ب / ئه‌ركانێت ئيسلامێ ـ زه‌كات نه‌بيت ـ يێت دى هه‌مى ب مرۆڤيڤه د گرێداينه، و هه‌تا مرۆڤ نه‌گه‌هيت و بالق نه‌بيت ئه‌ڤ روكنه ل سه‌ر فه‌رز نابن. به‌لێ زه‌كات نه.. باراپتر ژ زانايێت مه دبێژن: زه‌كات يا ب ماليڤه گرێدايه؛ چونكى ئيسلام به‌رده‌وام چاڤدێريا به‌رژه‌وه‌ندا هه‌ژارى دكه‌ت، و هۆسا مالى زه‌كاتا خۆ يا هه‌ى ـ چ ئه‌ڤ ماله مالێ بچويكى بيت، يان يێ مه‌زنى بيت، يان يێ ژنێ بيت، يان يێ زه‌لامى بيت ـ.
و ئه‌م دبێژين: (الزكاه في مال الصبي) ڤێجا ئه‌ڤ بچويكه چ يێ ئێتيم بيت يان نه، و ديسا وه‌كى بچويكى، دينێ ( شێت) زه‌نگين. و ب راستى ل سه‌ر ڤێ چه‌ندێ كا زه‌كات ل مالێ بچويكێ زه‌نگين و دينێ زه‌نگين دكه‌ڤيت يان نه.. جودابوون (اختلاف) د ناڤبه‌را زاناياندا يا هه‌ى. بۆچۆنا ئێكێ دبێژيت: زه‌كات د مالێ بچويكى و دينيدا نينه، و ئه‌ڤه بۆچۆنا ئه‌بو حه‌نيفه‌يه (خودێ ژێ رازى بيت))، چونكى زه‌كات ل ده‌ف وى يا ب مرۆڤيڤه گرێدايه نه ب ماليڤه و بچويك نه‌يێ بالقه نه‌يێ ب ئاقله، له‌وا زه‌كات د مالێ وان هه‌ردووكاندا نينه.
بۆچۆنا دووێ دبێژيت: زه‌كات ب ماليڤه يا گريدايه، هه‌رگاڤا هند مال هاته ديتن زه‌كات لێ بكه‌ڤيت دڤێت زه‌كات لێ بێته‌دان، ڤێجا ئه‌ڤ ماله يێ كێ بيت، يێ بچويكى بيت يان يێ دينى (شێتى) بيت، و ئه‌ڤه بۆچۆنا جمهورێ زانايانه و سه‌ر كارێ بچويكى دآ زه‌كاتآ ژ مالێ وى ده‌رێخيت، چ يێ ئێتيم بيت يان نه‌ئێتيم بيت يان يێ دين بيت. و دڤێت هه‌ر ئه‌و پارێت وى بۆ بكه‌نه د شۆليرا دا ب زه‌كاتێ كێم نه‌بن. پێغه‌مبه‌ر (سلاڤێت خودێ لێ بن) ئه‌مر دكه‌ت: ((مالێ ئێتيمى بۆ بكه‌نه د شۆليرا و نه‌هێلن زه‌كات هه‌ر ژێ بخۆت، و ب راستى ئه‌ڤ بۆچۆنه ژ يا ئێكێ ب هێزتر و دورستتره و خودێ چێتر دزانيت.
