ب / پێدڤيه ئه‌م بزانين وه‌ختێ نڤێژان ب چڤه يێ گرێدايه، ئه‌ڤرۆ ب رێكا سه‌ربۆر و ته‌جروبه و كارزانيێ ئه‌م شياينه ب ده‌مژمێر و ب سه‌عه‌تێڤه گرێده‌ين و بێژين: سه‌عه‌ت هنده نڤێژا سپێدێيه، و هنده يا نيڤرۆيه، و هۆسا نڤێژێت دى ژى، هه‌كه د بنياتدا وه‌ختێ وان ب سه‌عه‌تانڤه د گرێداي نينن، به‌لێ ب حوكمێ سه‌ربۆران مه ب سه‌عه‌تانڤه گرێدان، له‌وا سه‌عه‌ت هه‌بن نه‌بن ئه‌م ب وه‌ختانڤه مه‌حتل نابين، و ئه‌م دشێين وه‌ختان ده‌ستنيشانكه‌ين، چونكى پێغه‌مبه‌رى (سلاڤێت خودێ لێ بن) بۆ مه يێت ئاشكراكرين، ڤێجا ل دويف وێ ئاشكراكرنێ نڤێژ نێزيك و دويرى ئێك ببن گرفت نينه.
خودايێ مه‌زن دبێژيت: (( إِنَّ الصَّلاَةَ كَانَتْ عَلَى الْمُؤْمِنِينَ كِتَاباً مَّوْقُوتاً )) ﭼ ئانكو: ب راستى نڤێژ ل سه‌ر باوه‌ريداران ب وه‌ختێت ئاشكه‌را هاتيه نڤێسين، و ئه‌و ده‌م ژى ب ڤى ره‌نگينه:
نڤێژا سپێدێ: وه‌ختێ وێ ژ ده‌ركه‌فتنا سپێده‌يا دورسته (الفجر الصادق) ده‌مێ سپياتيا رۆژێ ل په‌رێ عه‌سمانى دهه‌لێت و تاريا شه‌ڤێ هه‌لدچنيت هه‌تا رۆژ ده‌ردكه‌ڤيت. هه‌چيێ گه‌هشت ركاعه‌ته‌كێ به‌رى رۆژ بهه‌لێت بكه‌ت، ئه‌و گه‌هشته نڤێژێ.
نڤێژا نيڤرۆ: ده‌مێ رۆژ ل نيڤا عه‌سمانى به‌ر ب ره‌خێ ئاڤابوونێڤه خوار دبيت، ده‌ست پێ دكه‌ت، و ئه‌گه‌ر سيبه‌را تشتى هندى خۆ لێ هات ژبلى سيبه‌را خواركه‌فتنێ د نيڤا عه‌سمانيدا ب دويماهيك دئێت. و هه‌ركه‌سێ گه‌هشت ركاعه‌ته‌كێ د ڤى وه‌ختيدا بكه‌ت ئه‌و گه‌هشته نڤێژێ.
نڤێژا ئێڤارى: هنگى ده‌ست پێ دكه‌ت ده‌مێ سيبه‌ر هندى خۆ لێ دئێت ـ ژبلى سيبه‌را خواركه‌فتنێ د نيڤا عه‌سمانيدا ـ و دمينيت هه‌تا رۆژ ئاڤا دبيت، به‌لێ يا ب خێرتر ئه‌وه گيرۆ نه‌كه‌ت هه‌تا رۆژ نێزيكى ئاڤابوونێ دبيت، و هه‌ركه‌سێ گه‌هشت ركاعه‌ته‌كێ به‌رى رۆژ ئاڤا ببيت بكه‌ت، ئه‌و گه‌هشته نڤێژێ، و ئه‌ڤه‌يه ئه‌و نڤێژا ل دويف گۆتنا پتريا زانايان ـ دبێژنێ نڤێژا ناڤنجى (الصلاه الوسطى).
نڤێژا مه‌غره‌ب: وه‌ختێ وێ ب ئاڤابوونا رۆژێ ده‌ست پێ دكه‌ت، و هندى سۆراتى ل ملێ رۆژئاڤايێ بمينيت نڤێژ دئێته‌كرن.
نڤێژا عه‌يشا: وه‌ختێ وێ ب دويماهيك هاتنا نڤێژا مه‌غره‌ب ده‌ست پێ دكه‌ت ده‌مێ سۆراتى به‌رزه، هۆسا دياره چو گرفت نينه بۆ دياركرنا ده‌مێ پێنج نڤێژان، و هنديكه رۆژيه ديسا ب هه‌لاتنا سپێدێ و ب ئاڤابوونا رۆژێڤه گرێدايه. خودايێ مه‌زن دبێژيت: ((وَكُلُوا وَاشْرَبُوا حَتَّىٰ يَتَبَيَّنَ لَكُمُ الْخَيْطُ الْأَبْيَضُ مِنَ الْخَيْطِ الْأَسْوَدِ مِنَ الْفَجْرِ ثُمَّ أَتِمُّوا الصِّيَامَ إِلَى اللَّيْلِ )) ﭼ ئانكو: و ب شه‌ڤ بخۆن و ڤه‌خۆن هه‌تا سپياتيا رۆژێ بۆ هه‌وه ژ تارياتيا شه‌ڤێ جودا دبيت، ديار دبيت. و رۆژيێ ژى هه‌تا شه‌ڤێ كو پشتى رۆژئاڤابوونێيه ته‌مام بكه‌ن، ب ڤى ره‌نگى مه گرفت نينه ئه‌م بزانين كا دآ چاوا رۆژى و نڤێژێت خۆ ل وان جها كه‌ين يێت شه‌ڤ و رۆژێت وان زێده نه‌هندى ئێك، و ئێك گه‌له‌كا كێم و كورت و يا دى گه‌له‌كا درێژ چ شه‌ڤ چ رۆژ و خودێ چێتر دزانيت.
