ب / هه‌كه وه‌غه‌ر نه‌يا تخويبداى بيت و ئنيه‌تا ئاكنجيبوونێ نه‌هاتبيته ئينان، و مرۆڤ بۆ هه‌وجه‌يه‌كا گاڤێ و به‌روه‌خت يێ چۆى، و هه‌رگاڤا ئه‌و هه‌وجه‌يى ب جه هات دێ زڤريت و نامينيت شه‌ڤه‌كێ ژى يان رۆژه‌كێ ژى و ڤه‌كێشا و يێ ل هيڤيێ ئه‌ڤرۆ و سوبه‌هى و دێ زڤريت.. هنگى دێ به‌رده‌وام نڤێژا خۆ كورتكه‌ت ـ خۆ هه‌كه شه‌ش هه‌يڤان ژى ڤه‌كێشيت ـ، هندى وى ئنيه‌تا مان و ئاكنجيبوونێ نه‌ئينابيت، به‌لێ هه‌كه ئنيه‌تا مانێ ئينا هنگى جهێ جودابوونا زانايانه كا دێ چه‌ند رۆژان نڤێژان كورتكه‌ت.
ل ده‌ف ئيمام ئه‌حمه‌د(خودێ ژێ رازى بيت)،: هه‌كه ئنيه‌ت چار رۆژان ئينا دێ مينيت، دێ نڤێژان تمامكه‌ت، و هه‌كه ئنيه‌تا مانا چار رۆژا كێمتر ئينا دێ كورتكه‌ت. و ل ده‌ف ئيمام مالك و ئيمامێ شافعى خودآ ژ هه‌ردوويان رازى بيت: هه‌كه ئنيه‌تا پتر ژ چار رۆژان ئينا دێ تمامكه‌ت، و چار رۆژان و كێمتر دێ كورتكه‌ت، و ل ده‌ف ئه‌بو حه‌نيفه(خودێ ژێ رازى بيت)،: هه‌كه ئنيه‌تا پتر ژ پازده رۆژان ئينا دێ تمامكه‌ت، و هه‌كه ئنيه‌تا كێمتر ژ پازده رۆژان ئينا دێ كورتكه‌ت، و هه‌تا ده‌ه بۆچۆنان يێت هه‌ين د ڤى بواريدا، به‌لێ گه‌له‌ك زانا دبێژن: بۆ هه‌يه كورتكه‌ت هندى موسافربيت، و سه‌فه‌ر و وه‌غه‌ر هه‌بيت.. و ئه‌ڤه بۆچۆنا ئبن قه‌يميه(خودێ ژێ رازى بيت)، و چه‌ند زانايێت دييه؛ چونكى ژ پێغه‌مبه‌رى (سلاڤێت خودێ لێ بن) هاتيه زانين د سه‌فه‌را ته‌بووكێدا بيست رۆژان نڤێژ تێدا كورتكريه، و د فه‌تحا مه‌كه‌هێدا هه‌ژده رۆژان نڤێژ تێدا كورتكريه، و ئبن عومه‌ر شه‌ش هه‌يڤان ل ئه‌زه‌ربيجانێ كورتكريه، و ئه‌نه‌سێ كورێ مالكى(خودێ ژێ رازى بيت)، دوو سالان ل شامێ كورتكريه، و نه‌يا به‌رعه‌قله پێغه‌مبه‌رێ خودێ (سلاڤێت خودێ لێ بن) ـ نه‌خاسمه ل فه‌تحا مه‌كه‌هێ ـ ل سه‌ر چۆنێ بوو، و ئنيه‌تا پتر ژ چار رۆژان نه‌ئينابوو.. چاوا ئنيه‌تا چار رۆژان پتر نه‌ئينايه و دڤێت ئه‌و شه‌نگستێت ئيسلامێ بدانيت و يێت شيركێ بهه‌رفينيت و ئه‌ڤه د چار رۆژاندا چێنابيت، ژبه‌ر ڤێ ئه‌ز دبينم هندى مرۆڤ ل سه‌ر سه‌فه‌رێ بيت بۆ هه‌يه نڤێژان كورتكه‌ت و تمام نه‌كه‌ت و خودێ چێتر دزانيت.
