ب / يافه‌ر ئه‌وه ئه‌م خه‌مێ ژ ويترێ بخوين و سستيێ تێدا نه‌كه‌ين و ژ خۆ نه‌به‌ين، و بزانين خودێ حه‌ژ ويترێ دكه‌ت. عه‌ليێ كورێ ئه‌بي تالبى خودێ ژێ رازى بيت) دبێژيت: سونه‌تا وترێ نه‌فه‌رزه وه‌كى نڤێژێ، به‌لێ پێغه‌مبه‌رێ خودێ (سلاڤێت خودێ لێ بن) يا كريه سونه‌ت، گۆت: ((ب راستى خودێ كه‌ته (د سيفات و سالۆخه‌ت و كار و زاتێ خۆدا) و حه‌ژ تشتێ كه‌ت دكه‌ت))، (ژبه‌ر هندێ گه‌له‌ك عيباده‌ت كه‌تن، وه‌كى: ته‌وافێ و هاتن و چۆنا سه‌فا و مه‌روايێ و به‌ركێت ره‌جمێ و... هتد)، ڤێجا گه‌لى خه‌لكێ قورئانێ (ژ خوانده‌ڤان و ژبه‌ركريان) نڤێژا ويترێ بكه‌ن). و پشتى نڤێژا عه‌يشايه هه‌تا بانگێ سپێدێ. عائيشا دايكا موسلمانان خودێ ژێ رازى بيت) دبێژيت: د هه‌مى ده‌مێت شه‌ڤێدا پێغه‌مبه‌رێ خودێ (سلاڤێت خودێ لێ بن) ويتر يا كرى، ژ سه‌رێ شه‌ڤێ و ژ نيڤا وێ و ژ دويماهيا وێ، و ويترا وى يا گه‌هشتيه سپێدێ. و بۆ وى يێ بترسيت هشيار نه‌بيت، ويترا خۆ زوى بكه‌ت به‌رى بنڤيت باشتره، و يێ ژ خۆ پشت راست بيت د ده‌رحه‌قێ وێدا دويماهيا شه‌ڤێ بكه‌ت باشتره.
ئه‌بو هوريره خودێ ژێ رازى بيت) دبێژيت: پێغه‌مبه‌رێ خودێ (سلاڤێت خودێ لێ بن) ئه‌مرێ من كر ئه‌ز ويترا خۆ بكه‌م پاشى بنڤم. و د حه‌ديسه‌كا ديدا پێغه‌مبه‌ر (سلاڤێت خودێ لێ بن) دبێژيت: ((اجْعلوا آخِرَ صلاتِكُمْ بِاللَّيْلِ وِتْراً)) ئانكو: نڤێژا خۆ يا دويماهيێ ب شه‌ڤ بكه‌نه ويتر.
ژ ڤان هه‌ردوو حه‌ديسان دهێته زانين: وه‌ختێ باشتر د راستا مرۆڤيدا ل سه‌ر وى دمينيت، هه‌كه بزانيت نارابيت، ئه‌و زوى بكه‌ت به‌رى بنڤيت باشتره، و هه‌كه بزانيت مسۆگه‌ر دێ رابيت بلا بهێليته دويماهيا شه‌ڤێ. پێغه‌مبه‌ر (سلاڤێت خودێ لێ بن) دبێژيت: ((هه‌ركه‌سێ بترسيت دويماهيا شه‌ڤێ نه‌رابيت، بلا سه‌رێ وێ ويترێ بكه‌ت، و يێ ب ئومێد بيت دويماهيا وێ هشيار بيت، بلا دويماهيا شه‌ڤێ ويترێ بكه‌ت)).
ب راستى نڤێژا دويماهيا شه‌ڤێ يا ب شاهده (ژ لايێ ملياكه‌تانڤه) و ئه‌و چێتره. به‌لێ يێ ويترێ پشتى ته‌راويحا نه‌كه‌ت.. هه‌كه بزانيت دێ ب جه‌ماعه‌ت كه‌ت بلا نه‌كه‌ت و بهێليت بۆ پاشيڤێ؛ و هه‌كه نه.. يا باشتر ئه‌وه ويترا خۆ دگه‌ل موسلمانان بكه‌ت و ب جه‌ماعه‌ت و ويترا خۆ پشتى ته‌راويحا نه‌هێليت، و خودێ چێتر دزانيت.
