ب/ پێدڤيه ده‌مێ ئه‌م دچينه سه‌ر نڤێژێ هزرێت مرۆڤى د كۆم بن و به‌لاڤ نه‌بن و ب ترس بچينه د نڤێژێدا، و بزانين ئه‌م به‌رامبه‌رى خودێ دت راوه‌ستاينه، و به‌رێ مه پتر ل ئاخره‌تا مه بيت، و خه‌ما مه يا سه‌ره‌كى ئه‌و بيت كا ئه‌ڤ نڤێژه ژ مه دهێته وه‌رگرتن ئان نه! بۆچى دڤێت ئه‌م ب ڤى ره‌نگى بچينه د نڤێژێدا؟ چونكى نڤێژ به‌رامبه‌ربوونه دگه‌ل خودايێ مه‌زن و گه‌شت و ميعراجا موسلمانيه به‌ر ب خودێڤه، و دا ئه‌ز رێكێ ل شه‌يتانى بگرم، چونكى ئه‌و چو ده‌رفه‌تان ژ خۆ نابه‌ت، به‌ردوام كار دكه‌ت خرابيێ بگه‌هينيته موسلمانى و ل به‌رڤه يێ راوه‌ستيايه، و هندى بشێت ناهێليت كارێ باش بكه‌ت، و هه‌كه هه‌ر كر، و گوهێ خۆ نه‌دايێ دێ كاركه‌ت كێماسى تێدا بيت و يێ سپه‌هى و خۆسه‌ر نه‌بيت.
و ژ كارێت شه‌يتان به‌ردوام به‌رگه‌ريانێ بۆ دكه‌ت وه‌كى پێدڤى نه‌هێت.. نڤێژا موسلمانيه، به‌رده‌وام كار دكه‌ت مرۆڤ نڤێژا خۆ دورست بۆ خودێ نه‌كه‌ت، و دكه‌ڤيته د دلێ مرۆڤيدا و هنده هزرا بۆ مرۆڤى چێدكه‌ت به‌رى هنگى نه نێزيك و نه دوير د سه‌رێ مرۆڤى و د هزرا مرۆڤيدا نه، هه‌تا وه‌ل مرۆڤى بكه‌ت نه‌زانيت كا چاوا نڤێژا خۆ كر. ڤێجا دڤێت مرۆڤ يێ هشيار بيت، و رێكێ نه‌ده‌ته شه‌يتانى و هه‌مى رێكان لێ بگريت، ئێك ژ وان رێكان: بۆ هه‌ر نڤێژه‌كا فه‌رز ده‌ستنڤێژه‌كا نوى بگريت. رێكا دووێ: مرۆڤ يێ رژد بيت سه‌ر نڤێژێت ب جه‌ماعه‌ت و به‌رده‌وام مرۆڤ ب ئيماميڤه يێ گرێداى بيت. يا سيێ: ده‌نگێ خۆ پيچه‌كێ بلندكه‌ت، هند ئاگه‌ه ژ خۆ هه‌بيت، خودايێ مه‌زن دبێژيت: ((وَلَا تَجْهَرْ بِصَلَاتِكَ وَلَا تُخَافِتْ بِهَا وَابْتَغِ بَيْنَ ذَٰلِكَ سَبِيلًا )) ده‌نگێ خۆ هند نزم نه‌كه‌ى ته ئاگه‌هـ ژ خۆ نه‌بيت كا تو چ دبێژى، و هند بلند ژى نه‌كه‌ى يێ دوير گول ته بيت كا تو چ دبێژى. يا چارێ: هزرا خۆ د وان زكر و خواندناندا بكه ئه‌وێت د نڤێژادا دهێنه‌كرن و بزاني ده‌مێ تو دبێژى (الله اكبر) ئه‌ڤه چ دگه‌هينيت و دڤێت چ ل ده‌ف ته په‌يداكه‌ت و دڤێت هزرا ته چ تێدا په‌يدابيت و بۆ چ بچيت، هه‌روه‌سا دگه‌ل هه‌مي زكر و خواندنێت دي و دگه‌ل ڤێژى هه‌كه هه‌ر شك بۆ ته چێ بوو و ته نه‌زاني كا ته چه‌ند ركاعه‌ت كرن، هنگى د ناڤبه‌را هژمارا كێم و گه‌له‌كدا يا كێم بگره، ئانكو: تو ب شك كه‌فتي كا ته سێ يان چار كرن، بدانه ته سێ يێت كرين، و هه‌كه تو ب شك كه‌فتى كا ته دوو كرينه يان سێ، بدانه ته دوو يێت كرين و نڤێژا خۆ تمامكه، و به‌رى سلاڤا ملان دوو جاران هه‌ره سه‌جدا سه‌هوێ و پاشى سلاڤا ملان ڤه‌ده، ئه‌ڤه دێ جهێ وێ شكێ گريت هه‌روه‌كى ئه‌ڤه د ڤه‌گێرا ئيمام ئه‌حمه‌د و ترمزى و ئبن ماجه‌دا هاتى.
عه‌بدوللايێ كورێ عومه‌رى(خودێ ژێ رازى بيت)، دبێژيت: من گول پێغه‌مبه‌رێ خودێ بوو (سلاڤێت خودێ لێ بن) دگۆت: ((هه‌كه ئێك ژ هه‌وه د نڤێژا خۆدا ب شك كه‌فت و نه‌زانيت كا چه‌ند ركاعه‌ت كرينه ئێك يان دوو، بلا بدانيت ئێك يا كري، و هه‌كه نه‌زانى كا دوو كرينه يان سێ، بلا بدانيت دوو يێت كرين، و هه‌كه نه‌زانى كا سێ كرينه يان چار، بلا بدانيت سێ يێت كرين، پاشى دويماهيا ركاعه‌تا دويماهيێ به‌رى سلاڤا ملان دوو جار بچيته سه‌جدا سه‌هوێ، ئه‌ڤه دێ جهێ وێ شكێ گريت، ديسا ئه‌بو داوود و ئبن ماجه ژ ئه‌بو هوره‌يره(خودێ ژێ رازى بيت)، ڤه‌دگوهێزن كو پێغه‌مبه‌رى (سلاڤێت خودێ لێ بن) گۆتيه: ((گه‌له‌ك جاران شه‌يتان دێ كه‌ڤيته به‌ر هه‌وه و دێ وه‌ل هه‌وه كه‌ت هوين نه‌زانن كا ئێك ژ هه‌وه چه‌ند ركاعه‌ت كرينه، هه‌كه ئێك ژ هه‌وه ئه‌ڤه ديت بلا يا كێم حسێبكه‌ت و پاشى تمام بكه‌ت، و دويماهيێ دوو جار بچيته سه‌جدا سه‌هوێ)) و خودێ چێتر دزانيت.
