ب / مزگه‌فت مالێت خودێنه، و دڤێت جهێت به‌رپرس سه‌ره‌ده‌ريا هه‌ژى و دورست دگه‌ل بكه‌ن، و نه‌هه‌ركه‌سێ هه‌بيت ئيمام بدامه‌زرينن، ئه‌گه‌ر نه، دێ د گونه‌هكار بن، و رۆژا قيامه‌تێ دێ ڤێ باجێ ده‌ن، چونكى خودايێ مه‌زن دبێژيت: ((وَمَنْ أَظْلَمُ مِمَّن مَّنَعَ مَسَاجِدَ اللَّهِ أَن يُذْكَرَ فِيهَا اسْمُهُ وَسَعَىٰ فِي خَرَابِهَا أُولَٰئِكَ مَا كَانَ لَهُمْ أَن يَدْخُلُوهَا إِلَّا خَائِفِينَ لَهُمْ فِي الدُّنْيَا خِزْيٌ وَلَهُمْ فِي الْآخِرَةِ عَذَابٌ عَظِيمٌ )) ئانكو: ما كى ژ وى سته‌مكارتره؟ [كه‌س ژ وى سته‌مكارتر نينه] ئه‌وێ نه‌هێليت ناڤێ خودێ ل مزگه‌فتێت خودێ بێته ئينان و ل به‌ر دگه‌ريت كاڤل و وێران بكه‌ت، ئه‌ڤ مرۆڤه [ئه‌وێت ل كاڤلكرن و وێرانكرنا مزگه‌فتان دگه‌ريێن] دڤيا بێ ترس نه‌چنه د مزگه‌فتانڤه، رسوايى و شه‌رمزارى د دنيايێدا بۆ وان هه‌يه، و رۆژا قيامه‌تێ ژى دێ ب به‌ر ئيزايه‌كا دژوار كه‌ڤن. و ئه‌ڤێ مرۆڤێ نه‌گونجاى و نه‌باش دكه‌ته ئيمام بۆ مزگه‌فتێ، يان يێ گونجاى و باش و خه‌لك ژێ رازى ڤه‌دگوهێزيت، يان ژ كارى دراستينيت، و ئێكێ نه‌باش و نه‌خودان شيان ل جهێ وى بدانيت، هه‌روه‌كى وى نه‌هێلاي ناڤێ خودێ ل مزگه‌فتێت خودێ بێته ئينان، و ل به‌ر دگه‌ريت كاڤل و وێران ببن، چونكى زانا هه‌مي دگه‌ل هندێنه كاڤلكرن و وێرانكرن نه‌به‌س سه‌رێكدا ئينانه‌خوار و هه‌رفاندن و خرابكرنه، به‌لكي دانه‌پاشا خه‌لكى ژ مزگه‌فتان ب هه‌ر ره‌نگه‌كێ هه‌بيت كاڤلكرن و وێرانكرنه. ڤێجا ئه‌ز دبێژم ڤه‌گوهاستنا ب ڤى ره‌نگى و ئينانا ئێكى دى ل جهێ وى يێ ب ڤى ره‌نگى نه د جهێ رازيبوونا خه‌لكيدا و دبيته سوچدارێ خۆ ڤه‌گرتنا خه‌لكى ل مزگه‌فتێ، ئه‌و سێ گونه‌هان دكه‌ت، ئێك ژ ئێكێ مه‌زنتره، به‌لێ هه‌بوونا ئيمامه‌كى مرۆڤ ژێ نه‌رازى، دورست ناكه‌ت مرۆڤ خۆ ژ مزگه‌فتێ بده‌ته پاش، و نڤێژێت ب جه‌ماعه‌ت نه‌كه‌ت، و خه‌له‌تى ب خه‌لتيێ چاره‌سه‌ر نابيت، سه‌ره‌ده‌ريا به‌رپرسان ب ڤى ره‌نگى يا خه‌له‌ته، و تو ژى خۆ ل مزگه‌فتێ ڤه‌گرى، چونكى ئيمام ب دلێ ته نينه ديسا يا خه‌له‌ته، دڤێت مرۆڤ ل سه‌ر نڤێژێت خۆ يێ به‌رده‌وام بيت خۆ هه‌كه ئيمام چه‌ندێ ب دلێ مرۆڤى ژى نه‌بيت.
عه‌بدوللايێ كورێ عومه‌رى و ئه‌نه‌سێ كورێ مالكى خودآ ژ هه‌ردوويان رازى بيت، هه‌ردووكان نڤێژ پشت حه‌جاجێ سه‌قه‌فى دكرن، و ئه‌و سه‌حابى بوون و حه‌جاج ئه‌وه يێ ئه‌م هه‌مى دزانين، و بێ گۆمان هه‌ردوو ژ وى نه د رازى بوون، به‌لێ دگه‌ل هندێ ژى نڤێژا مزگه‌فتێ نه‌دهێلان، چونكى ئيمامێ جامعێ نه ب دلێ وانه.
و ئيمام عوسمان خودێ ژێ رازى بيت) ده‌مێ هاتيه دۆرپێچكرن، رێ لێ گرت بێته مزگه‌فتێ ئيمامه‌تيێ بكه‌ت، و ئيمامه‌كێ دى شوينێ دانا، هنده‌ك هاتنه ده‌ف گۆتنێ: ئه‌م نڤێژێ پشت ئيمامێ وان ناكه‌ين، عوسمانى خودێ ژێ رازى بيت) گۆته وان: نڤێژ باشترين تشته خه‌لك دكه‌ت، و هه‌كه خه‌لكى باشى كر هوين ژى باشيێ دگه‌ل بكه‌ن، و هه‌كه خرابى كر خۆ ژ خرابيا وان بده‌نه پاش. ل ڤێرێ ديار دبيت دڤێت ئه‌م نڤێژ و قيامه‌تا خۆ نه‌كه‌ينه قوربانيا هندێ كو ئيمام يێ ب دلێ مه نينه، دڤێت ئه‌م ل سه‌ر مزگه‌فتێ و نڤێژێت مزگه‌فتێ د به‌رده‌وام بين، و ل سه‌ر دانانا مرۆڤێ خراب و ڤه‌گوهاستنا راوستاندنا مرۆڤێ باش د بێ ده‌نگ نه‌بين و نه‌رازيبوونا خۆ ب رێكێت ره‌سمى دياركه‌ين، چونكى خۆ بێ ده‌نگكرن گونه‌هه.
پێغه‌مبه‌رێ خۆشتڤى (سلاڤێت خودێ لێ بن) دبێژيت: ((هه‌ركه‌سێ ژ هه‌وه گونه‌ه و خرابيه‌ك ديت، بلا ب ده‌ستێ خۆ بگوهۆريت، هه‌كه نه‌شيا بلا ب ئه‌زمانێ خۆ بيت، هه‌كه نه‌شيا بلا ب دلێ خۆ بيت، و ئه‌ڤه لاوازترين باوه‌ريه)). ديسا دبێژيت: ((نينه پێغه‌مبه‌ره‌ك به‌رى من د مله‌ته‌كيدا هاتبيته هنارتن، هه‌كه هاريكار و پشته‌ڤان و هه‌ڤال نه‌بن، رێكا وى دگرن و دويف ئه‌مرێ وى دچن، پاشى ده‌سته‌كه‌كا خراب پاش وانڤه هاتن، وێ دبێژن يا نه‌كه‌ن، و وێ دكه‌ن يا ئه‌مرێ وان پێ نه‌هاتيه كرن، هه‌ركه‌سێ جيهادێ ب ده‌ستێ خۆ دگه‌ل وان بكه‌ت ئه‌و خودان ئيمانه، و هه‌ركه‌سێ جيهادێ ب ئه‌زمانێ خۆ دگه‌ل وان بكه‌ت ئه‌و خودان ئيمانه، و هه‌ركه‌سێ جيهادێ ب دلێ خۆ دگه‌ل وان بكه‌ت ئه‌و خودان ئيمانه، و پشتى ڤێ دندكه‌ك ژى ژ ئيمان و باوه‌ريێ نينه)) و خودێ چێتر دزانيت.
