ب / زانايێ ناڤدار ئبن ئه‌لعه‌ره‌بى دبێژيت: ئيجماعا موسلمانان ل سه‌ر هندێيه نڤێژا خوتبێ واجبه و فه‌رزه و بۆ كه‌سێ نينه ڤه‌مينيت و نه‌چيته نڤێژا خوتبێ، چونكى خودايێ مه‌زن ئه‌مرێ مه دكه‌ت ئه‌م بچينه نڤێژا خوتبێ ده‌مێ مه گول بانگێ خوتبێ دبيت رۆژا خوتبێ، ئه‌مر دكه‌ت:((يَا أَيُّهَا الَّذِينَ آمَنُوا إِذَا نُودِيَ لِلصَّلَاةِ مِن يَوْمِ الْجُمُعَةِ فَاسْعَوْا إِلَىٰ ذِكْرِ اللَّهِ وَذَرُوا الْبَيْعَ ذَٰلِكُمْ خَيْرٌ لَّكُمْ إِن كُنتُمْ تَعْلَمُونَ)) ئانكو: گه‌لى خودان باوه‌ران گاڤا رۆژا ئه‌ينى بانگێ نڤێژێ هاته‌دان هوين بۆ بيرئينانا خودێ و گوهدانا وه‌عزى و نڤێژا ئه‌ينيێ هه‌رن، و كرين و فرۆتنێ بهێلن، ئه‌ڤه هێلانا كرين و فرۆتنێ و گرتنا رێكا رازيبوونا خودێ بۆ هه‌وه چێتره ئه‌گه‌ر هوين بزانن.
ديسا پێغه‌مبه‌رێ خودێ (سلاڤێت خودێ لێ بن) د راستا واندا ئه‌وێت نه‌چنه نڤێژا خوتبێ، دبێژيت: ((هنده كه‌س يان دێ هێلانا خوتبا به‌سكه‌ن، يان خودێ دێ سه‌ر دلێت وان مۆركه‌ت، پاشى دێ ژ بێ ئاگه‌هان بن)). ديسا دبێژيت: ((هه‌ركه‌سێ سێ خوتبه‌يان ژ خه‌مسارى بهێليت خودێ دێ مۆرێ ل سه‌ر دلێ وى دانيت)). ديسا پێغه‌مبه‌رێ خودێ (سلاڤێت خودێ لێ بن) د راستا واندا ئه‌وێت نه‌هاتينه نڤێژا خوتبێ، دبێژيت: ((ئه‌ز ب وى كه‌مه يێ جانێ من د ده‌ستيدا، نێزيك بوو ئه‌ز فه‌رمانێ بده‌م دار بێنه كۆمكرن، پاشى گازيكه‌مه نڤێژێ و بانگ بۆ بێته دان، پاشى ئه‌مرێ زه‌لامه‌كى بكه‌م به‌رى خه‌لكى نڤێژێ بكه‌ت، پاشى ئه‌ز بچمه ده‌ف هنده زه‌لامان (ئه‌وێت نه‌هاتينه نڤێژێ) و مالێت وان سه‌ر واندا بسۆژم)) و خودێ چێتر دزانيت.
