ب / ئه‌ڤێ دلێ وى ب مزگه‌فتێڤه گرێداى بلا كه‌يفا وى ب سيبه‌را عه‌رشێ خودێ خۆش ببيت، دێ ژ وان بيت يێت رۆژا قيامه‌تێ دكه‌ڤنه بن سيبه‌را عه‌رشێ وى، و ديسا يێ ئنيه‌تا خێرێ ئينا و دلێ خۆ ئێخسته سه‌ر خێرێ، بلا دلێ وى خۆش ببيت خۆ هه‌كه نه‌شيابيت وێ خێرێ بكه‌ت ژى، چونكى پێغه‌مبه‌رێ خۆشتڤى (سلاڤێت خودێ لێ بن) دبێژيت: ((ب راستى هه‌مى كار و كريار ب ئنيه‌تانه)). ديسا دبێژيت: ((ب راستى خودايێ مه‌زن خێر و گونه‌ه يێت داين (يان ئه‌مرێ ملياكه‌تان يێ كرى بنڤێسن، يان بۆ ملياكه‌تان يێت ئاشكراكرين كا خێر و گونه‌هان چاوا بنڤێسن) ڤێجا هه‌ركه‌سێ بكه‌ته دلێ خۆ خێره‌كێ بكه‌ت و نه‌كه‌ت، خودێ خێره‌كا تمام بۆ وى ل ده‌ف خۆ دێ نڤێسيت، و هه‌كه كره دلێ خۆ و كر ژى، خودێ دێ بۆ ده‌ه خێران نڤێسيت، هه‌تا حه‌فت سه‌د قاتان و حه‌تا گه‌له‌ك قـــــاتـــان)).
ڤێجا ماده‌م دلێ ڤێ خويشكێ ل سه‌ر خێرێيه.. خێر دێ بۆ هێته نڤێسين ـ بكه‌ت يان نه‌كه‌ت ـ، هه‌كه كره دلێ خۆ و نه‌كر خێره‌ك دێ بۆ هێته نڤێسين، و هه‌كه كر.. ده‌ه خێر دێ بۆ هێنه نڤێسين هه‌تا حه‌فسه‌د قاتان و پتر، و نه‌يا دورسته ژن ژ مزگه‌فتێ بێته ڤه‌گرتن و بۆ كه‌سێ نينه نه‌دايك، نه‌باب و نه‌زه‌لامێ ژنێ ژ مزگه‌فتێ ڤه‌گريت هه‌كه ژنێ ڤيا بچيته مزگه‌فتێ، نه‌خاسمه هه‌كه رێكا ئێمن بيت، ب راستى جهێ نه‌خۆشيێيه ئه‌ڤرۆ رێكا ژنێ يا ڤه‌كرى بيت بۆ هه‌مى جهان ـ سويكێ و دائيرێ و سه‌يرانێ و ده‌واتا تێكه‌ل و جڤينێت تێكه‌ل و ئاهه‌نگێت تێكه‌ل ـ به‌لێ رێكا وێ يا گرتى بيت بۆ مالا خودێ و مزگه‌فتێ، ئه‌ڤه كاره‌كێ نه‌يێ جوانه و نه‌يێ شه‌رعيه و خودێ چێتر دزانيت.
