ب / خويشكا هێژا.. دڤێت مرۆڤ خه‌مێ ژ په‌روه‌رده‌كرنا عه‌يالێ خۆ بخۆت هێژ د بچويك، هه‌ر ژ ژيێ حه‌فت ساليێ مرۆڤ فێرى نڤێژان بكه‌ت و ته‌خسيريێ د ڤێ چه‌ندێدا نه‌كه‌ت، هه‌روه‌كى پێغه‌مبه‌رێ خودێ (سلاڤێت خودێ لێ بن) گۆتيه مه: ((فه‌رمان و ئه‌مرێ بچويكێت خۆ ب كرنا نڤێژان بكه‌ن، و ئه‌و حه‌فت سالى، و سه‌را نه‌كرنا نڤێژان بقوتن و ئه‌و ده‌ه سالى، و جهێت وان ژێك جوداكه‌ن)). و هه‌ر زوى ژى فێرى رۆژيگرتنێ بكه‌ين هه‌روه‌كى سه‌حابان ب ڤى ره‌نگى زارۆكێت خۆ فێرى رۆژيگرتنێ دكرن.
ره‌بيعا كچا موعه‌زى(خودێ ژێ رازى بيت)، دبێژيت: مه رۆژى ب زارۆكێت خۆ ددانه گرتن، و ئه‌و د بچويك، و مه دگه‌ل خۆ دبرنه مزگه‌فتێ، هه‌كه ژ برساندا گريبان، مه ب بويكێت هريێ مژويل دكرن.
به‌رێ خۆ بدێ ئه‌ڤه‌يه دلپێڤه‌بوونا دورستى، نه ئێكسه‌ر رۆژى پێ ددانه خوارن، به‌لكى هێژ زوى فێرى رۆژى و نڤێژا دكرن، ڤێجا ده‌مێ مه‌زن دبوون هه‌ما ئه‌و ب خۆ د به‌رهه‌ڤ بوون به‌رده‌واميێ بده‌نه رۆژى و نڤێژێت خۆ، ڤێجا به‌رى ئه‌م حوكمێ ڤى كورى بێژين.. فه‌ره حوكمێ دايبابا بێژين: ئه‌رێ هوين ب دورستى ب ئه‌رك و واجبێ خۆ رابووينه! ئه‌و شيره‌تێت پێغه‌مبه‌رێ خودێ (سلاڤێت خودێ لێ بن) د راستا زارۆكێت خۆدا ب جه ئيناينه يان نه، ئه‌رێ دايكا هێژا.. ده‌مێ ئه‌و بچويك رۆژى و نڤێژ دنياسين، هه‌ڤالێ رۆژى و نڤێژا بوو يان نه! ئه‌گه‌ر نه، پسيارا حوكمێ خۆ بكه تو چه‌ندا گونه‌هكارى، باب چه‌ندێ گونه‌هكاره؛ چونكى عه‌يال مه‌زنترين ئه‌مانه‌ته د ستۆيێ دايباباندا، و پاراستنا ڤى ئه‌مانه‌تى د بنيرا نه ب خوارن و ڤه‌خوارن و جلكانه، ئه‌ڤه دێ هه‌ر قه‌تيێت، به‌لێ پاراستنا دورست په‌روه‌رده‌كرن و راكرنه ل سه‌ر سنج و ئه‌خلاقێ پێغه‌مبه‌رێ خۆشتڤى (سلاڤێت خودێ لێ بن) و ل سه‌ر دينێ خودێ، پاشى دێ هێين به‌حسێ ڤى گه‌نجى كه‌ين د راستا نڤێژێدا ماده‌م يێ بالغه وى د بنيرا چو هێجه‌ت و عوزر نينن ئه‌و نڤێژا نه‌كه‌ت، چونكى نڤێژ ب چو ره‌نگان ناهێته هێلان، و نابيت سستى ژى تێدا بێته‌كرن. و د راستا رۆژيێدا نابيت ئه‌و ژ ده‌ف خۆ بێژيت: ئه‌ز نه‌شێم رۆژيێ بگرم، دڤێت بزڤريته دختۆره‌كێ موسلمان و خودێ ترس چاره‌سه‌ريا خۆ بكه‌ت و ئه‌و بێژيتێ رۆژيێ بگره يان نه، و فه‌توا يا ل ده‌ف دختۆرا نه ل ده‌ف منه و نه ل ده‌ف ويه و خودێ چێتر دزانيت.
