ب / ئه‌ڤه نه‌خه‌له‌تيا بابێيه، و تشته‌كێ گه‌له‌كێ جوان و د جهێ خۆدايه باب ل عه‌يالێ خۆ و نڤێژێت وان يێ هشيار بيت، خۆزى باب هه‌مى د هۆسابان و ئه‌ڤه ئه‌ركێ وانه و دڤێت سستيێ د ڤى ئه‌ركيدا نه‌كه‌ن هه‌كه دێ د گونه‌هكار بن، و ئه‌ڤه‌يه پاراستنا ئه‌مانه‌تى مرۆڤ ل دينێ عه‌يالى يێ هشيار بيت، نه ژ خوارن و ڤه‌خوارنا وان ب تنێ، خودايێ مه‌زن ئه‌مرێ دايبابان و هه‌ركه‌سێ به‌رپرس و سه‌ميانێ مالا خۆ دكه‌ت: ((وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا )) ئانكو: فه‌رمانا مالا خۆ ب نڤێژان بكه و بێهنا خۆ ل سه‌ر وان فره‌هكه.
و ئه‌ڤه يا فه‌ره مرۆڤ ل سه‌ر يێ رژد و هشيار بيت، و يافه‌ره شه‌رم د راستيه‌كێدا نه‌بيت، باب به‌رى وان وێ راستيێ دزانيت كو كچێ هنده رۆژێت هه‌ين نه‌شێت تێدا نڤێژان بكه‌ت، له‌وا يا دورست هوين شه‌رمێ نه‌كه‌ن و ب هه‌مى رێز و رويمه‌ت بێژنه بابێ خۆ: بابێ هێژا كراسێ ئه‌م تێدا نابيت نڤێژان بكه‌ين، هنگى باب دێ ب ساناهي تێگه‌هيت و دێ زانيت عوزرا هه‌وه چيه و ئيحراجا هه‌وه ناكه‌ت و شه‌رمێ بۆ هه‌وه چێ ناكه‌ت، و هه‌كه هه‌ر هوين نه‌شێن پێدڤيه دايكا خۆ ئاگه‌هداركه‌ن و ئه‌و دێ بابێ هه‌وه ب كراسێ هه‌وه ئاگه‌هداركه‌ت، و هۆسا نه هوين دكه‌ڤنه شه‌رمێ نه باب ئه‌رك و واجبێ خۆ سستيێ تێدا دكه‌ت و خودێ چێتر دزانيت.
