ب / پێدڤيه نڤێژ وه‌سا بێته‌كرن وه‌كى بۆ مه ژ پێغه‌مبه‌رێ خۆشتڤى (سلاڤێت خودێ لێ بن) هاتيه ڤه‌گوهاستن بێ زێده‌يى و بێ كێماسى، چونكى پێغه‌مبه‌رێ خۆشتڤى (سلاڤێت خودێ لێ بن) دبێژيت: ((نڤێژێ بكه‌ن هه‌روكى هه‌وه ئه‌ز ديتم نڤێژێ دكه‌م))، و كا چاوا فه‌ره حه‌ره‌كێت نڤێژێ دڤێت د وه‌سا بن هه‌روه‌كى بۆ مه ژ پێغه‌مبه‌رێ خۆشتڤى (سلاڤێت خودێ لێ بن) هاتينه زانين، هه‌روه‌سا گۆتن و خواندن و زكرێت تێدا ژى دڤێت ئه‌و بن ئه‌وێت ژ وى (سلاڤێت خودێ لێ بن) هاتينه زانين، و يێ نڤێژا خۆ دورست نه‌كه‌ت دڤێت بۆ بێته دورستكرن.
مرۆڤه‌كى ل ده‌ف پێغه‌مبه‌رێ خۆشتڤى (سلاڤێت خودێ لێ بن) نڤێژا خۆ خه‌له‌ت كر، ئه‌مرێ وى كر دوباره بكه‌ته‌ڤه، هه‌روه‌سا كر جاره‌كا دى فه‌رمانا وى كر بكه‌ته‌ڤه هه‌تا گۆتيه پێغه‌مبه‌رێ خۆشتڤى (سلاڤێت خودێ لێ بن) ئه‌ز ژ ڤى ره‌نگى پێڤه‌تر نوزانم.. نيشا من بده، ئينا پێغه‌مبه‌رێ خۆشتڤى (سلاڤێت خودێ لێ بن) ئاوايێ دورست بۆ دياركر.
و من دڤێت ل ڤێرێ بێژم: ئه‌گه‌رێ سه‌ره‌كى يێ نه‌زانينا دايكا هه‌وه.. دايبابێت وێنه، ده‌مێ ئه‌و يا بچويك دايبابان خۆ پێڤه نه‌وه‌ستانديه و فه‌رمانا پێغه‌مبه‌رێ خۆشتڤى (سلاڤێت خودێ لێ بن) ب دورستاهي ب جه نه‌ئينايه ده‌مێ دبێژيت: ((فه‌رمان و ئه‌مرێ بچويكێت خۆ ب كرنا نڤێژان بكه‌ن، و ئه‌و حه‌فت سالى، و سه‌را نه‌كرنا نڤێژان بقوتن و ئه‌و ده‌ه سالى، و جهێت وان ژێك جوداكه‌ن)). يان ده‌مێ دبێژيت: ((حه‌فت ساليێ نڤێژێ نيشا بچويكى بده‌ن))، و هه‌كه وان ئه‌ڤ فه‌رمانه ب جه ئينابا دا فێربيتێ، و ئه‌ڤرۆ ل به‌ر ب زه‌حمه‌ت نه‌دبوو، دگه‌ل هندێ ژى نڤێژێت وێ دورستن هه‌كه ئه‌و شيانێت خۆ هه‌ميان بمه‌زێخيت، به‌لێ هه‌ر هندێ پێڤه‌تر ژێ نوزانيت، خودايێ مه‌زن دبێژيت:((لَا يُكَلِّفُ اللَّهُ نَفْسًا إِلَّا وُسْعَهَا)) خودێ هه‌ركه‌سه‌كى ژ بارێ وى زێده‌تر لێ ناگريت، به‌لێ دڤێت ئه‌و ئيمامه‌تيا كه‌سێ نه‌كه‌ت يێت وه‌كى وێ نه‌بن و خودێ چێتر دزانيت.
