ب / هه‌مى زانا ل سه‌ر وێ بۆچۆنێنه كو ئه‌وێ نڤێژێ نه‌كه‌ت ژ بێ باوه‌رى (ئانكو: باوه‌رى ب كرنا نڤێژێ نه‌بيت) گاوره و ژ ئيسلامێ ده‌ردكەڤيت، و ئه‌ڤه نه‌جهێ ژێكجودابوونێ يه هه‌می بۆ ڤێ چه‌ندێ ئێكن.
به‌لێ هه‌كه باوه‌رى پێ هه‌بيت و ژ خه‌مسارى و بێخيره‌تى نه‌كه‌ت، ئه‌ها زانا د ده‌رهه‌قێ ڤێدا نه‌ئێكن.
بۆچۆنا ئێكێ: ل ده‌ف ئيمامێ ئه‌حمه‌د و ئيسحاقێ كورێ راهه‌وه‌يهى و نه‌خه‌عى و عه‌بدوللايێ كورێ موباره‌كى و ئه‌بو ئه‌يوبێ سه‌ختيانى و ئه‌بو داودێ ته‌يالسى و گه‌له‌كێت دى ئه‌و گاوره و دڤێت بێته كوشتن و نڤێژ ژى ل سه‌ر نائێته كرن و نائێته كفنكرن و ل گۆرستانا موسلمانان ژى نائێته ڤه‌شارتن.. و ئه‌ڤ بۆچۆنه ڤه‌دگه‌ريته ڤان سه‌حابان ژى (عمر بن الخطاب وعبد الله بن مسعود وعبد الله بن عباس ومعاذ بن جبل وعبدالرحمن بن عوف وأبو الدرداء وأبو هريره). و عه‌بدوللايێ كورێ شه‌قيقى، دبێژيت: (هه‌ڤال و هۆگرێت پێغه‌مبه‌رى، نه‌كرنا چو كاران نڤێژ نه‌بيت ب گاورى نه‌دديت. و گه‌له‌ك فه‌رمووده‌يێت پێغه‌مبه‌رى (سلاڤێت خودێ لێ بن) يێت به‌لگه ل سه‌ر ڤێ دئينن، ژ وان:
پێغه‌مبه‌ر (سلاڤێت خودێ لێ بن) دبێژيت: ((د ناڤبه‌را زه‌لامى و گاوريێدا هێلانا نڤێژێيه)).
ديسا (سلاڤێت خودێ لێ بن) دبێژيت: ((جوداكه‌رێ د ناڤبه‌را مه و واندا ـ گاوران ـ نڤێژه، ڤێجا هه‌چيێ بهێليت ب راستى ئه‌و گاور بوو)).
بۆچۆنا دووێ: گاور نابيت، به‌لێ ئه‌گه‌ر تۆبه نه‌كه‌ت و ل خۆ نه‌زڤريت، دێ ئێته كوشتن ژبۆ ژ گاوريێ دوير بكه‌ڤيت، به‌لێ دێ ئێته شويشتن و كفنكرن و نڤێژ دێ ل سه‌ر ئێته‌كرن و دێ ئێته ڤه‌شارتن ژى، و ژ زانايێت بۆ ڤێ بۆچۆنێ چۆين: ئيمام مالك و ئيمامێ شافعيه خودێ ژ هه‌ردوويان رازى بيت.
بۆچۆنا سيێ: ئه‌بو حه‌نيفه، دبێژيت: (نائێته كوشتن، به‌لێ دێ ئێته زيندانكرن و ئێشاندن هه‌تا تۆبه دكه‌ت و نڤێژا دكه‌ت، و نه‌گاوره به‌لێ فاسقه). ژ ڤێرێ ديار دبيت دڤێت سستی د نڤێژێ دا نه‌هێته‌كرن ونه‌هێته هێلان، چونكی حوكمێ ژ هه‌ميان سڤكتر، نه‌نڤێژكه‌ر فاسقه و دڤێت بێته زيندانكرن هه‌تا تۆبه دكه‌ت و خودێ چێتر دزانيت.
