ب / ده‌سپێكێ فه‌ره بزانين كا حوكمێ ته‌راويحان چيه، و كا خێرا وان چه‌نده، دا هه‌لويستێ دورست به‌رامبه‌ر وه‌رگرين، و دا هه‌لسه‌نگاندنا مه بۆ يا دورست بيت و خه‌له‌ت نه‌بيت، ته‌راويح يان رابوونا ره‌مه‌زانێ، ژ سونه‌تێت موئه‌ككه‌ده، و ئه‌و سونه‌ته يا شه‌ڤێت ره‌مه‌زانێ پێ دهێته ساخكرن، و دبێژنێ ته‌راويح.. چونكى موسلمانان د ناڤبه‌را هه‌ر چار ركاعه‌تاندا بێهنا خۆ ڤه‌ددان، و خودايێ مه‌زن خێرا ته‌راويحا ئينايه به‌رامبه‌ر رۆژيێت ره‌مه‌زانێ.
ده‌رهه‌قێ رۆژياندا دبێژيت: ((مَنْ صَامَ رَمَضانَ إِيمَاناً واحْتِساباً، غُفِرَ لَهُ ما تَقَدَّمَ مِنْ ذذبِهِ)) ئانكو: هه‌ركه‌سێ ژ باوه‌رى و ب هيڤيا خێرێ ره‌مه‌زانێ بگريت گونه‌هێت وى يێت بۆرين هاتنه ژێبرن. و د راستا ته‌راويحاندا دبێژيت: ((منْ قام رَمَضانَ إِيماناً واحْتِساباً غُفِرَ لَهُ مَا تَقَدَّمَ مِنْ ذنْبِهِ)) ئانكو: هه‌ركه‌سێ ژ باوه‌رى و ب هيڤيا خێرێ، ره‌مه‌زانێ رابيت (ئانكو ته‌راويحان بكه‌ت) گونه‌هێت وى يێت بۆرين هاتنه ژێبرن. هه‌لبه‌ت هه‌ردوو حه‌ديس بوخارى و موسلمى ڤه‌گێراينه.
به‌رێ خۆ بدێ كا چاوا هه‌ردوو ئيناينه به‌رێك، ڤێجا چاوا مرۆڤ خه‌مێ ژ رۆژيێت خۆ دخۆت.. دڤێت وه‌سا مرۆڤ خه‌مێ ژ ته‌راويحا ژى بخۆت، و سستيێ تێدا نه‌كه‌ت و نه‌هێليت ژ مرۆڤى بچن ب چ ره‌نگان، و بزانيت پێغه‌مبه‌رێ خۆشتڤى (سلاڤێت خودێ لێ بن) موسلمان پالداينه ته‌راويحا. ئه‌بو هوريره خودێ ژێ رازى بيت) دبێژيت: كانَ رسُولُ اللَّهِ صَلّى اللهُ عَلَيْهِ وسَلَّم يُرَغِّبُ في قِێامِ رَمَچانَ مِنْ غيْر أَنْ ێأْمُرَهُمْ فِيه بعزيمه، فيقُولُ: ((مَنْ قَامَ رَمَضانَ إِيماناً واحْتِسَاباً غُفِرَ لَهُ مَا تَقَدَّم مِنْ ذنْبِهِ)) ئانكو: پێغه‌مبه‌رێ خودێ (سلاڤێت خودێ لێ بن) پالدانا رابوونا ره‌مه‌زانێ دكر بێى كو ب واجب ئه‌مرێ وان بكه‌ت، و دگۆت: ((هه‌ركه‌سێ ژ باوه‌رى و ب هيڤيا خێرێ، ره‌مه‌زانێ رابيت (ئانكو ته‌راويحان بكه‌ت) گونه‌هێت وى يێت بۆرين هاتنه ژێبرن)). و دڤێت بزانين بێ گۆمان كرنا وان و ل مزگه‌فتێ و ب جه‌ماعه‌ت خێرتره، مرۆڤ ل مال و ب تنێ بكه‌ت، و هه‌كه تو نه‌گه‌هشتيه مزگه‌فتێ يان ژبه‌ر هه‌ر ئه‌گه‌ره‌كا هه‌بيت تو نه‌شياى بێيه مزگه‌فتێ پێكۆلێ بكه ل مال دگه‌ل مالا خۆ ب جه‌ماعه‌ت بكه ـ خۆ هه‌كه ته د هه‌مى ركاعه‌تاندا سۆره‌تا ژ هه‌ميان كورتتر خوانديه ـ و خودێ چێتر دزانيت.
