ب / جاره‌كێ دڤێت ئه‌م بزانين كا مه‌خسه‌د ژ نيصابێ چيه؟ نيصاب ئه‌و كوژمێ پاره‌يه يان ماليه، هه‌كه هند مرۆڤى هه‌بيت، و سال سه‌رڤه چۆ زه‌كات ل سه‌ر مرۆڤى واجب دبيت، و نيصابا زه‌كاتێ دويف زێرى بيست دينارن، و دينارێ سه‌رده‌مێ پێغه‌مبه‌رى (سلاڤێت خودێ لێ بن) يێ هاتيه كێشان.. كێشا وى يا بوويه (4.25) غرام ، (20 × 4.25 = 85) غرام.
ل ڤێرێ ديار دبيت نيصابا زه‌كاتا زێرى هه‌شتێ و پێنج غرامه، و هه‌رگاڤا خودانێ زێرى هند و پتر هه‌بيت دڤێت زه‌كاتێ لێ بده‌ت، و رێژه‌يا زه‌كاتێ ژى نيڤ ميسقاله يان نيڤ ديناره، ئانكو: (2.125) غرامه. و هه‌كه پاره هه‌بن ديسا دڤێت بهايێ هه‌شتێ و پێنج غرامێت زێرى بيت و پتر، هه‌رگاڤا هند پاره هه‌بن و پتر زه‌كات لێ دكه‌ڤيت، و زه‌كاتا پاره‌ى دێ دوو و نيڤا (2.5%) ژێ ده‌ت، و نيصابا زه‌كاتا پاره‌ي دويف زێرى دڤێت ته مال بهايێ (85) غرامێت زێرى هه‌بيت، و دويف زيڤى (595) غرامه، چونكى ده‌ه ده‌رهه‌م ئه‌وێت سه‌ر ده‌مێ پێغه‌مبه‌رى (سلاڤێت خودێ لێ بن) دبوونه (7) مسقال، و مه گۆت: هه‌ر مسقاله‌كا سه‌ر ده‌مێ پێغه‌مبه‌رى (سلاڤێت خودێ لێ بن) ب كێشانا ئه‌ڤرۆ دبيته (4,25)، و نيصابا زيڤى (200) ده‌رهه‌م بوون. و هه‌ر ده‌رهه‌مه‌ك دبيته حه‌فت ژ ده‌هێ و (0,7 × 4,25= 2،975) غرام، كێشا هه‌ر ده‌رهه‌مه‌كى دويف كێشانا هه‌ڤچه‌رخ ب ڤى ره‌نگى نيصابا زيڤى دويف كێشانا ئه‌ڤرۆ دێ بيته (200 × 2,975= 595) غرام. به‌لێ دورسته ئه‌م بێژين ب زێرى بهايێ (85) غرامايه و ب زيڤى بهايێ (595) غرامايه.
ئه‌ز دبينم ئه‌ڤه نه‌يا دورسته، هه‌رچه‌نده هنده‌كان ئه‌ڤه دورست دانايه، چونكى وى ده‌مى دێ پاره‌ى دوو نيصاب هه‌بن و هه‌دوو نه هندى ئێكن! بهايێ (85) غرامێت زێرى نه هندى بهايێ (595) غرامێت زيڤيه، و به‌لگه د هه‌ڤپشته‌ڤانن هه‌ردوو نيصاب زێر و زيڤ ل سه‌ر ده‌مێ پيغه‌مبه‌رى (سلاڤێت خودێ لێ بن) و ل سه‌رده‌مێ خه‌ليفێت راشد ژى وه‌كى ئێك بوون، و ديناره‌ك (مسقاله‌ك ئه‌وا دبوو 4,25 غرام) دبوو ده‌ه ده‌رهه‌م، ژبه‌ر ڤێ دڤێت ئه‌ڤرۆ ژى نيصاب ئێك بيت و ئه‌ڤه دخوازيت ئه‌م زێرى يان زيڤى هه‌لبژێرين دا بكه‌ينه بنيات بۆ دانانا بهايێ نيصابێ ب پارێ مه يێ ئه‌ڤرۆ، و گه‌له‌ك زانايێت هه‌ڤچه‌رخ وه‌كى (د. يوسف قه‌رزاوى و عه‌بدلكه‌ريم زێدان) خودآ ژ هه‌ردوويان رازى بيت، زێرى بنيات هه‌لدبژێرن، چونكى د بنياتدا هه‌ر ئه‌و بناغه و ئه‌ساس بوو و ئه‌ز ژى ڤآ بۆچۆنآ دورستتر و باشتر ددانم و خودێ چێتر دزانيت.
