ب / ته‌عووز، ئانكو: خۆ دانه پاراستن ب خودێ ژ شه‌يتانى، به‌س دێ كه‌ڤيته به‌رى خواندنا فاتحێ، دێ بێژي: (اعوذ بالله من الشيطان الرجيم) و پاشى (بِسْمِ اللَّهِ الرَّحْمَنِ الرَّحِيمِ) و پاشى دێ ده‌ست ب خواندنا فاتحێ كه‌ى و هه‌ر سۆره‌ته‌كا دى د ركاعه‌تا ئێكێ و دووێدا به‌س دێ به‌سمه‌لێ كه‌ى و بێژى: (بِسْمِ اللَّهِ الرَّحْمَنِ الرَّحِيمِ) و ته‌عووزێ ژى به‌س دێ د ركاعه‌تا ئێكێدا بێژى و تو دوباره ناكه‌يه‌ڤه د هه‌مى ركاعه‌تاندا، و هه‌كه نه‌بێژى چو نينه و قوسيرى ناگه‌هيته نڤێژا ته، چونكى ته‌عه‌ووز ل ده‌ف هه‌مى زانايان ـ مالكى نه‌بيت(خودێ ژێ رازى بيت)، ـ سونه‌ته و نه‌واجبه، به‌لێ به‌سمه‌له دگه‌ل فاتحێ جهێ ئيختلافێيه، ل ده‌ف ئيمامێ شافعى(خودێ ژێ رازى بيت)، ئايه‌ته‌كه ژ فاتحێ دڤێت بێته خواندن، و زانايێت دى دبێژن: سونه‌ته نه‌واجبه، هاته خواندن باشه و نه‌هاته خواندن كێماسى نينه چو كارلێكرن ل نڤێژێ ناهێته‌كرن و خودێ چێتر دزانيت.
