ب / راسته هه‌ر نڤێژه‌كێ وه‌ختێ خۆ يێ هه‌يى، نابيت به‌رى وه‌ختێ خۆ بێته‌كرن، و نابيت پشتى وه‌ختێ خۆ ژى ـ بێ عوزر ـ بێته‌كرن. خودايێ مه‌زن دبێژيت: (( إِنَّ الصَّلاَةَ كَانَتْ عَلَى الْمُؤْمِنِينَ كِتَاباً مَّوْقُوتاً )) ئانكو: ب راستى نڤێژ ل سه‌ر باوه‌ريداران ب وه‌ختێت ئاشكه‌را هاتيه نڤێسين:
نڤێژا سپێدێ: وه‌ختێ وێ ژ ده‌ركه‌فتنا سپێده‌يا دورسته (الفجر الصادق) ده‌مێ سپياتيا رۆژێ ل په‌رێ عه‌سمانى دهه‌لێت، و تاريا شه‌ڤێ هه‌لدچنيت، هه‌تا رۆژ ده‌ردكه‌ڤيت. هه‌چيێ گه‌هشت ركعه‌ته‌كێ به‌رى رۆژ بهه‌لێت بكه‌ت، ئه‌و گه‌هشته نڤێژێ.
نڤێژا نيڤرۆ: ده‌مێ رۆژ ل نيڤا عه‌سمانى به‌ر ب ره‌خێ ئاڤابوونێڤه خواردبيت، ده‌ست پێ دكه‌ت، و ئه‌گه‌ر سيبه‌را تشتى هندى خۆ لێ هات ـ ژبلى سيبه‌را خواركه‌فتنێ د نيڤا عه‌سمانيدا ـ ب دويماهيك دئێت. و هه‌ركه‌سێ گه‌هشت ركعه‌ته‌كێ د ڤى وه‌ختيدا بكه‌ت ئه‌و گه‌هشته نڤێژێ.
نڤێژا ئێڤارى: هنگى ده‌ست پێ دكه‌ت ده‌مێ سيبه‌ر هندى خۆ لێ دئێت ـ ژبلى سيبه‌را خواركه‌فتنێ د نيڤا عه‌سمانيدا ـ و دمينيت هه‌تا رۆژ ئاڤا دبيت، به‌لێ يا ب خێرتر ئه‌وه، گيرۆ نه‌كه‌ت هه‌تا رۆژ نێزيكى ئاڤابوونێ دبيت، و هه‌ركه‌سێ گه‌هشت ركعه‌ته‌كێ به‌رى رۆژ ئاڤا ببيت بكه‌ت، ئه‌و گه‌هشته نڤێژێ، و ئه‌ڤه‌يه ئه‌و نڤێژا ـ ل دويف گۆتنا پتريا زانايان ـ دبێژنێ نڤێژا ناڤنجى (الصلاه الوسطى).
نڤێژا مه‌غره‌ب: وه‌ختێ وێ ب ئاڤابوونا رۆژێ ده‌ست پێ دكه‌ت، و هندى سۆراتى ل ملێ رۆژئاڤايێ بمينيت نڤێژ دئێته‌كرن.
نڤێژا عه‌يشا: وه‌ختێ وێ ب دويماهيك هاتنا نڤێژا مه‌غره‌ب ده‌ست پێ دكه‌ت ده‌مێ سۆراتى به‌رزه دبيت و هه‌تا سپێده ده‌ردكه‌ڤيت دمينيت، و نڤێژا عه‌يشا سێ وه‌ختێت هه‌ين:
أ ـ وه‌ختێ ب خێرتر: ئه‌وه نڤێژ ب ئنيه‌ت، نه ب خه‌مسارى، بێته گيرۆكرن هه‌تا نيڤا شه‌ڤێ، ل دويف گۆتنا هنده‌ك زانايان، و هه‌تا سێكا ئێكێ ژ شه‌ڤێ ل دويف گۆتنا هنده‌كێت دى.
ب ـ وه‌ختێ دورست يێ نڤێژێ: ژ سه‌رێ ده‌ستپێكرنا وه‌ختى هه‌تا سێكا ئێكێ يا نيڤا وه‌ختى.
ج ـ وه‌ختێ نه‌چاريێ: ژ نيڤا شه‌ڤێ وێڤه هه‌تا سپێده دبيت.
و يا د جهێ خۆدايه تێبينيا هندێ بێته‌كرن، وه‌ختێت بۆرين وه‌ختێت هه‌ر پێنج نڤێژان بوون، ژ ده‌ستپێكا وان هه‌تا دويماهيكا وان، و پێدڤيه مرۆڤێ موسلمان بێ عوزر ب هه‌جه‌تا به‌رفره‌هيا وه‌ختى، چو نڤێژان پاش نه‌ئێخيته دويماهيكا وه‌ختى. چونكى دبيت ئه‌ڤ چه‌نده به‌رێ وى بده‌ته هندێ سستيێ تێدا بكه‌ت، يان وى بكێشيته هندێ بهێليت و هه‌ر نه‌كه‌ت، له‌وا سونه‌ته له‌ز ل نڤێژان بێته‌كرن و د ده‌ستپێكا وه‌ختێ واندا بێنه‌كرن، چونكى پسيارا باشترين كارى ژ پێغه‌مبه‌رى (سلاڤێت خودێ لێ بن) هاته‌كرن، گۆت: ((كرنا نڤێژێ د ده‌ستپێكا وه‌ختێ وێدا))، ديسا هه‌ركه‌سێ د وه‌ختێ نڤێژه‌كێدا بنڤيت يان كرنا وێ ژبير بكه‌ت، وه‌ختێ كرنا وێ هنگيه ده‌مێ هشيار دبيت يان دئێته بيرا وى.
ئه‌بو قه‌تاده(رضي الله عنه)، دبێژيت: پسيار ژ پێغه‌مبه‌رى (سلاڤێت خودێ لێ بن) هاته‌كرن كا چاوايه مرۆڤ د وه‌ختێ نڤێژێدا بنڤيت و هشيار نه‌بيت هه‌تا وه‌خت ب سه‌رڤه بچيت و ژێ ده‌ركه‌ڤيت؟ ئينا پێغه‌مبه‌رى (سلاڤێت خودێ لێ بنم) گۆت: ((چو ته‌خسيرى د نڤستنێدا نينه به‌لێ ته‌خسيرى د هشياريێدايه، و ئه‌گه‌ر ئێك ژ هه‌وه نڤێژا خۆ ژبيركر يان د وه‌ختێ وێدا نڤست، چ وه‌ختێ هاته بيرێ يان هشيار بوو بلا بكه‌ت)) و خودێ چێتر دزانيت.
