ب / دورستكرنا رێزان و گه‌هاندنا پێ و ملان د نڤێژا ب جه‌ماعه‌تدا نه‌يا تايبه‌ته ب زه‌لامانڤه، و هه‌ركه‌سێ چۆ د نڤێژا جه‌ماعه‌تدا دڤێت ڤان ئاره‌سته‌يان به‌رچاڤ وه‌رگريت، چونكى ئه‌ڤه ئاراسته‌يێت پێغه‌مبه‌راتيێنه، و ده‌مێ پێغه‌مبه‌رى (سلاڤێت خودێ لێ بن) ئه‌مرێ موسلمانان دكر رێزێت خۆ راستكه‌ن و بگه‌هيننه ئێك، ئه‌ڤ ئه‌مره نه ژ زه‌لامان تنێ دگرت، به‌لكى ئاراسته‌ى ژن و زه‌لامان بوو، و ب راستى پێغه‌مبه‌رێ خودێ (سلاڤێت خودێ لێ بن) گرنگيه‌كا مه‌زن يا دايه راستكرنا رێزان د نڤێژێدا و گه‌له‌ك جاران ب ده‌ستێ خۆ رێز راستكرن و ده‌ست ب نڤێژێ نه‌دكر هه‌تا زانيبا موسلمانان رێزا خۆ راستكر پاشى ده‌ست ب نڤێژێ دكر، و رێز راستكرن ژ تماميا نڤێژێ دانايه.
جابرێ كورێ سه‌موره‌ى، خودێ ژ هه‌ردوويان رازى بيت، دبێژيت: پێغه‌مبه‌رێ خودێ (سلاڤێت خودێ لێ بن) هاته ده‌ف مه و گۆت: ((ئه‌رێ هوين رێزێت خۆ راست ناكه‌ن هه‌روه‌كى ملياكه‌ت رێزێت خۆ ل ده‌ف خودايێ خۆ راست دكه‌ن؟)) مه گۆت: يا پێغه‌مبه‌رێ خودێ و ملياكه‌ت چاوا رێزێت خۆ ل ده‌ف خودايێ خۆ راست دكه‌ن؟ گۆت: ((رێزا ئێكێ تمام دكه‌ن و رێزێ دگه‌هيننه ئێك)).
د يسسا پێغه‌مبه‌رێ خودێ (سلاڤێت خودێ لێ بن) د نڤێژه‌كێدا ديت هنده‌ك ڤه‌مان، ئينا گۆته وان: ((پێشڤه وه‌رن، و پشت من راوه‌ستن و يێت پشت هه‌وه بلا پشت هه‌وه راوه‌ستن، و به‌رده‌وام هنده‌ك خۆ ڤه‌دهێلن هه‌تا خودێ وان ڤه‌دهێليت)). و ئبن مه‌سعوود خودێ ژێ رازى بيت) دبێژيت: پێغه‌مبه‌رێ خودێ (سلاڤێت خودێ لێ بن) ملێت مه د نڤێژێدا راست دكرن و دگۆت: ((رێزێت خۆ راستكه‌ن و پێش ئێك و دوو نه‌كه‌ڤن، دێ دلێت هه‌وه به‌رێك چن، بلا يێت خودان عه‌قل و بالق (يان يێت خودان قه‌در) ژ هه‌وه نێزيكى من بن، پاشى يێت نێزيكى وان (د سالۆخێ بۆريدا) پاشى يێت نێزيكى وان)).
و ئه‌نه‌س خودێ ژێ رازى بيت) دبێژيت: پێغه‌مبه‌رى (سلاڤێت خودێ لێ بن) دگۆت: ((رێزێت خۆ راستكه‌ن، ب راستى راستكرنا رێزان ژ تماميا نڤێژێيه)). و د ريوايه‌تا بوخاريدا: ((ب راستى راستكرنا رێزان ژ كرن و پاراستنا نڤێژێيه)). و ده‌مێ قامه‌ت بۆ نڤێژێ هاته گرتن، پێغه‌مبه‌رێ خودێ (سلاڤێت خودێ لێ بن) به‌رێ خۆ دا مه و گۆت: ((رێزێت خۆ دورستكه‌ن و خۆ بگه‌هيننه ئێك، ب راستى ئه‌ز هه‌وه پشت خۆرا دبينم)). و د بوخاريێدا هاتيه، ئه‌نه‌سى دگۆت: و ئێكى ژ مه ملێ خۆ ب ملێ هه‌ڤالێ خۆ و پێ خۆ ب پێ وى ڤه‌نا. و نه‌عمانێ كورێ به‌شيرى خودێ ژێ رازى بيت) دبێژيت: پێغه‌مبه‌رێ خودێ (سلاڤێت خودێ لێ بن) دگۆته مه: ((يان هوين دێ رێزێت خۆ راستكه‌ن يان ب سويند خودێ دێ دلێت هه‌وه ژ به‌رێك به‌ت)). و ديسا دبێژيت: پێغه‌مبه‌رێ خودێ (سلاڤێت خودێ لێ بن) به‌رده‌وام رێزێت مه راست دكرن هه‌تا دا تو بێژى تيران پێ راست دكه‌ت، هه‌تا ديتى ئه‌م تێگه‌هشتين، پاشى رۆژه‌كێ پێشكه‌فت، رابوو هه‌تا نێزيك بووى ده‌ست ب نڤێژێ بكه‌ت زه‌لامه‌ك ديت سينگێ وى ديار ببوو، ئينا گۆت: ((به‌نده‌يێت خودێ ب سويند هوين دێ رێزێت خۆ راستكه‌ن، يان ب سويند خودێ دێ دلێت هه‌وه ژ به‌رێك به‌ت)).
و به‌رائێ كورێ عازبى خودێ ژ هه‌ردوويان رازى بيت، دبێژيت: پێغه‌مبه‌رێ خودێ (سلاڤێت خودێ لێ بن) سينگێت مه و ملێت مه د نڤێژێدا راست دكرن و دگۆت: ((رێزێت خۆ راستكه‌ن و پێش ئێك و دوو نه‌كه‌ڤن دێ دلێت هه‌وه ژ به‌رێك چن))، و دگۆت: ب راستى خودێ و ملياكه‌تێت وى سه‌له‌واتان دده‌نه سه‌ر رێزێت ئێكێ)). (و سه‌له‌وات ژ خودێ، دلۆڤانيه؛ و ژ ملياكه‌تان، دوعانه). و ئبن عومه‌رى خودێ ژ هه‌ردوويان رازى بيت، دبێژيت: پێغه‌مبه‌رێ خودێ (سلاڤێت خودێ لێ بن) گۆت: ((رێزان دورستكه‌ن، و ملان بگه‌هيننه ئێك و كێماتيان بگرن، و خۆ د ده‌ستێت برايێت خۆدا نه‌رم بكه‌ن (هه‌كه ڤيان هه‌وه بكێشن يان پاشڤه ببه‌ن بۆ دورستكرنا رێزێ) و كێماسيان بۆ شه‌يتانى نه‌هێلن، يێ كێماتيا رێزه‌كێ بگريت خودێ دێ گه‌هينيته دلۆڤانيا خۆ و يێ كێماتيه‌كێ چێكه‌ت و رێزێ ببريت خودێ دێ وى ژ دلۆڤانيا خۆ بريت)).
و ئه‌نه‌س خودێ ژێ رازى بيت) دبێژيت: پێغه‌مبه‌رێ خودێ (سلاڤێت خودێ لێ بن) دبێژيت: ((رێزان بگه‌هيننه ئێك و نێزيكى ئێك بكه‌ن، و ستۆيان بكه‌ن ئێك سه‌مت، ئه‌ز ب وى كه‌مه يێ جانێ من د ده‌ستيدا ئه‌ز يێ شه‌يتانان دبينم ژ ده‌رفه‌ت و كێماتيا ده‌ردكه‌ڤن هه‌روه‌كى حه‌زه‌فن)). و حه‌زه‌ف: ره‌نگه‌كێ په‌زێ ره‌شه و يێ بچويكه ل يه‌مه‌نێ يێت هه‌ين و خودێ چێتر دزانيت.
