ب/ ژ پێغه‌مبه‌رى (سلاڤێت خودێ لێ بن) يا هاتى، وى و هه‌ڤالێت وى نڤێژ ب پێلاڤڤه يێت كرين، و ل مزگه‌فتا پێغه‌مبه‌رى و ل ره‌وزا شه‌ريف ئه‌بى سه‌عيد ئه‌لخودرى(خودێ ژێ رازى بيت)، دبێژيت: رۆژه‌كێ پێغه‌مبه‌رى (سلاڤێت خودێ لێ بن) پێلاڤا خۆ ئێخست، ده‌مێ هه‌ڤالێت وى ديتى پێلاڤێت خۆ ئێخستن، وان ژى ده‌ست هاڤێتێ پێلاڤێت خۆ ئێخستن، ئينا پێغه‌مبه‌رى (سلاڤێت خودێ لێ بن) گۆته وان: ((ئه‌رێ بۆچى هه‌وه ئێخستن؟ من ئێخستن چونكى جبريلى گۆته من: پيساتيه‌ك يا ب پێلاڤا ته‌ڤه ژبه‌ر هندێ من ئێخست، ژ ئه‌ڤرۆ وێڤه هه‌كه ئێك ژ هه‌وه هاته مزگه‌فتێ بلا سه‌حكه‌ته بنێ پێلاڤا خۆ د عه‌رديرا بهوسيت و نڤێژێ پێڤه بكه‌ن)). ئه‌ڤ حه‌ديسه ژ ڤه‌گێرانا ئيمام ئه‌حمه‌د و ئه‌بو داووديه، ديسا يا د بوخارى و موسلميدا ژ ريوايه‌تا ئه‌نه‌سى هاتى: پێغه‌مبه‌رى (سلاڤێت خودێ لێ بن) نڤێژ ب نه‌عالێڤه دكرن. ژبه‌ر هندێ گه‌له‌ك زانا نڤێژا ب پێلاڤڤه سونه‌ت و موسته‌حه‌ب ددانن.
عومه‌رێ كورێ خه‌تابى(خودێ ژێ رازى بيت)، كه‌رب ژ وان ڤه‌دبوون يێت پێلاڤێت خۆ دئێخستن و پاشى نڤێژ دكرن. هه‌روه‌سا ئبن مه‌سعوود ژى(خودێ ژێ رازى بيت)،. ئه‌بو عامرێ شه‌يبانى(خودێ ژێ رازى بيت)، عه‌ده‌تێ وى ئه‌ڤه بوو تشته‌ك د ده‌ستيدا بوو هه‌كه ئێك ديتبا پێلاڤا خۆ دئێخيت بۆ نڤێژا، دا دانيته سه‌رێ وى و بێژيتێ: تو هزر دكه‌ى نڤێژ ب پێلاڤڤه نه‌دورسته؟! هه‌روه‌سا ئيبراهيمێ نه‌خه‌عى ژى(خودێ ژێ رازى بيت)، خودانێ خۆ و ڤێ ره‌ئيێ بوو، و بۆ مه ژ گه‌له‌ك سه‌حابان يا هاتيه زانين ب پێلاڤانڤه نڤێژ دكرن، ژ وان: عومه‌رێ كورێ خه‌تابى و عوسمانێ كورێ عه‌فانى و ئبن مه‌سعوودى و ئه‌نه‌سێ كورێ مالكى و سه‌له‌مه‌يێ كورێ ئه‌كوه‌عى خودآ ژ هه‌ميان رازى بيت. و ژ تابعيان سه‌عيدێ كورێ موسه‌يه‌بى و قاسم و عوروه، و ئبن زوبه‌ير و سالمێ كورێ عه‌بدوللاى و عه‌تائێ كورێ يه‌سارى و عه‌تائێ كورآ ئه‌بى ره‌باحى و موجاهد و تاووس و شوره‌يحێ قازى و ئه‌سوه‌دێ كورێ يه‌زيدى خودآ ژ وان هه‌ميان رازى بيت. ڤێجا يێ پێلاڤا وى يا پاقژ بيت دورسته پێڤه بكه‌ت، و يێ ڤيا بێخيت دورسته بێخيت. و چو ناخوازيته هندێ لۆمه‌يى و نه‌رازيبوون د ناڤبه‌را هه‌ردوو جويناندا هه‌بيت. و مزگه‌فتێت ئه‌ڤرۆ هه‌مى د رائێخستينه تشته‌كێ ئاساييه هه‌مى پێلاڤێت خۆ بێخن، به‌لێ هه‌ر جهه‌كێ دى هه‌بيت نه‌خاسمه ل چۆلى دورسته ب پێلاڤڤه نڤێژ بێته‌كرن و نه‌يا دورسته ئێك نه‌رازيبوونێ دياركه‌ت، به‌لكى ئه‌و يێ گونه‌هكاره و ئه‌و نه‌رازيبوون ژ نه‌زانينێيه و خودێ چێتر دزانيت.
