ب / پێدڤيه بزانين نه‌كرنا هه‌ر نڤێژه‌كێ گونه‌هه‌كا مه‌زنه. پێغه‌مبه‌رێ خودێ (سلاڤێت خودێ لێ بن) د راستا چۆنا نڤێژا ئێڤاريدا دبێژيت: هه‌روه‌كى ئه‌بو هوره‌يره خودێ ژێ رازى بيت) ڤه‌دگوهێزيت، دبێژيت: پێغه‌مبه‌رێ خودێ (سلاڤێت خودێ لێ بن) گۆت: ((هه‌ركه‌سێ نڤێژا ئێڤارى بهێليت، ب راستى كارێ وى پويچ بوو))، و ملياكه‌ت سپێده و ئێڤاران دگه‌هنه ئێك و شاده‌ييێ ئان دێ بۆ ته ده‌ن يان ل سه‌ر ته ده‌ن. پێغه‌مبه‌رێ خودێ (سلاڤێت خودێ لێ بن) دبێژيت: ((ملياكه‌ت د راستا هه‌وه‌دا جهێ ئێك و دوو دگرن، ملياكه‌تێت شه‌ڤێ و ملياكه‌تێت رۆژێ، و نڤێژا سپێدێ و ئێڤارى دگه‌هنه ئێك، پاشى ئه‌وێت ب شه‌ڤ ماينه دگه‌ل هه‌وه دێ بلند بن، خودێ دێ پسيارا وان كه‌ت، و ئه‌و ژ وان چێتر دزانيت: هه‌وه چاوا به‌نده‌يێت من هێلان؟ دێ بێژن: مه هێلان و وان نڤێژ دكرن و ئه‌م چۆينه ده‌ف وان و وان نڤێژ دكرن)). ديسا يێ نه‌رابيته نڤێژا سپێدێ، بلا ژ نيفاق و دوروياتيێ ژ خۆ بترسيت، چونكى پێغه‌مبه‌رێ خودێ (سلاڤێت خودێ لێ بن) دبێژيت: ((چو نڤێژ ژ يا عه‌يشا و سپێدێ ل سه‌ر دوروِيان گرانتر نينه، و هه‌كه وان زانيبا كا چ خێر د واندايه دا هێنێ خۆ هه‌كه ل سه‌ر زكى هاتبانێ)).
چه‌ند حه‌ديسه‌ك ل سه‌ر قه‌درێ نڤێژا سپێدێ هاتينه، ژ وان: يێ نڤێژا سپێدێ ب جه‌ماعه‌ت كر ئه‌و كه‌فته بن ئێمناتيآ، ب ڤێ رامانآ، پێغه‌مبه‌رێ خودێ (سلاڤێت خودێ لێ بن) دبێژيت: ((هه‌ركه‌سێ نڤێژا سپێدێ ب جه‌ماعه‌ت بكه‌ت، ئه‌و يێ د ئێمناهيا خودێدا و د بن چاڤدێريا ويڤه، هشياربن نه‌هێلن و سستيێ تێدا نه‌كه‌ن، و خودێ حسێبا وه نه‌كه‌ت ل سه‌ر شكاندنا وێ په‌يمانێ يا هوين پێ هه‌ژى ئێمناهى و چاڤدێريا وى بووين)). ب راستى يێ خودێ وى بخوازيت (حسێبا وى بكه‌ت) دێ گه‌هيتێ، پاشى سه‌روسه‌ر دێ هاڤێژته د جه‌هنه‌مێدا. ديسا(سلاڤێت خودێ لێ بن) دياردكه‌ت هه‌ركه‌سێ دڤێت بچيته به‌حه‌شتێ بلا پارێزيێ ل نڤێژا خۆ يا سپێدێ بكه‌ت. پێغه‌مبه‌ر (سلاڤێت خودێ لێ بن) دبێژيت: ((هه‌ركه‌سێ نڤێژا سپێدێ و ئێڤارى بكه‌ت، چۆ به‌حه‌شتێ)). ديسا دبێژيت: ((كه‌سه‌ك ناچيته جه‌هنه‌مێ نڤێژا سپێدێ و ئێڤارى بكه‌ت)). و يێ پارێزيێ ل نڤێژا سپێدێ بكه‌ت ئه‌و رۆژا قيامه‌تێ دێ خودايێ خۆ بينيت.
جه‌ريرێ كورێ عه‌بدوللاى خودێ ژێ رازى بيت)، دبێژيت: ئه‌م ل ده‌ف پێغه‌مبه‌رێ خودێ بووين (سلاڤێت خودێ لێ بن) به‌رێ خۆ دا هه‌يڤێ شه‌ڤا چارده شه‌ڤى و گۆت: ((ب راستى هوين دێ خودايێ خۆ بينن هه‌روه‌كى هوين ڤێ هه‌يڤێ دبينن، و گۆمان بۆ هه‌وه ب ديتنا وى چێنابيت (يان زه‌حمه‌ت و نه‌خۆشى بۆ هه‌وه ب ديتنا وى چێنابيت) و هه‌كه هوين بشێن د راستا نڤێژا سپێدێ و ئێڤاريدا د خوساره‌ت نه‌بن، بكه‌ن)). (ئانكو هشياربن ژ ڤان نڤێژان د بێ ئاگه‌ه نه‌بن هه‌روه‌كى گه‌له‌ك خه‌لك تێدا خوساره‌ت، چونكى ژبه‌ر شۆلێ خۆ ژێ بێ ئاگه‌هن) و خودێ چێتر دزانيت.
