ب / زانا د ڤى كراسيدا نه‌ئێكن، شافعي و مالكى و حه‌نبه‌لى خودآ ژ وان هه‌ميان رازى بيت، دبێژن: يێ گه‌هشته نڤێژا خوتبێ پشتى ركوعا ركاعه‌تا دووێ ئه‌و نه‌گه‌هشته نڤێژا خوتبێ، و دڤێت ئه‌و پشتى سلاڤا ملان، رابيت چار ركاعه‌تان نڤێژا نيڤرۆ بكه‌ت؛ چونكى ئه‌و ژ وان نه‌هاته دانان يێت گه‌هشتينه خوتبێ. و هه‌كه ركوعا دووێ يان به‌رى ركوعا دووێ گه‌هشته ئيمامى.. ئه‌و گه‌هشته نڤێژا خوتبێ، و ئه‌و پشتى سلاڤا ملان دێ ركاعه‌ته‌كێ تنێ كه‌ت، ئه‌وا ژێ چوى. به‌لێ ئه‌بو حه‌نيفه و زاهرى و ئيبراهيمێ نه‌خه‌عى و حه‌كيمێ كورێ عوتبه‌ى و حه‌مادى خودآ ژ وان هه‌ميان رازى بيت، دبێژن: هه‌كه گه‌هشته ئيمامى به‌رى سلاڤا ملان ڤه‌ده‌ت، ئه‌و گه‌هشته نڤێژا خوتبێ و پشتى سلاڤا ملان به‌س ئه‌و دێ دوو ركاعه‌تان كه‌ت، چونكى دوو تنێ يێت ژێ چۆين، چونكى پێغه‌مبه‌رێ خودێ (سلاڤێت خودێ لێ بن) دبێژيت: ((يا گه‌هشتێ بكه‌ن و يا ژ هه‌وه چۆ تمامكه‌ن))، ئه‌ڤ حه‌ديسه گشت نڤێژان دگريت ـ چ خوتبه‌بيت يان هه‌ر نڤێژه‌كا دى ـ و ب راستى ئه‌ز ڤێ بۆچۆنێ چێتر ددانم و خودێ چێتر دزانيت.
