ب /هه‌لبه‌ت رۆژا ئه‌ينى ژ رۆژێت ب بها و قه‌درگرانن، پێغه‌مبه‌رێ خۆشتڤى (سلاڤێت خودێ لێ بن) د راستا ئه‌ينيێدا دبێژيت: ((خيْرُ يوْمِ طلعَتْ عَلَيْهِ الشَّمْسُ ێوْمُ الجُمُعَه: فِيهِ خُلِقَ آدمُ، وَفيه أُدْخِلَ الجَنَّه، وفيه أُخْرجَ مِنْهَا ولا تَقُومُ السَّاعَه إلا في ێوْمِ الْجُمُعَه)) ئانكو: خێرترين رۆژ، رۆژ ل سه‌ر هه‌لاتى رۆژا ئه‌ينيه: د وێدا ئاده‌م يێ هاتيه چێكرن، و د وێدا يێ كريه د به‌حه‌شتێدا، و د وێدا يێ ژێ هاتيه ده‌رێخستن، و رۆژا قيامه‌تێ نارابيت تێدا نه‌بيت. و د حه‌ديسه‌كا ديدا (سلاڤێت خودێ لێ بن) دبێژيت: سه‌روه‌رێ رۆژان رۆژا ئه‌ينيه، و ل ده‌ف خودێ ژ هه‌ميان ب قه‌درتره. له‌وا مرۆڤ خه‌مێ ژ ڤێ رۆژێ بخۆت و نه‌هێليت ببۆريت وه‌كى هه‌مى رۆژ دبۆرن، چونكى نه‌وه‌كى هه‌مى رۆژانه، و يافه‌ره مرۆڤ چه‌ند ره‌نگێت په‌رستن و عيباده‌تان تێدا بكه‌ت، ژ وان: مرۆڤ رۆژا ئه‌ينى ب ده‌رفه‌ت بزانيت دوعا تێدا زێده بكه‌ت؛ چونكى ده‌مه‌كى د تێدا، نينه دوعا بكه‌ڤيته تێدا هه‌كه نه‌ئێته قه‌بويلكرن.
پێغه‌مبه‌رێ خۆشتڤى (سلاڤێت خودێ لێ بن) دبێژيت: ((فِيها سَاعَه لا يُوَافِقها عَبْدٌ مُسلِمٌ، وَهُو قَائِمٌ يُصَلِّي يسأَلُ اللَّه شَيْئاً، إِلاَّ أَعْطاهُ إِێاه ، وَأَشَارَ بِيدِهِ يُقَلِّلُهَا)) ئانكو: وه‌خته‌ك يێ د رۆژا ئه‌ينيدا هه‌ى، نينه به‌نده‌يه‌كێ موسلمان بكه‌ڤيته تێدا، و ئه‌و ژ پياڤه بيت نڤێژێ بكه‌ت، و دوعا ژ خودێ بكه‌ت، هه‌كه خودێ تشتێ داخوازكرى نه‌ده‌تێ. و ئيشاره‌ت كره ده‌ستێ خۆ كێم دانا (ئانكو: ب ئيشاره‌تا ده‌ستێ خۆ دياركر ئه‌و وه‌خت يێ كێمه). ديسا سونه‌ته مرۆڤ تێدا گه‌له‌ك سه‌له‌واتان بده‌ته سه‌ر روحا شرينا پێغه‌مبه‌رێ خۆشتڤى (سلاڤێت خودێ لێ بن) ژبه‌ركو دبێژيت: ب راستى رۆژا هه‌وه يا ژ هه‌ميان قه‌درتر رۆژا ئه‌ينيه، گه‌له‌ك سه‌له‌واتان تێدا بده‌نه سه‌ر من، ب راستى سه‌له‌واتێت هه‌وه بۆ من دئێنه ڤه‌گوهاستن. ديسا سونه‌ته مرۆڤ سۆره‌تا كه‌هف تێدا بخوينيت، پێغه‌مبه‌ر (سلاڤێت خودێ لێ بن) دبێژيت: هه‌ركه‌سێ سۆره‌تا كه‌هف رۆژا ئه‌ينى بخوينيت دێ بۆ د ناڤبه‌را دوو ئه‌ينياندا رۆنكه‌ت. ديسا سونه‌ته مرۆڤ سه‌رێ خۆ بۆ بشۆت و جلكه‌كێ جوان تێدا بكه‌ته به‌ر خۆ و نوينۆكێت خۆ چێكه‌ت و مويێت زێده ژ له‌شێ خۆ ڤه‌كه‌ت و بهێن خۆشيێ ب كار بينيت.
پێغه‌مبه‌رێ خۆشتڤى (سلاڤێت خودێ لێ بن) دبێژيت: ((نينه ئێك ژ هه‌وه رۆژا خوتبێ خۆ بشۆت و هندى بشێت خۆ پاقژكه‌ت، و خۆ ب دوونێ خۆ دوونده‌ت، يان گولاڤا مالا خۆ ل خۆ بكه‌ت، پاشى ده‌ركه‌ڤيت و دوو مرۆڤان لێكڤه نه‌كه‌ت، (ئانكو: دويان لێك نه‌ده‌ته پاش و د مابه‌ينا واندا روينيته خوار)، پاشى هند سونه‌تان بكه‌ت هندى خودێ بۆ نڤێسين، پاشى گوهێ خۆ بده‌ته ئيمامى هه‌كه ئاخفت، هه‌كه خودێ گونه‌هێت وى يێت مابه‌ينا خوتبا وى و ياديدا ژێ نه‌به‌ت)). و ديسا د حه‌ديسه‌كا ديدا دبێژيت: ((هه‌ركه‌سێ ده‌ستنڤێژا خۆ بشۆت، دورست بشۆت، و بێته خوتبێ، و گوهێ خۆ بده‌تێ و خۆ بێ ده‌نگ بكه‌ت، گونه‌هێت وى مابه‌ينا وى و ئه‌ينيێ هاتنه ژێبرن، و سێ رۆژێت دى ژى ل سه‌ر زێده، و هه‌ركه‌سێ ده‌ستێ خۆ بكه‌ته حه‌سحاسان (ئانكو: ياريان پێ بكه‌ت، يان ده‌مێ دچيته سوجدێ ده‌ستێ خۆ بده‌تێ بۆ خۆ ده‌شتكه‌ت، ـ هنگى مزگه‌فتا پێغه‌مبه‌رى (سلاڤێت خودێ لێ بن) نه‌يا رايێخستى بوو ـ ئه‌و ئاخفت، يان كه‌فته د باتليدا، يان خوساره‌ت بوو، يان تشته‌كێ نه‌هه‌ژى كر. و يا باش ئه‌وه مرۆڤ له‌زێ ل چۆنا مزگه‌فتێ بكه‌ت و هندى زويتر بچيت بخێرتره.
پێغه‌مبه‌رێ خۆشتڤى (سلاڤێت خودێ لێ بن) دبێژيت: ((هه‌ركه‌سێ رۆژا خوتبه سه‌رێ خۆ بشۆت، وه‌كى سه‌رشويشتنا جه‌نابه‌تێ، پاشى وه‌ختێ ئێكێ بچيته خوتبێ.. هه‌روه‌كى حێشتره‌ك كريه خێر، و يێ سه‌عه‌تا دويێ بچيت هه‌روه‌كى چێله‌ك كريه خێر، و يێ سه‌عه‌تا سيێ بچيت هه‌روه‌كى به‌رخه‌كێ ب شاخ كريه خێر، و يێ سه‌عه‌تا چارێ بچيت هه‌روه‌كى مريشكه‌ك كريه خێر، و يێ سه‌عه‌تا پێنجێ بچيت هه‌روه‌كى هێكه‌ك كريه خێر، و هه‌كه ئيمام رابوو دا خوتبێ بخوينيت ملياكه‌ت به‌رهه‌ڤ دبن دا گوهێ خۆ بده‌نه زكرى)). و د حه‌ديسه‌كا ديدا عه‌بدوللايێ كورێ مه‌سعوودى خودێ ژێ رازى بيت)، دبێژيت: من گول پێغه‌مبه‌رى بوو (سلاڤێت خودێ لێ بن) دگۆت: ((رۆژا قيامه‌تێ مرۆڤ دێ ل دويف چۆنا خۆ يا خوتبان روينن، يێ ئێكێ دچيت دێ يێ ئێكێ روينيت پاشى يێ دووێ پاشى يێ سآ يێ پاشى يآ چارێ. ڤێجا يێ بڤێت نێزيك روينيت بلا زوى قه‌ستا مزگه‌فتێ بكه‌ت)). ديسا ژ سونه‌تێت خوتبێ: كرنا سونه‌تانه به‌رى ئيمام ب سه‌ر مينبه‌رێ بكه‌ڤيت، و هندى سونه‌تان بكه‌ت دورسته، و گه‌له‌ك حه‌ديس يێت ل سه‌ر سونه‌تێت رۆژا ئه‌ينى هاتين به‌رى خوتبێ، به‌لێ ئه‌ڤا دكه‌ڤيته د ناڤبه‌را هه‌ردوو بانگاندا چو تشتێ دورست پێ نه‌هاتيه، ئه‌و به‌لگه نه‌بن ئه‌وێت گشتى يێت ل سه‌ر سونه‌تێت به‌رى سه‌ركه‌فتنا ئيمامى بۆ مينبه‌رێ، دگه‌ل هندێ ژى دويف به‌لگه‌يێت شه‌رعى و شه‌نگستێت شه‌رعى ئه‌ڤێت ل به‌ر ده‌ستێت مه دورسته مرۆڤ ب ئنيه‌تا سونه‌تا موتله‌ق بكه‌ت و چو تێدا نينه و كار و كريار دويف ئنيه‌تانه هه‌روه‌كى پێغه‌مبه‌رێ خۆشتڤى (سلاڤێت خودێ لێ بن) دياركرى يێ ببينيت سونه‌ته بلا بكه‌ت و بلا خۆ ژ يێت دى نه‌رازى نه‌كه‌ت، و يێ ببينيت چو سونه‌ت د ناڤبه‌را هه‌ردوو بانگاندا نينين بلا نه‌كه‌ت و بلا خۆ ژ ئه‌ڤێت دكه‌ن نه‌رازى نه‌كه‌ت، و دورسته ب شيره‌ت و جوانى دگه‌ل ئێك و دوو باخڤن دا ژ ژێكجودايێ ده‌ركه‌ڤن، به‌لێ كه‌ربێ ژ ئێك و دوو راكه‌ن، ئه‌ڤه يا حه‌رامه و نه‌دورسته، به‌لێ يا ژ هه‌ميان نه‌دورستتر: ئيمام يان موئه‌زن فه‌رمانێ ل خه‌لكى بكه‌ن رابن ڤێ سونه‌تێ بكه‌ن، چونكى هه‌كه خۆ سونه‌ت ژى بيت نابيت ببيته فه‌رمان، يێ كر باشه و يێ نه‌كر چو ل سه‌ر نينه و خودێ چێتر دزانيت و خودێ چێتر دزانيت.
