ب / پێدڤيه ئه‌م باش قه‌در و بهايێ خوتبێ و رۆژا خوتبێ بزانين، پێغه‌مبه‌رێ خودێ (سلاڤێت خودێ لێ بن) د راستا وێدا دبێژيت: ب راستى رۆژا هه‌وه يا ژ هه‌ميان قه‌درتر رۆژا ئه‌ينيه، گه‌له‌ك سه‌له‌واتان تێدا بده‌نه سه‌ر من، ب راستى سه‌له‌واتێت هه‌وه بۆ من دئێنه ڤه‌گوهاستن. و دڤێت ئه‌م ل سه‌ر د رژدبين و لێ هشياربين، و پێغه‌مبه‌رێ خودێ (سلاڤێت خودێ لێ بن) بۆ مه جه‌ژن دانايه ژ وان جه‌ژنێت هه‌ر حه‌فت رۆژان دوباره دبيته‌ڤه، و يێ سێ خوتبا بهێليت بێ سويچ و سه‌به‌ب يێت شه‌رعى و دورست بلا گه‌له‌ك ژ خۆ بترسيت و ب سڤك نه‌وه‌رگريت.
پێغه‌مبه‌رێ خودێ (سلاڤێت خودێ لێ بن) دبێژيت: ((يێ سێ خوتبان بێ عوزر و ده‌ستويرى بهێليت ئه‌و ژ منافقان هاته نڤێسين)). و د ريوايه‌ته‌كا ديدا دبێژيت: ((يێ سێ خوتبان بێ عوزر و ده‌ستويرى بهێليت ئه‌وى خودێ دلێ وى يێ مۆركرى))، ئانكو: يێ قه‌پاتكرى نه حه‌قى دچيته تێدا و نه نه‌حه‌قى ژێ ده‌ردكه‌ڤيت، و د حه‌ديسه‌كا ديدا دبێژيت: هه‌روه‌كى ئبن عومه‌ر، خودێ ژ هه‌ردوويان رازى بيت، ژێ ڤه‌دگوهێزيت: مه گول پێغه‌مبه‌رێ خودێ بوو (سلاڤێت خودێ لێ بن) ل سه‌ر دارێت مينبه‌را خۆ دگۆت: ((هنده كه‌س يان دێ هێلانا خوتبا به‌سكه‌ن، يان خودێ دێ سه‌ر دلێت وان مۆركه‌ت، پاشى دێ ژ بێ ئاگه‌هان بن)). به‌لێ دگه‌ل هندێ ژى هه‌كه ئێكى ده‌ستويريه‌ك هه‌بيت بۆ هه‌يه ژ خوتبێ ڤه‌مينيت.. وه‌كى بارانه‌كا ب هێز هه‌روه‌كى ئه‌ڤه بۆ مه د سه‌حيحا ئبن خوزه‌يمه‌دا(خودێ ژێ رازى بيت)، ژ پێغه‌مبه‌رێ خودێ (سلاڤێت خودێ لێ بن) هاتى، ديسا ئيمامێ شافعى(خودێ ژێ رازى بيت)، بۆ ده‌يندارێ ده‌ستكورت دورست دكه‌ت ژ خوتبێ ڤه‌مينيت هه‌كه بترسيت ده‌يندارێ وى دێ به‌رسينگێ وى گريت، ديسا گه‌له‌ك زانايان ژ وان ئيمامێ شافعى ده‌ستويرى دايه وى كه‌سى ڤه‌مينيت ژ خوتبێ هه‌كه بترسيت بێته ژ نه‌حه‌قى ژ لايێ ده‌ستهلاتداريڤه. و ژ ڤێ بۆ مه ئاشكرا دبيت هوين خودان ده‌ستويرن، و ب ئانه‌هيا خودێ گونه‌ه ل سه‌ر هه‌وه نينه، به‌لێ پا هشيار بن نڤێژا نيڤرۆ ژ هه‌وه نه‌چيت، چونكى ده‌مى هوين نه‌هاتينه خوتبێ نڤێژا نڤيرۆ شوينێ ل سه‌ر هه‌وه كه‌فت و خودێ چێتر دزانيت.
