ب / دبێژنێ: نڤێژا درێژ، يان نڤێژا ته‌سبيحا ژبه‌ركو يا درێژه و گه‌له‌ك ته‌سبيح (سبحان الله) تێدا دهێته گۆتن، سێ سه‌د جاران د دوو ركاعه‌تاندا و شه‌ش سه‌د جاران د چار ركاعه‌تاندا دهێته گۆتن ژبه‌ر هندێ دبێژنێ نڤێژا ته‌سبيحا يان ته‌سابيحا.
و ل سه‌ر دورستيا وێ زانا تێدا يێت ژێك جودا بووين، هنده‌كان يا دورستكرى و هنده‌كان دورست نه‌كريه، ئه‌ڤێت دورست كرين ئه‌ڤه‌نه: حافز ئه‌بو به‌كرێ ئاجرى و عه‌بدولره‌حيمێ مسرى و حافزێ مه‌قدسى و عه‌بدوللايێ كورێ موباره‌كى و حافز ئبن مه‌نده و سه‌معانى و حافزێ مونزرى و ئبن سه‌لاحێ شه‌هره‌زورى و نه‌وه‌وى خودآ ژ هه‌ميان رازى بيت. و يێت دورست نه‌كرين ئه‌ڤه‌نه: عه‌قيلى(خودێ ژێ رازى بيت)، و دبێژيت: چو حه‌ديسێت دورست ل سه‌ر ڤێ نڤێژێ نه‌هاتينه، ديسا ئبن ئه‌لعه‌ره‌بى ژ(خودێ ژێ رازى بيت)، هه‌ر وه‌دبێژيت و به‌لكى دبێژيت: نه يێت دورست نه يێت باش، ئانكو: حه‌سه‌ن، و دبێژيت: هه‌مى رێكێت حه‌ديسا نڤێژا ته‌سبيحا يێت له‌وازن و ژ زانايێت ئه‌ڤ نڤێژ و حه‌ديسا وێ له‌واز داناين ئبن ته‌يميه و شاگردێ وى ئبن قه‌يم و حافزێ مزى خودآ ژ هه‌ميان رازى بيت و حافز ئبن حه‌جه‌ر(خودێ ژێ رازى بيت)، جاره‌كێ حه‌سه‌ن دانايه و جاره‌كێ له‌واز دانايه و ئبن جوزى(خودێ ژێ رازى بيت)، ژ مه‌وزوعاتان يێت دره‌و دانايه.
ئه‌ز ب خۆ پتر يێ دگه‌ل بۆچۆنا ڤان، و هژمارا ركاعه‌تێت وێ چارن هه‌كه ب رۆژ هاته‌كرن يا باش ئه‌وه پێكڤه بێته‌كرن، و هه‌كه ب شه‌ڤ هاته‌كرن جودا بێته‌كرن، دوو ركاعه‌ت دوو ركاعه‌ت و ب ڤى ره‌نگى دهێته‌كرن: پشتى فاتحێ پازده جاران دێ بێژى: (سبحان الله والحمد لله ولا إله إلا الله والله أكبر) پاشى دێ چيه ركوعێ و ده‌هـ جاران هه‌ر دێ وێ بێژى، و پاشى دێ ژ ركوعێ رابى و ده‌هـ جاران هه‌ر دێ وێ بێژى، پاشى دێ چيه سوجدێ و ده‌هـ جاران هه‌ر دێ وێ بێژى، پاشى دێ ژ سوجدێ رابى و ده‌هـ جاران هه‌ر دێ وێ بێژى، پاشى دێ چيه سوجدێ و ده‌هـ جاران هه‌ر دێ وێ بێژى، پاشى دێ ژ سوجدێ رابى و ده‌هـ جاران هه‌ر دێ وێ بێژى، ئه‌ڤه هه‌ر ركاعه‌ته‌كێ بوونه حه‌فتێ و پێنج جار، و هۆسا هه‌ر ركاعه‌ته‌كێ حه‌فتێ و پێنج جاران دێ بێژى: (سبحان الله والحمد لله ولا إله إلا الله والله أكبر) هۆسا هه‌ر دوو ركاعه‌تان سێ سه‌د جاران دێ ڤى زكرى كه‌ى و چار ركاعه‌تان شه‌ش سه‌د جاران.
ئه‌ز كه‌سێ پال ناده‌م ڤێ نڤێژێ بكه‌ت، چونكى هه‌روه‌كى زانايان گۆتى: هه‌مى رێكێت ڤێ حه‌ديسێ د له‌وازن، و ژبلى ڤێ ب ئه‌زموون و ب سه‌ربۆر هندى من ديتى خه‌لكى كرى هند نه‌ماينه ب نڤێژێڤه و خوشوع و ترسا نڤێژێ هندى ماينه ب هه‌ژمارا وى زكرێ تێدا دهێته گۆتن، و هه‌كه خشوع و ترس بۆ مرۆڤى تێدا چێنه‌بيت مرۆڤ سونه‌تێت دى بۆ خۆ بكه‌ت و قورئانێ زێده تێدا بخوينيت و سوجدێت خۆ ب دوعا تێدا درێژكه‌ت باشتره، و هه‌كه ئێكى ڤيا بكه‌ت ژى دڤێت نه‌رازيبوونى بۆ نه‌هێته ئاشكراكرن، چونكى هه‌كه هنده‌كان دورست نه‌كربيت.. گه‌له‌كێت دى يا دورستكرى، ژ وان: ميرێ موسلمانا د حه‌ديسێدا عه‌بدوللايێ كورێ موباره‌كى، و نه‌به‌س دورست كر، به‌لكى ژێ هاتيه زانين ئه‌ڤ نڤێژه دكر و داخوازا كرنا وێ ژى دكر، و ژ زانايێت سه‌رده‌م يێت ئه‌ڤ حه‌ديسه دورست داناى زانايێ ناڤدار ئه‌لبانى خودێ ژێ رازى بيت) و خودێ چێتر دزانيت.
