ب/ ده‌ستپێكێ دڤێت ئه‌م بزانين كا سونه‌ت چيه، و ب راستى گه‌له‌ك پێناس بۆ سونه‌تێ يێت هه‌ين، ئێك ژ وان ئه‌ڤه‌يه: سونه‌ت رێكا پێغه‌مبه‌ريه (سلاڤێت خودێ لێ بن) و رێكا خه‌ليفه‌يێت وى يێت راشد و راسته‌رێكرينه، و بلگه ل سه‌ر ڤێ چه‌ندێ ڤه‌گێرا ترمزى و نه‌سائى و حاكم و ئبن حه‌بان و ئبن ماجه و به‌يهقيه ژ ئه‌بى نه‌جيح عيربازێ كورێ ساريه خودێ ژێ رازى بيت) گۆت: پێغه‌مبه‌رێ خودێ (سلاڤێت خودێ لێ بن): شيره‌ت و وه‌عزه‌كێ كارتێكه‌ر ل مه كر دل بۆ ترسيان و رۆندك بۆ هاتنه خوارێ، مه گۆت: يا پێغه‌مبه‌رێ خودێ هه‌روه‌كى ئه‌ڤه وه‌عز و شيره‌تا خاتر خواستنێيه، ڤێجا ئه‌مرى ل مه بكه.
گۆت: ((ئه‌ز ئه‌مرى ب ته‌قوا و ترسا خودێ دكه‌م، و ب گوهدان و گوهداريێ خۆ هه‌كه به‌نده‌يه‌كێ حه‌به‌شى ببيته ميرێ هه‌وه، و ب راستى هه‌كه ژيێ ئێكى ژ هه‌وه درێژ بوو دێ گه‌له‌ك ژێكجودابوونێ بينيت، هنگى رێكا من و رێكا خه‌ليفێت راسته‌رێكه‌ر و راسته‌رێكرى بگرن، ب ددانێت به‌رێ ده‌ڤى بگرن)).
ل ڤێرێ پێغه‌مبه‌رێ خودێ (سلاڤێت خودێ لێ بن) به‌رێ مه دده‌ته سونه‌ت و رێكا خۆ، و رێك و سونه‌تا خه‌ليفه‌يێت خۆ يێت راسته‌رێكرى، و ئه‌ڤه ڤێ دگه‌هينيت دڤێت ئه‌م ب سڤكى به‌رێ خۆ نه‌ده‌ينه كارێ خه‌ليفه‌يان، راسته بانگێ ئێكێ ل سه‌ر وه‌ختێ پێغه‌مبه‌رێ خودێ (سلاڤێت خودێ لێ بن) و ده‌مێ ئه‌بو به‌كرى و عومه‌رى نه‌بوو، به‌لێ ل سه‌ر ده‌مێ ئيمام عوسمانى هه‌وجه‌يى خواسته هندێ ئه‌ڤ بانگه بێته دان دا موسلمانان ئاگه‌هداركه‌ت و قه‌ستا مزگه‌فتێ بكه‌ن و كرين و فرۆتنێ بهێلن، ئه‌م نابێژين ئه‌ڤ بانگه بيدعه‌يه، چونكى چو شك تێدا نينه ئه‌و سه‌حابى ئه‌وێت هنگى حازر ژ من و ته شاره‌زا و زاناتر و ب غيره‌تترن ل سه‌ر دينى، و كه‌سێ نه‌گۆتيه بيدعه‌يه و دڤێت نه‌بيت، و ئه‌ز نابێژم واجبه ژى، هه‌كه هه‌وجه‌يى هه‌بيت باشه هه‌بيت و هه‌كه هه‌وجه‌يى نه‌بيت چو نينه نه‌بيت، و ئه‌ز دبێژم ئه‌ڤرۆ خه‌لك پتر ل سه‌ر ده‌مێ ئيمام عوسمانى خودێ ژێ رازى بيت)، پێدڤى ئاگه‌هداركرن و هشياركرنێنه و خودێ چێتر دزانيت.
