ب / ئه‌ڤ بابه‌ته پێدڤى ناكه‌ت و ناخوازيته هندێ نه‌خۆشى ل سه‌ر په‌يدا ببيت. مخابن گه‌له‌ك جاران مه گولێ بوويه ئێك دێ بێژيت: من حه‌زكر من تبلا وى گرتبا و قراندبا. ب راستى ئه‌ڤ گه‌رماتيه نه‌يا د جهێ خۆدايه، چونكى ڤێ لڤلڤاندنێ بنياتێ خۆ يێ هه‌ى، نه‌كو چو بۆ نينه، هه‌تا چو بۆ نه‌بيت ژى ئه‌ڤ گه‌رماتى و حه‌ماسه بۆ نه‌ڤێت.
ب هزرا من ئه‌ڤێ هنده ب لڤلڤاندنا تلێ نه‌خۆشى و نه‌رازى، نه هه‌ر يێ وه‌سايه سه‌ر گه‌له‌ك خه‌له‌تيێت دى يێت بێ شك، و نه‌دويره ئه‌و خه‌له‌تى ل به‌رچاڤێت وى بێنه‌كرن، يان هه‌تا دبيت د مالا ويدا بێنه‌كرن، به‌لێ دگه‌ل هندێ ژى چو نه‌ارزيبوونا خۆ ديار ناكه‌ت، و هه‌روه‌كى چونه، و بزاڤێ ناكه‌ت بگوهۆريت. ب هزرا من ئه‌ڤ ئاراندنه ژ شه‌يتانيه، وى سست دكه‌ت ل سه‌ر تشتێ دڤێت د راستيدا يێ گه‌رم و رژد بيت و سست نه‌بيت، و وى گه‌رم دكه‌ن سه‌ر تشته‌كێ نه‌خوازيته وێ گه‌رماتيێ. زانا ل دۆر لڤاندنا تلا شه‌هدێ دبێژن:
ـ ده‌ف مه‌زهه‌بێ شافعى دڤێت ئێك جار ب تنێ بێته بلندكرن. ئه‌و ژى ده‌ف په‌يڤا (إلا الله) ژ ته‌حياتێ.
ـ ده‌ف حه‌نه‌فيان ده‌مێ نڤێژكه‌ر دبێژيت (لا إله) دێ تلا خۆ بلندكه‌ت، و ده‌مێ دگه‌هيته (إلا الله) ژ ته‌حياتێ دێ دانيت.
ـ ده‌ف مالكيان دێ تلا خۆ بۆ ره‌خێ راستێ و چه‌پێ لڤلڤينى هه‌تا نڤێژ ب دويماهى دئێت.
ـ و ل ده‌ف حه‌نبه‌ليان هه‌ر ده‌مێ ناڤێ خودێ د ته‌حياتێدا هاتيه دێ بلندكه‌ى بێ لڤلڤاندن.
ب راستى پتر ژ حه‌ديسه‌كێ يێت هاتين ل سه‌ر لڤاندنا تلێ، ژ وان: ئيمام ئه‌حمه‌د(خودێ ژێ رازى بيت)، ژ وائيلێ كورێ حهجهرىخودێ ژێ رازى بيت)، ڤه‌دگێريت، دبێژيت: مه ديت پێغه‌مبه‌رى (سلاڤێت خودێ لێ بن) تبلا خۆ يا شه‌هدێ دلڤلڤاند و دوعا پێ دكرن.
ڤێجا ل ڤێرێ بۆ مه ديار دبيت دوو ره‌ئيى ل سه‌ر لڤاندن و نه‌لڤاندنا تلا شه‌هدێ يێت هه‌ين. ئه‌ڤێت تلێت خۆ نه‌لڤلڤينن د گونه‌هكارن خۆ ژ يێت دى نه‌رازيكه‌ن، و ئه‌ڤێت د لڤلڤينن بلا بزانن ئه‌وێت ل سه‌ر لڤاندنا تلێ دبێژن سونه‌ته نه‌واجبه، و هه‌كه مرۆڤى زانى ب كرنا ڤێ سونه‌تێ ل مزگه‌فتێ دێ بيته ئه‌گه‌رێ دلمان و جودابوونا موسلمانان بلا وه‌نه‌كه‌ن، چونكى ئێكگرتنا موسلمانان و پاراستنا رێزا وان واجبه دڤێت ئه‌م پتر ل ڤێ د هشيار بين و لڤاندن سونه‌ته، سه‌رخاترا واجبى دڤێت ئه‌ز سونه‌تێ بهێلم و خودێ چێتر دزانيت.
