ب / مالى هه‌تا زه‌كات لێ بكه‌ڤيت دڤێت چه‌ند مه‌رج تێدا هه‌بن، ئێك ژ وان ئه‌ڤيه: دڤێت بگه‌هيته نيصابێ، ئه‌و ژى بهايێ هه‌شتێ و پێنج غرامێت زێرينه، و هه‌رگاڤا پارێ مرۆڤى گه‌هشته ڤى بهاى هنگى زه‌كات ل مالێ مرۆڤى دكه‌ڤيت.
مه‌رجێ دووێ: دڤێت ساله‌ك ب سه‌رڤه بچيت ـ سالا مشه‌ختى نه‌يا زاينى ـ و كێر زێده‌يى بيت و شۆل پێ بێته‌كرن، و هه‌ر ئه‌ڤه حيكمه‌تا سه‌ره‌كيه ژ زه‌كاتێ، مال نه يێ مرى و نڤستى بيت، و هنگى دووجاركى مفا دێ گه‌هيته هه‌ژارى، جاره‌كێ رێژه‌يا وى ژ زه‌كاتێ دێ زێده‌بيت و ب شۆلكرنێ ژى دێ مفا گه‌هيتێ.
مه‌رجێ دى: دڤێت ئه‌و پاره يێ زێده‌بيت ژ هه‌وجه‌يێت وى يێت پێدڤى، و مه‌سكه‌ن ئێك ژ وان هه‌وجه‌يانه، به‌لێ مه‌رج نينه ئه‌ز خودانێ سه‌كه‌نى بم ماده‌م ئه‌ز شيايمه سه‌كه‌نى په‌يداكه‌م، ب هه‌ر رێكه‌كا هه‌بيت ئه‌ز يێ ب سه‌كه‌نم ـ ب كرێ بيت يان كرينێ بيت ـ به‌لێ ل ده‌ف حه‌نه‌فيان: زه‌كات ژ وى مالى ناهێته دان ئه‌وێ بۆ خانى هاتيه دانان، ب مه‌رجه‌كى وى چو خانى نه‌بن، چونكى يێ بێ خانى نه‌يێ زه‌نگينه، و پارێ وى ژ هه‌وجه‌يێت وى نه‌يێ زێده‌يه، و هنگى ئه‌و نه‌يێ زه‌نگينه، و هه‌كه وى زه‌كات دا دێ ده‌ت و دلێ وى دێ دويفرا بيت، چونكى ئه‌و يێ هه‌وجه‌يه، و پێغه‌مبه‌ر (سلاڤێت خودێ لێ بن) دياردكه‌ت: دڤێت دلێ مرۆڤى دويف زه‌كاتا مرۆڤيرا نه‌بيت، هه‌روه‌كى د مه‌عجه‌ما كه‌بيردا هاتى يا ته‌به‌رانى: (وأدوا زكاه أموالكم گيبه بها أنفسكم)، به‌لێ جمهورێ زانايان دبێژن: ئه‌و دێ زه‌كاتێ ده‌ت و ئه‌و قوسيريا ويه بلا بۆ خۆ كربا د هه‌وجه‌يێت خۆدا هێژ وه‌ختێ زه‌كاتێ نه‌هاتى. و ب راستى ئه‌ز بۆچۆنا جمهورى ب هێزتر ددانم، دڤێت ئه‌و نه‌دانيته سه‌رێك و شۆل پێ نه‌كه‌ت، هه‌كه وه‌كر.. هنگى ئه‌و يێ عه‌يبداره، ديسا بلا كربانه د هه‌وجه‌يێت خۆدا، هه‌كه وه‌نه‌كر.. ديسا هنگى ئه‌و يێ عه‌يبداره و دڤێت ئه‌و زه‌كاتێ بده‌ت، و ماده‌م شيايه خانى بۆ خۆ په‌يداكه‌ت و سه‌رێ وى د بن خانيڤه‌يه ـ چ يێ وى بيت يان ب كرێ بيت ـ ئه‌و يێ ب سه‌كه‌نه و هه‌كه پاره هه‌بن و بگه‌هنه نيصابێ و سال سه‌رڤه چۆبيت دڤێت زه‌كاتێ بده‌ت و خودێ چێتر دزانيت.
