ب/ هێلان و نه‌كرنا نڤێژا سپێدێ ئێخستنا ره‌خه‌كێ ئاڤاهيێ نڤێژانه، و هه‌كه ره‌خه‌كێ ديوارى كه‌فت بزانه ئه‌ڤێت دى ژى د كه‌فتينه ـ چ نێزيك چ دوير ـ، چونكى ره‌خێت دى د بنياتدا ل سه‌ر وى ره‌خى د ئاڤاكرينه، و نڤێژا سپێدێ بناخ و بنياتێ نڤێژێت ديه، و هه‌كه بنيات هه‌رفت؛ چو پێ نه‌ڤێت ئه‌ڤێت دى ژى هه‌ر دێ كه‌ڤن، و يێ پارێزيێ ل نڤێژا بنيات و بناخه كو يا سپێدێيه نه‌كه‌ت.. چو گۆمان تێدا نينه ئه‌و پارێزيێ ل نڤێژێت دى ژى ناكه‌ت، يێ خه‌مسارى د بناخ و بنياتيدا كر چاوا د يێت ديدا ناكه‌ت! و يێ شه‌يتانى ئه‌و د نڤێژا ئه‌ساس و بنياتدا سست كر چاوا وى د يێت ديدا سست ناكه‌ت!
پێغه‌مبه‌رێ خودێ (سلاڤێت خودێ لێ بن) ئێك ژ نيشانێت مونافقى و دوروى دكه‌ته گرانبوونا نڤێژا سپێدێ ل سه‌ر، پا تو چ دبێژى يێ نه‌كه‌ت و بهێليت! پێغه‌مبه‌رێ خودێ (سلاڤێت خودێ لێ بن) دبێژيت: ((چو نڤێژ ژ يا عه‌يشا و سپێدێ ل سه‌ر دورويان گرانتر نينه)). ڤيجا يێ نڤێژا سپێدێ نه‌كه‌ت بلا ژ دورياتيێ د راستا خۆدا بترسيت، خودێ مه ژێ بپارێزيت و خودێ چێتر دزانيت.
