ب / بێگۆمان ئه‌ڤ دايبابه گونه‌هكارن، چونكى ئه‌و هۆسا، بێ ئه‌مريا خودێ دكه‌ن، پاشى پێغه‌مبه‌رێ وى، خودايێ مه‌زن ئه‌مرێ دايبابان دكه‌ت دبێژيت:((وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا لَا نَسْأَلُكَ رِزْقًا نَّحْنُ نَرْزُقُكَ وَالْعَاقِبَةُ لِلتَّقْوَىٰ)) ئانكو: ئه‌مرێ مالا خۆ ب نڤێژێ بكه، و تو ژى ل سه‌ر يێ به‌رده‌وام به. و ده‌مێ ئه‌و سستيێ د ڤى واجبيدا دكه‌ت ئه‌ڤه وى بێ ئه‌مريا خودايێ خۆ كر، ڤێجا بلا ئاگه‌ه ژ خۆ هه‌بن و نه‌كه‌ڤنه د ڤێ بێ ئه‌مريا مه‌زندا.
ديسا ئه‌مر دكه‌ت دبێژيت: ((يا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَارًا)) ئانكو: گه‌لى خودان باوه‌ران خۆ و مالێت خۆ ژ ئاگرى بپارێزن. ڤێجا يێ خودان باوه‌ر بيت و خۆ خودان باوه‌ر بدانيت بلا بزانيت ئه‌ڤ ئايه‌ته ژ وى دگريت، و ئه‌مرێ وى دكه‌ت، خۆ و كه‌س و كارێت خۆ و به‌رى هه‌ميان زارۆكێت خۆ ژ ئاگرێ جه‌هنه‌مێ بپارێزن، و چاوا ئه‌ڤه دێ ب جه هێت؟ هه‌كه هه‌ر ژ وى ژيێ پێغه‌مبه‌رێ خۆشتڤى (سلاڤێت خودێ لێ بن) په‌روه‌رده‌كرن و فێركرن ده‌ستنيشانكرى ده‌ست پێ بكه‌ت و به‌رده‌واميێ ب ده‌ته ڤێ فێركرنێ هه‌تا بالغ دبيت، ده‌مێ بالغ دبيت ئه‌و ب خۆ ل سه‌ر وان فه‌رز و واجبان دآ يێ به‌رده‌وام بيت، و هه‌كه وى سستى د ڤى ئه‌ركيدا كر و وى ئه‌مانه‌ت نه‌پاراست و ب به‌رپسياريا خۆ نه‌رابوو، ئه‌ڤه ئه‌و گونه‌هه‌كا ديه دكه‌ت، به‌رزه‌كرنا ئه‌مانه‌تى يه.
پێغه‌مبه‌رێ خۆشتڤى (سلاڤێت خودێ لێ بن) دبێژيت: هوين هه‌مى چاڤدێر و پارێزه‌رن، و هوين هه‌مى به‌رپرسن ژ يێت ژێر چاڤدێريا هه‌وه، مير و سه‌رۆك چاڤدێر و پارێزه‌ره، و زه‌لام ل سه‌ر خه‌لكێ مالا خۆ چاڤدێر و پارێزه‌ره، ژن د مالا زه‌لامێ خۆ و بچويكێت ويدا چاڤدێر و پارێزه‌ره، ڤێجا هوين هه‌مى چاڤدێر و پارێزه‌رن، و هوين هه‌مى به‌رپرسن ژ يێت ژێر چاڤدێريا هه‌وه. گونه‌ها وان يا سيێ سه‌رپێچى و بێئه‌مريا پێغه‌مبه‌رێ خۆشتڤيه (سلاڤێت خودێ لێ بن) ده‌مێ فه‌رمانا وان دكه‌ت ئه‌و زارۆكێت خۆ فێرى نڤێژێ بكه‌ن و بێنا خۆ ل سه‌ر فره‌ه بكه‌ن و ل ڤى تخويبى نه‌راوه‌ستن، به‌لكى د زڤر بن دگه‌ل وان ل ژيێ ده‌هێ هه‌كه نڤێژ نه‌كرن، د ڤى بياڤيدا (سلاڤێت خودێ لێ بن)دبێژيت: ((فه‌رمانا بچويكێت خۆ ب كرنا نڤێژان بكه‌ن، و ئه‌و حه‌فت سالى، و سه‌را نه‌كرنا نڤێژان بقوتن و ئه‌و ده‌ه سالى، و جهێت وان ژێك جوداكه‌ن)). فه‌رمووده يا ئاشكه‌رايه فه‌رمانا دايبابان دكه‌ت فه‌رمانا زارۆكێت خۆ ب نڤێژان بكه‌ن ل ژيێ حه‌فت ساليێ، و ده‌ه ساليێ سه‌را نه‌كرنا نڤێژان بقوتن.
و د فه‌رمووده‌كا ديدا پێغه‌مبه‌رێ خۆشتڤى (سلاڤێت خودێ لێ بن) دبێژيت: حه‌فت ساليێ نڤێژێ نيشا بچويكى بده‌ن، و ده‌ه ساليێ ل سه‌ر نه‌كرنا نڤێژێ بقوتن. ژبه‌ر ئه‌ڤا بۆرى هه‌ميێ دڤێت دايباب ژ وێ رۆژێ بترسن ئه‌وا زارۆكێت وان به‌رسينگێت وان دگرن و دكێشنه دادگه‌ها خودايێ خۆ و دبێژنێ: مافێ مه ژ ڤان دايبابێت سته‌مكار چێكه، ئه‌وێت ب هه‌جه‌تا دلپێڤه‌بوونێ ئه‌م سه‌ربه‌ردايكرين و نڤێژ نيشا مه نه‌داين، و نڤێژ ب مه نه‌داينه كرن، هه‌تا باش ئه‌م كه‌فتينه داڤ و تۆرێت شه‌يتانى، ب ره‌نگه‌كێ وه‌سا، ئه‌م نه‌شياين خۆ ژێ قورتالكه‌ين، ئها هنگى ئه‌و دايبابێت سستى و بێخه‌مى كرين، و بێ ئه‌مريا خودێ و پێغه‌مبه‌رێ وى د راستا عه‌يالێ خۆدا كرين دێ چ به‌رسڤ و مه‌فه‌ر هه‌بيت و خودێ چێتر دزانيت.
