ب / پێدڤيه ئه‌م بزانين ئيسلام دينه‌كێ ب ساناهيه و چو تشتێ گران تێدا نينه و ئه‌و شه‌نگستێت ئێخستينه تێدا دڤێت موسلمان پێ رابيت ئه‌وێت ئيسلام ل سه‌ر هاتيه ئاڤاكرن، هه‌كه مرۆڤ كه‌فته د كراسه‌كێ نه‌يێ ئاساييدا ئه‌ڤ روكن و شه‌نگسته ل سه‌ر سڤك دبن ب ره‌نگه‌كێ وه‌سا د شيانێت ويدا بيت پێ راببيت، چونكى خودێ ل مه ناگريت ل سه‌ر وى تشتێ نه د شيانێت مه‌دا، و دبيت هنده كاودان و وه‌خت دێ ب سه‌ر مرۆڤيدا هێن نه‌شێت تێدا پارێزيێ ل سه‌ر نڤێژێ بكه‌ت د وه‌ختێ وێدا، وه‌كى: سه‌فه‌رێ و نه‌خۆشيێ و بارانه‌كا دژوار و سه‌رمايه‌كا گران، هنگى بۆ وى دورسته نڤێژێت خۆ كۆمكه‌ت و جه‌مع بكه‌ت بێى كورتكرن د ناڤبه‌را نيڤرۆ و ئێڤاريدا و مه‌غره‌ب و عه‌يشادا، چ پێشكه‌فتن چ پاشكه‌فتن. به‌لێ حه‌ديسا دورست يا هاتى د موسلميدا و ده‌ف خودانێت سونه‌ناندا پێغه‌مبه‌رێ خۆشتڤى (سلاڤێت خودێ لێ بن) نڤێژا ل مه‌دينێ كۆمكرى د ناڤبه‌را نيڤرۆ و ئێڤاريدا و مه‌غره‌ب و عه‌يشادا نه ژ ترسێ و نه ژ بارانێ.
ل ڤێرێ گه‌له‌ك زانا ژ وان: ئبن سيرين و ئه‌شهه‌ب ژ مه‌زهه‌بێ مالكى، قه‌فال و شاشى ژ شافعيان خودآ ژ وان رازى بيت دبێژن: دورسته مرۆڤ ل مالا خۆ نڤێژان كۆمكه‌ت، به‌لێ هه‌كه هه‌وجه‌يه‌ك بخوازيتێ و بۆ خۆ نه‌كه‌ته عه‌ده‌ت، چونكى ژ حه‌ديسا ئبن عه‌باسى دهێته زانين: مه‌خسه‌د ژ كارێ پێغه‌مبه‌رێ خودێ (سلاڤێت خودێ لێ بن) ئه‌و بوو زه‌حمه‌تێ ل سه‌ر موسلمانا راكه‌ت و نه‌هێليت، سه‌عيد كورآ جوبه‌يرى(خودێ ژێ رازى بيت)، دبێژيت: من گۆته ئبن عه‌باسى بۆچى پێغه‌مبه‌رێ خودێ (سلاڤێت خودێ لێ بن) ئه‌و كار كر؟ گۆت: ڤيا كه‌سه‌ك ژ ئوممه‌تا وى زه‌حمه‌تێ نه‌بينيت و خودێ چێتر دزانيت.
