
به‌لێ هه‌كه ئيمام يێ شافعى بيت و ئه‌و ببينيت دڤێت قنوتێ بخوينيت، هينگێ دڤێت ئه‌وێت پشت وى ژى بخوينن و دويف ئيمامى بچن دا نه‌بيته ئه‌گه‌رێ ژێكڤه‌بوون و جودابوونێ، و ب ڤى ره‌نگى پێغه‌مبه‌رى (سلاڤێت خودێ لێ بن) ئه‌مرێ مه يێ كرى (إنما جعل الإمام ليۆتم به) ئانكو: ئيمام له‌وا يێ بوويه ئيمام دا دويفچۆن بۆ هه‌بيت، و چونكى ئيمام تشته‌كێ گه‌له‌ك يێ خه‌له‌ت ناكه‌ت، خواندنا قنوتێ د نڤێژا سپێدێدا مه‌سئه‌له‌كه د ناڤبه‌را دورست و دورستتردايه، و نه د ناڤبه‌را حه‌قى و باتليدايه.
به‌رێ خۆ بدێ ئه‌ڤه دوو زانايێت ناڤدار ئه‌وێت دبۆرين نه‌دورسته قنوت د نڤێژا سپێدێدا بێته خواندن، چ دبێژن بۆ وى كه‌سێ نڤێژێ ل پشت ئيمامه‌كێ قنوتێ د نڤێژا سپێدێدا دخوينيت بكه‌ت:
ـ له‌يسێ كورێ سه‌عدى(خودێ ژێ رازى بيت)، دبێژيت: چو جار من قنوت د نڤێژا سپێدێدا نه‌خوانديه ژبلى ده‌مێ ئه‌ز دكه‌ڤمه پشت ئيمامه‌كى خواندبيت ئه‌ز ژى دگه‌ل دخوينم.
ـ زانايێ ناڤدار ئه‌بو يووسف(خودێ ژێ رازى بيت)، ئێكه ژ عه‌له‌مێت فقهێ حه‌نه‌فى، به‌لێ دگه‌ل هندێ ژى دبێژيت: هه‌كه ئێكى نڤێژ پشت ئيمامه‌كى قنوت خوين كر دڤێت ئه‌و ژى بخوينيت و دگه‌ل ئيمامێ خۆ بيت و خودێ چێتر دزانيت.
