ب / به‌رى ئه‌م حوكمێ شه‌رعى بێژين، ئه‌ز شيرته‌كا ژ دل ل مرۆڤێ موسلمان دكه‌م ئه‌ڤێ زه‌كاتا خۆ دده‌ت خه‌ما زه‌كاتا خۆ بخۆت و چاڤدێريا مه‌سله‌حه‌تا خۆ د زه‌كاتا خۆدا نه‌كه‌ت، و دڤێت بزانيت زه‌كات روكنه‌كێ مه‌زنه و دڤێت سپه‌هى و خۆسه‌ر بۆ خودايێ مه‌زن ب تنێ بيت، ڤێجا وه‌ختێ تو دده‌يه مامێ يان خالێ يان كاركه‌رێت خۆ يان زێره‌ڤانێت خۆ، پێدڤيه به‌رێ خۆ بده‌يه خۆ.. ئه‌رێ ئنيه‌تا ته چيه؟ و دڤێت ئه‌ڤ ئنيه‌ته خۆسه‌ر و ژ دل بۆ خودێ ب تنێ بيت، چونكى زه‌كات روكنه دڤێت تو ب دورستى ل سه‌ر خۆ راكه‌ى، و دڤێت تو به‌راهيێ و دويماهيێ خه‌ما هندێ بخۆى كانێ ئه‌ڤ روكنه ب دورستى ته ل سه‌ر خۆ راكر، و ئه‌ڤ روكنه دێ ژ ته قه‌بويل بيت يان نه.
پاشى دێ ئێين بێژين: كوشتنا ده‌ينى ب به‌ر زه‌كاتێ جهێ ئيختيلافێيه د ناڤبه‌را فقهزاناندا، هه‌لبه‌ت باراپتر ژ زانايان و نه جمهوورێ وان ب تنێ، ڤێ دورست ناكه‌ن، و يێ وه‌كر هه‌روه‌كى وى زه‌كاتا خۆ نه‌داى، و د مه‌زهه‌بێ شافعيدا ((خودێ ژێ رازى بيت)) دوو بۆچۆن يێت هه‌ين، و بۆچۆنا ب هێزتر دورست ناكه‌ت، و ديسا ئه‌ڤه مه‌زهه‌بێ ئه‌بو حه‌نيفه‌يه و ئه‌حمه‌دى و ره‌ئيا هه‌مى زانايانه، ژبلى حه‌سه‌نێ به‌سرى و ئيمام عه‌تائى و ئبن حه‌زمى، خودآ ژ وان رازى بيت، ئه‌ڤه دبێژن: دورسته. به‌لێ حه‌سه‌نێ به‌سرى و عه‌تاء مه‌رجه‌كى ددانن و دبێژن: دڤێت ئه‌ڤ ده‌ينه يێ كرين و فرۆتن و بازرگانيێ نه‌بيت، چونكى هه‌كه هۆسا نه‌بيت بازرگان چو جار زه‌كاتا خۆ ناده‌ن و به‌رده‌وام دێ ل سجلێت خۆ زڤرن و ده‌ينا ب به‌ر زه‌كاتێ كوژن. هۆسا چو جار زه‌كاتێ ناده‌ن و خودێ چێتر دزانيت.
