ب / باشه بيرا وى ب (لا إله إلا الله) بێته ئينان ـ به‌لێ گه‌له‌ك ب نه‌رمى و ره‌حه‌ت ـ، چونكى پێغه‌مبه‌ر (سلاڤێت خودێ لێ بن) دبێژيت: ((لا إِلهَ إِلاَّ اللَّه بيننه بيرا يێت به‌ر مرنێ و نيشا بده‌ن)). و پێغه‌مبه‌رێ خودێ (سلاڤێت خودێ لێ بن) دبێژيت: ((هه‌ركه‌سێ دويماهيك ئاخفتنا وى (لا إِلهَ إِلاَّ اللَّه) بيت ئه‌و چۆ به‌حه‌شتێ)). پاشى هه‌كه يێ درێژكرى بيت بێخنه سه‌ر ته‌نشتا راستێ و به‌رێ وى بده‌نه قيبلێ، پاشى سۆره‌تا ياسين ل سه‌ر بخوينه، چونكى پێغه‌مبه‌ر (سلاڤێت خودێ لێ بن) دبێژيت: ((سۆره‌تا ياسين دلێ قورئانێيه، و نينه مرۆڤه‌ك بخوينيت و خودێ و ئاخره‌ت بڤێن هه‌كه خودێ گونه‌هێت وى ژێ نه‌به‌ت، و ل سه‌ر مريێت خۆ بخوينن)) ئانكو: د سه‌كه‌راتێدا، و هه‌كه جانێ خۆ ژ ده‌ست دا چاڤێت وى نه‌رم و ره‌حه‌ت بدانه سه‌رێك، چونكى ژ ئوم سه‌له‌مه‌يێ خودێ ژێ رازى بيت) هاتيه ڤه‌گوهاستن، گۆت: پێغه‌مبه‌رێ خودێ (سلاڤێت خودێ لێ بن) هاته ده‌ف ئه‌بى سه‌له‌مه‌ى، چاڤێت وى زل راوستيا بوون، دانانه سه‌رێك و پاشى گۆت: ((هه‌كه روح ده‌ركه‌فت چاڤ ل دويف دزڤرن))، و دڤێت مه ئاگه‌ه ژ خۆ هه‌بيت گاڤا روح سه‌ردا دچيت ئه‌م چو ئاخفتنێت خه‌له‌ت نه‌بێژين، و چو نفرينا ل خۆ نه‌كه‌ين.
ديسا ئوم سه‌له‌مه خودێ ژێ رازى بيت) دبێژيت: ده‌مێ ئه‌بو سه‌له‌مه‌ى ئه‌مرێ خودێ كرى، هنده‌ك ژ مرۆڤێت وى ده‌نگێت خۆ ب گريێ بلندكرن، ئينا پێغه‌مبه‌رێ خودێ (سلاڤێت خودێ لێ بن) گۆت: ((دوعا ل خۆ نه‌كه‌ن ب خێرێ نه‌بيت، ب راستى ملياكه‌ت ل سه‌ر يا هوين دبێژن، دبێژن: ئامين))، (ئانكو يا خودێ قه‌بويلكه)، پاشى گۆت: ((يا خودێ.. گونه‌هێت ئه‌بى سه‌له‌مه ژێ ببه، و ده‌ره‌جێت وى دگه‌ل راسته‌رێكريان بلند بكه، و جهێ وان يێت پاش خۆ هێلاين ژ ئه‌وێت ماين بگره، و گونه‌هێت مه و يێت وى ژێ ببه و گۆرێ وى بۆ به‌رفره بكه و بۆ وى رۆن بكه)). پاشى تشته‌كێ پێداده‌ن و ديار نه‌هێلنه به‌رچاڤ، پاشى له‌زێ ل شويشتن و كفنكرنێ بكه‌ن، و پاشى هندى بشێن گه‌له‌ك مرۆڤ بلا نڤێژێ ل سه‌ر بكه‌ن، پاشى له‌زێ ل گۆركرنا وى بكه‌ن و خودێ چێتر دزانيت.
