ب/ چو شك تێدا نينه ئه‌وێ نڤێژان نه‌كه‌ت، چونكى باوه‌رى پێ نينه يان ترانا بۆ خۆ پێ دكه‌ت گاوره و ژ ئيسلامێ ده‌ردكه‌ڤيت، و هه‌مى زانا ل سه‌ر ڤێ بۆچۆنێنه. و حه‌ديسێت پێغه‌مبه‌رى (سلاڤێت خودێ لێ بن) ئه‌وێت ل دۆر هێلانا نڤێژێ هاتين ژ ڤى دگرن، وه‌كى گۆتنا پێغه‌مبه‌رى (سلاڤێت خودێ لێ بن): ((بين الْعَبْدِ وَبَيْنَ الْكُفْر تَرْكُ الصَّلاه)) و ((إِنَّ الْعَهْدَ الَّذي بَيْنَنَا وَبَيْنَهُمُ الصَّلاه فَمَنْ تَرَكَهَا فَقَدْ كَفَرَ))، ڤێجا هه‌كه ئه‌و ئه‌ڤ مرۆڤه‌يه و ژ نوى ل خۆ زڤرى و ته‌وبه‌كر، ته‌وبه به‌سى ويه، و ب ته‌وبێ و ل خۆزڤرينێ چو گونه‌ه ل سه‌ر نه‌ماينه. به‌لێ هه‌كه ژ خه‌مسارى نه‌كرينه و باوه‌رى ب نڤێژێ هه‌ر يا هه‌ى، به‌لێ ژ ته‌مبه‌لى نه‌كريه زانايێت مه د راستا ڤيدا بووينه سێ بۆچۆن:
أـ ئيمام ئه‌حمه‌د(خودێ ژێ رازى بيت)، دبێژيت: يێ نڤێژان نه‌كه‌ت چ ژ ته‌مبه‌لى بيت يان ژ بێ باوه‌رى بيت هه‌ر گاوره. هه‌كه كرن؛ كرن، هه‌كه نه‌كرن دڤێت بێته كوشتن و نڤێژ ل سه‌ر نائێنه‌كرن و نائێته گۆركرن، و ل گۆرستانا موسلمانان نائێته ڤه‌شارتن.
ب ـ ئيمام ئه‌بو حه‌نيفه(خودێ ژێ رازى بيت)، دبێژيت: نه‌كرنا نڤێژان ژ ته‌مبه‌لى مرۆڤى كافر ناكه‌ت، به‌لێ دڤێت بێته زيندانكرن هه‌تا ل خۆ دزڤريت.
جـ ـ ئيمامێ شافعى(خودێ ژێ رازى بيت)، دبێژيت: نابيته كافر، به‌لێ فاسقه و هه‌كه هه‌ر ل خۆ نه‌زڤرى دێ ئێته كوشتن كو فاسقه نه كافر، و دێ ئێته شويشتن و نڤێژ دێ ل سه‌ر ئێته‌كرن و دگه‌ل موسلمانان دێ ئێته ڤه‌شارتن.
ب چ ره‌نگێ هه‌بيت گه‌له‌ك زانا دبێژن: ئه‌و نڤێژێت ژێ چۆين دڤێت قه‌زاكه‌ت خۆ چه‌ند بن، و ئه‌ڤه ره‌ئيا جمهورێ زانايانه، و ئه‌ز ب خۆ د ڤى واريدا يێ دگه‌ل بۆچۆنا (ابن تيميه) و(ابن القيم) خودآ ژ هه‌ردوويان رازى بيت دبێژن: قه‌زا نينه، چونكى ئه‌و نڤێژا بێ سويچ و هێجه‌ت چۆيى، چو زڤرين بۆ نينه، قه‌زا بۆ وێ نڤێژێيه ئه‌وا ب عوزر چۆيى. بۆ نموونه: ئێك ئێڤارى بنڤيت و عه‌يشا ژ خه‌و رابيت، هينگێ پێدڤيه نڤێژا مه‌غره‌ب قه‌زاكه‌ت، يان يێ هه‌ى نڤێژ يا ژ بيرا وى چۆى و نه‌هاته بيرا وى هه‌تا وه‌ختێ نڤێژێ چۆى ژ نوى هاته بيرێ نه‌كريه، وى ده‌مى بۆ وى ژى هه‌يه قه‌زا بكه‌ت.
ب كورتى هه‌كه نڤێژ ب عوزر چۆبيت قه‌زا يا بۆ هه‌ى، و هه‌كه بێ عوزر چۆبيت قه‌زا بۆ نينه، و هه‌ر ده‌مێ مرۆڤ ل خۆ زڤرى بلا يێ هشيار بيت ل نڤێژێت خۆ و يێ رژد بيت سه‌ر سونه‌تان. و ئه‌ڤه ره‌ئيا عومه‌رێ كورێ خه‌تابيه و كورێ وى و كۆمه‌كا سه‌حابان خودآ ژ هه‌ميان رازى بيت و خودێ چێتر دزانيت.
