ب / پێدڤيه مرۆڤى زێده ئاگه‌ه ژ ده‌ڤ و ئه‌زمانێ خۆ هه‌بيت، چونكى باراپتر خه‌لكێ جه‌هنه‌مێ ژ ئه‌گه‌را ئه‌زمانى جه‌هنه‌مينه و دچنه جه‌هنه‌مێ، هه‌روه‌كى ئه‌ڤه ئاشكرايى د حه‌ديسا مه‌عازيدا هاتى خودێ ژێ رازى بيت) دبێژيت: من گۆت: يا پێغه‌مبه‌رێ خودێ، كاره‌كى بۆ من بێژه من ببه‌ته به‌حه‌شتێ، و من ژ ئاگرى دوير بێخيت، گۆت: ((ته پسيارا تشته‌كێ مه‌زن كر، و ئه‌و يا ب ساناهيه، بۆ وى يێ خودايێ مه‌زن ل سه‌ر ساناهى كربيت: تو خودێ بپه‌رێسى و چو شريك و هه‌ڤكويفان بۆ چێنه‌كه‌ى، نڤێژان ب ره‌نگێ پێدڤى و به‌رده‌وام بكه‌ى، و زكاتێ بده‌ى، ره‌مه‌زانێ بگرى، و بچيه حه‌جێ هه‌كه ته پێ چێبيت))، پاشى گۆت: ((ئه‌ز ده‌رگه‌هێت خێرێ نيشا ته نه‌ده‌م؟ رۆژى پارێزه‌ره (ژ ئاگرى و گونه‌هان) و سه‌ده‌قه شوينوارێت گونه‌هێ ژێ دبه‌ت هه‌روه‌كى ئاڤ ئاگرى دڤه‌مرينيت، و نڤێژا مرۆڤى نيڤا شه‌ڤێ)). پاشى ئه‌ڤ ئايه‌ته خواند ((تَتَجَافَىٰ جُنُوبُهُمْ عَنِ الْمَضَاجِعِ يَدْعُونَ رَبَّهُمْ خَوْفًا وَطَمَعًا وَمِمَّا رَزَقْنَاهُمْ يُنفِقُونَ ))((فَلَا تَعْلَمُ نَفْسٌ مَّا أُخْفِيَ لَهُم مِّن قُرَّةِ أَعْيُنٍ جَزَاءً بِمَا كَانُوا يَعْمَلُونَ))(( أَفَمَن كَانَ مُؤْمِنًا كَمَن كَانَ فَاسِقًا لَّا يَسْتَوُونَ))((أَمَّا الَّذِينَ آمَنُوا وَعَمِلُوا الصَّالِحَاتِ فَلَهُمْ جَنَّاتُ الْمَأْوَىٰ نُزُلًا بِمَا كَانُوا يَعْمَلُونَ)) ( قه‌وى ته‌نشتێت وان ناكه‌ڤنه سه‌ر نڤينان [ئانكو: كێم دنڤن، و رادبن شه‌ڤنڤێژان دكه‌ن] و ب ترس و هيڤيڤه دوعايان ژ خودێ دكه‌ن، و رزقێ مه دايه وان خێر و سه‌ده‌قه‌يان ژێ دده‌ن. كه‌س نوزانيت چ خه‌لات يێ بۆ وان هاتيه ڤه‌شارتن، چاڤێت وان پێ رۆن ببن و ب ديتنا وى شاد ببن، ژبه‌ر وان كار و كريارێت وان دكرن ). پاشى گۆت: ((ئه‌رێ ئه‌ز سه‌رێ كارى و ستوينا وى و گوپيتكا وى بۆ ته نه‌بێژم؟)) من گۆت: به‌لێ يا پێغه‌مبه‌رێ خودێ، گۆت: ((سه‌رێ كارى ئيسلامه، و ستوينا وى نڤێژه، و گوپيتكا وى جيهاده))، پاشى گۆت: ((يا ئه‌ڤه هه‌مى پێڤه رادبيت بۆ ته نه‌بێژم؟)) من گۆت: به‌لێ يا پێغه‌مبه‌رێ خودێ. ئه‌زمانێ خۆ گرت و گۆت: ((ئه‌ڤى به‌سكه))، من گۆت: يا پێغه‌مبه‌رێ خودێ.. ما دێ ل مه هێته گرتن ل سه‌ر ئاخفتنا ئه‌م دئاخڤين؟ گۆت: ((تو ژ دايكا خۆ به‌رزه‌ببى (نفرينه، به‌لێ مه‌خسه‌د پێ نه‌نفرينه، به‌لكى مه‌خسه‌د پێ تۆره‌ئێخستنا ويه و گوهشينه چاوا ڤێ پسيارێ دكه‌ت) ما تو هزره‌كا دى دكه‌ى نه يا مه گۆتى، ما چ خه‌لكى سه‌ر سه‌ر و چاڤان دهاڤێژيته د جه‌هنه‌مێدا ئه‌نجام و دورينا ئه‌زمانێ وان نه‌بيت)) (ئانكو ئه‌و نه‌بيت يا ئه‌زمان دبێژيت).
و پێدڤيه مرۆڤ زێده هزرا خۆ د ئاخفتنا خۆدا بكه‌ت و سڤك نه‌وه‌رگريت، چونكى دبيت ئاخفتنه‌كێ دێ بێژيت ئه‌و ئاخفتن دێ وى راكێشته جه‌هنه‌مێ، دگه‌ل كو ده‌مێ وى گۆتى چو بۆ نه‌دانابوو و ب چوڤه نه‌گرتبوو، به‌لێ ل ده‌ف خودێ يا مه‌زن بوو.
پێغه‌مبه‌رێ خودێ (سلاڤێت خودێ لێ بن) دبێژيت: ((ب راستى به‌نده يێ هه‌ى ئاخفتنه‌كێ د رازيبوونا خودايێ مه‌زندا دئاخڤيت، هزرا خۆ تێدا ناكه‌ت خودێ ده‌ره‌جه‌يان پێ بلندكه‌ت، و ب راستى به‌نده يێ هه‌ى ئاخفتنه‌كێ د نه‌رازيبوونا خودايێ مه‌زندا دئاخڤيت، هزرا خۆ تێدا ناكه‌ت خودێ دێ پێ ئێخيته د جه‌هنه‌مێدا)). ديسا (سلاڤێت خودێ لێ بن) دبێژيت: ((ب راستى به‌نده يێ هه‌ى ئاخفتنه‌كێ دئاخڤيت، و هزرا خۆ تێدا ناكه‌ت (كا خێره ئان نه) وى دئێخيته د ئاگريدا دويرتر ژ ناڤبه‌را رۆژهه‌لات و رۆژئاڤايێ)). ديسا پێغه‌مبه‌رێ خودێ (سلاڤێت خودێ لێ بن) دبێژيت: ((هه‌ركه‌سێ ده‌مانێ ب پاراستنا مابه‌ينا هه‌ردوو پيێت خۆ (مه‌خسه‌د پێ ده‌ڤ و ئه‌زمانه، نه‌حرام ب ده‌ڤى بێته خارن و نه خرابى ب ئه‌زمانى بێته گۆتن) و مابه‌ينا هه‌ردوو پێت خۆ بده‌ته من ئه‌ز دێ ده‌مانێ ب به‌حه‌شتێ ده‌مێ)). ديسا پێغه‌مبه‌رێ خودێ (سلاڤێت خودێ لێ بن) دبێژيت: ((ب راستى به‌نده يێ هه‌ى ئاخفتنه‌كێ د رازيبوونا خودايێ مه‌زندا دئاخڤيت، هزر نه‌دكر دێ گه‌هيته جهێ گه‌هشتيێ، خودێ رازيبوونا خۆ دێ بۆ پێ نڤێسيت هه‌تا رۆژا دگه‌هيتێ، و ب راستى به‌نده يێ هه‌ى ئاخفتنه‌كێ د نه‌رازيبوونا خودايێ مه‌زندا دئاخڤيت، هزر نه‌دكر دێ گه‌هيته جهێ گه‌هشتيێ، خودێ نه‌رازيبوونا خۆ دێ بۆ پێ نڤێسيت هه‌تا رۆژا دگه‌هيتێ)).
ژبه‌ر ڤان حه‌ديسێت بۆرى دڤێت خودانێت ڤان ئاخفتان زێده ژ خۆ بترسن ئاخفتنا وان.. وان بكێشيته ڤان ئه‌نجامێت مه‌ترسيدار، ئه‌ڤه هه‌كه چو د دلێ واندا نه‌بيت و مه‌خسه‌دا وان نه ئه‌و بيت ترانا بۆ خۆ ب رێ و ره‌سم و شه‌عائيرێت ئيسلامێ بكه‌ن، هه‌كه ئنيه‌تا وان پێ ئه‌ڤه بيت هێژ ئه‌ڤ كاره مه‌ترسيدارتره، چونكى دبيت پێ كافر و گاور ببن و ترانه پێكرن ب شه‌ريعه‌ت و فه‌رمان و رێ و ره‌سمێت ئيسلامێ كار و ساخله‌تێ دوروى و مونافقانه، و پشتى ترانێت خۆ هه‌كه تو بێژيێ مه‌خسه‌دا هه‌وه ب ڤان ترانان چيه؟ دێ بێژن: مه‌خسه‌دا مه به‌س ترانه و يارينه، به‌لێ خودايێ مه‌زن دبێژيته مه: بێژه وان ئه‌رێ هوين بۆ خۆ ترانان ب خودێ و ئايه‌ت و پێغه‌مبه‌رێ وى دكه‌ن. و قورئان د راستا واندا دبێژيت: ((وَلَئِن سَأَلْتَهُمْ لَيَقُولُنَّ إِنَّمَا كُنَّا نَخُوضُ وَنَلْعَبُ قُلْ أَبِاللَّهِ وَآيَاتِهِ وَرَسُولِهِ كُنتُمْ تَسْتَهْزِئُونَ )) ئانكو: و ئه‌گه‌ر تو پسيارا وان بكه‌ى ژ وى تشتێ وان گۆتى و ترانێت وان كرين، دێ سويند خۆن و بێژن: مه به‌س ترانه د ناڤبه‌را خۆدا دكرن و به‌س ئاخفتن بوو، و مه چو مه‌خسه‌د پێ نه‌بوون. بێژه: ئه‌رێ هه‌وه ترانه ب خودێ و ئايه‌تێت وى و پێغه‌مبه‌رێ وى دكرن؟! هه‌ى موحه‌ممه‌د بێژه دورويان: مهانه و هه‌جه‌تان نه‌گرن (عوزران نه‌خوازن) ژ هه‌وه نائێنه وه‌رگرتن، ب راستى هوين گاوربوون پشتى هه‌وه باوه‌رى ئينايى و خودێ چێتر دزانيت.
