ب / بابه‌تێ ته‌لقين خواندنێ ژ وان بابه‌تانه يێت زانا تێدا جودا و نه‌ئێك، به‌لێ دگه‌ل هندێ ژى هه‌لويستێ وان نه‌وه‌كى هنده گه‌نجێت سه‌ر ڤى ده‌ميه ئه‌وێت له‌زێ د حوكماندا دكه‌ن و هه‌مى تشتان ب بيدعه ددانن و ب دژوارى ره‌دكه‌ن، له‌وا ئه‌م دێ ئاخفتنێت زانايان د راستا ته‌لقينێدا ئينين دا بزانين كا حوكمێ وێ ل ده‌ف زانايان چيه و ل سه‌ر وى بناغه‌ى سه‌ره‌ده‌ريێ دگه‌ل بكه‌ين.
شافعي هه‌مى و باراپتر ژ حه‌نبه‌ليان موسته‌حه‌ب دبينن، هه‌روه‌سا ئبن ته‌يميه خودێ ژێ رازى بيت) دبێژيت: ته‌لقين خواندن ژ گه‌له‌ك سه‌حابان هاتيه زانين و فه‌رمان ب خواندنا ته‌لقينێ كريه، وه‌كى: ئه‌بى ئومامه‌يێ باهلى و واصلێ كورێ ئه‌سقه‌عى، و گه‌له‌كێت دى نه‌دخواند، و حه‌ديسه‌ك ب رێكا ئه‌بى ئومامه‌ى(خودێ ژێ رازى بيت)، ل سه‌ر هاتيه د ته‌به‌رانيێدا به‌لێ يا له‌وازه، پاشى دبێژيت: زانا د ته‌لقينێدا سێ بۆچۆنن: سونه‌ت دانن، و مه‌كروه ددانن، و دورست و موباح ددانن، و دبێژيت: ئه‌ڤا دويماهيكێ عادلتره، و ئيمامێ نه‌وه‌وى(خودێ ژێ رازى بيت)، د راستا حه‌ديسێدا دبێژيت: هه‌رچه‌نده حه‌ديس يا له‌وازه به‌لێ دهێته وه‌رگرتن، چونكى زانا هه‌مى ئێكن ساناهيكرن د حه‌ديسێت باشيان دهێته‌كرن د شرينكرن و پاشڤه‌برنێدا، و شاهدێت دورست يێت هه‌ين ب هێز دئێخن، و به‌رده‌وام د چه‌رخێ چاڤلێكرياندا كار يێ پێ هاتيه‌كرن.
پشتێ ڤێ.. ئه‌ز دبێژم تشته‌كێ باشه ته‌لقين بێته خواندن، به‌لێ ب ئه‌زمانه‌كى، يێت ئاماده تێ بگه‌هن و مفاى بۆ خۆ ژآ وه‌رگرن، چونكى ب راستي ئه‌وێت ئاماده هه‌مى د گوه و دل ڤه‌كرينه بۆ وه‌رگرتنا هه‌ر شيره‌ته‌كێ، و دبيت ئه‌و ته‌لقين هه‌كه جوان بێته خواندن ببيته ئه‌گه‌رێ ل خۆزڤرينا گه‌له‌ك مرۆڤان و خودێ چێتر دزانيت.
