ب / دبيت نڤێژكه‌ر هنده‌جاران سه‌هو دبيت، كێماتى و زێده‌يى بكه‌ڤيته نڤێژا وى ـ چ ژبيركرن چ ژى خه‌له‌تبوون و سه‌هوكرن ـ هنگى دێ سوجدا سه‌هوێ به‌ت، به‌لێ ڤێ سه‌هوابوون و ژبيركرنێ وێنه‌يێت خۆ يێت هه‌ين، و هه‌ر وێنه‌يه‌كى حوكمێ خۆ دگه‌ل سوجدا سه‌هوێ يێ هه‌ى.
ئێك: هه‌كه د نڤێژا خۆدا شك بۆ چێ بوو و نه‌زاني كا چه‌ند ركاعه‌ت كرينه ـ دوو يان سێ، يان شك بۆ چێ بوو د ناڤبه‌را سێ و چاراندا ـ و نه‌زانى كا سێ كرينه يان چار، هنگى دێ هژمارا كێم حسێبكه‌ت مابه‌ينا دوو و سێيان دێ حسێبكه‌ت دوو، و د ناڤبه‌را سێ و چاراندا دێ حسێبكه‌ت سێ، و هۆسا.. و دێ نڤێژا خۆ تمامكه‌ت و پشتى ته‌حياتا دويماهيێ به‌رى سلاڤا ملان دوو جاران دێ چيته سوجدا سه‌هوێ و پاشى دێ سلاڤا ملان ڤه‌ده‌ت، و ئه‌ڤ هه‌ردوو سوجده دێ جهێ وێ شكێ گرن، هه‌روه‌كى ئه‌بو سه‌عيدێ خودرى خودێ ژێ رازى بيت) بۆ مه د ريوايه‌تا موسلميدا ڤه‌گوهاستى، دبێژيت: پێغه‌مبه‌رێ خودێ (سلاڤێت خودێ لێ بن) گۆت: ((هه‌كه ئێك ژ هه‌وه د نڤێژا خۆدا ب شك كه‌فت و نه‌زانى كا چه‌ند ركاعه‌ت كرن ـ سێ يان چار ـ بلا شكێ بهێليت و ل سه‌ر يا مسۆگه‌ر (كو هژمارا بچويكتره) تمام بكه‌ت و پاشى دوو جارا بچيته سوجدێ به‌رى سلاڤا ملان ڤه‌ده‌ت، ئه‌گه‌ر وى پێنج كربن ئه‌ڤه نڤێژا وى كره جۆت و ئه‌گه‌ر چار كربن ئه‌ڤه شكاندنه بۆ شه‌يتانى)).
دوو: هه‌كه ركاعه‌ته‌ك ژبيركر و بيرا وى نه‌هاتێ هه‌تا نڤێژا خۆ تمامكري و ژ نوى بيرا وي هاتێ ركاعه‌ته‌ك يان دوو ركاعه‌ت يێت ژبيركرين نڤێژا خۆ دوباره ناكه‌ت سه‌ر ژ نوى، به‌لكى دێ هێته د نڤێژێدا و كا چه‌ند ماينه دێ تمامكه‌ت و به‌رى سلاڤا ملان دوو جارا دێ چيته سوجدا سه‌هوێ، و ئه‌ڤه دێ جهێ خه‌له‌تيێ گريت.
سێ: هه‌كه خه‌له‌ت بوو يان ژبيركر ته‌حياتا ئێكێ ژ نڤێژا سێ ركاعه‌تى يان چار ركاعه‌تى نه‌خواند و رابوو هندى پشتا وى راست نه‌بيت.. بۆ هه‌يه بزڤريته‌ڤه و روينيته خوارێ و ته‌حياتا خۆ بخوينيت و نڤێژا خۆ ببه‌ته سه‌رى، به‌لێ هه‌كه رابوو و پشتا وى راست بوو و ژ نوى بيرا وى هاتێ.. ئه‌و ناروينيته خوارێ، چونكى ئه‌و ژ سونه‌تێ رابوو روكنى، و روكن ژ سونه‌تێ بهێزتره، هنگى دێ به‌رده‌واميێ ده‌ته نڤێژا خۆ و ركاعه‌تا دويماهيێ و به‌رى سلاڤا ملان دوو جاران دێ چيته سوجدا سه‌هوێ، و ئه‌ڤه دێ جهێ وێ ژبيركرنێ گريت، چونكى ته‌حياتا ئێكێ سونه‌ته نه‌روكنه، و سوجدا سه‌هوێ جهێ وێ دگريت.
چار: و ئه‌گه‌ر خه‌له‌ت بوو يان ژبيركر و ركاعه‌ته‌كا زێده كر، وه‌كى نڤێژا سپێدێ راببيته ركاعه‌تا سيێ، يان يا مه‌غره‌ب رابوو ركاعه‌تا چارێ يان يا چار ركاعه‌تى رابوو يا پێنجێ و هه‌كه بيرا وى هاته خه‌له‌تيا وى و ئه‌و ب خه‌له‌تيا خۆ حه‌سيا.. ئێكسه‌ر دڤێت روينيته خوارێ، و هه‌كه ته‌حياتا دويماهيێ نه‌خواندبيت دێ خوينيت و به‌رى سلاڤا ملان دوو جاران دێ چيته سوجدا سه‌هوێ و ئه‌ڤه دێ جهێ وێ سه‌هوێ و خه‌لتيێ گريت.
پێنج: و ئه‌گه روكنه‌ك ژ روكنێت نڤێژێ ژبيركر، وه‌كى سوجده‌كا نڤێژێ يان ركوع ژبيركر و ئێكسه‌ر روينشته خوارێ بێى ركوع، ئه‌گه‌ر بيرا وى هاته وى روكنێ ژێ چۆي، به‌رى ده‌ست ب ركاعه‌ته‌كا دى بكه‌ت، دێ زڤريته جهێ وى روكنى و دێ تمامكه‌ت، و به‌رى سلاڤا ملان دوو جاران دێ چيته سوجدا سه‌هوێ و پاشى دێ سلاڤا ملان ڤه‌ده‌ت، و هه‌كه بيرا وى نه‌هاته روكنى هه‌تا ده‌ست ب ركاعه‌ته‌كا دى كرى و چۆيه تێدا هنگى دێ دانيت ئه‌و ركاعه‌تا روكنه‌ك تێدا نه‌كرى هه‌روه‌كى ئه‌و ركاعه‌ت نه‌كرى و ئه‌و ركاعه‌تا ئه‌و تێدا جهێ وێ ركاعه‌تێيه و ته‌حياتا دويماهيێ به‌رى سلاڤا ملان دوو جاران دێ چيته سوجدا سه‌هوێ و پاشى دێ سلاڤا ملان ڤه‌ده‌ت.
شه‌ش: ئه‌گه‌ر نڤێژكه‌رى ژ ژبيركرن يان ژ سه‌هواكرن به‌رى نڤێژا خۆ تمامكه‌ت سلاڤا ملان ڤه‌دا و پاشى به‌رى ده‌ستنڤێژا خۆ بشكێنيت و ده‌مه‌كێ درێژ سه‌رڤه بچيت بيرا وى هاتێ سلاڤا ملان به‌رى تماميا نڤێژێ يا ڤه‌داى هنگى دڤێت بزڤريت چه‌ند مايه تمامكه‌ت و ل وى جهێ سلاڤا ملان ڤه‌داى و پاشى پشتى ته‌حياتێ و به‌رى سلاڤا ملان دوو جاران دێ چيته سوجدا سه‌هوێ و پاشى دێ سلاڤا ملان ڤه‌ده‌ت، و هه‌كه ده‌مه‌كێ درێژ كه‌فته د مابه‌ينێدا يان ده‌ستنڤێژا خۆ شكاند هنگى دێ نڤێژا خۆ كه‌ته‌ڤه و خودێ چێتر دزانيت.
