ب / ده‌سپێكێ ئه‌ز ده‌ستخۆشيێ ل ته دكه‌م، د ڤێ حه‌زێدا، و خودێ به‌ره‌كه‌تێ بێخيته مالێ ته، و خودێ حه‌ژێكرنا كارێ باش و خودێ پێخۆش هه‌رده‌م ب رزقێ مه و ته بكه‌ت، هيڤيا من ئه‌وه، به‌رده‌وام موسلمان هشيارى كارێ خێرێ بن و هشيارى زه‌كاتا خۆ بن، به‌رده‌وام كار بكه‌ن زه‌كاتا خۆ بێخنه د جهێ دورست و هه‌ژى و پێدڤيدا، پشتى ڤێ.. ب راستى زنايێت مه د ژێكجودانه ل سه‌ر دورستيا دانا زه‌كاتێ بۆ ئاڤاكرنا مزگه‌فتان ئه‌و ژى ژ به‌ر ئيختلافا وان ل سه‌ر رامانا پشكا (في سبيل الله) هنده‌ك دبێژن: پشكا (في سبيل الله) يا ب جيهادێڤه گرێدايه، ئه‌و جيهادا شه‌ر و قيتال تێدا به‌س، و ل دويف ڤێ بۆچۆنێ نه‌دورسته زه‌كات بۆ ئاڤاكرنا مزگه‌فتان بێته دان. و هنده‌كێت دى رامانا (في سبيل الله) زێده به‌رفره‌ه دكه‌ن ب ره‌نگه‌كێ وه‌سا هه‌مى تشتان بگريت بۆ خودێ بێته‌كرن.
و ئه‌ز دبێژم: به‌رفره‌هكرنا بازنێ (في سبيل الله) ب ڤى ره‌نگى نه‌دورسته، چونكى هه‌كه دورستبا.. هه‌شت ره‌نگێت مرۆڤان نه‌دهاتنه دياركرن ئه‌وێت زه‌كات لێ دچيت، هه‌روه‌كى د ڤێ ئايه‌تێدا هاتى: ((إِنَّمَا الصَّدَقَاتُ لِلْفُقَرَاءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّقَابِ وَالْغَارِمِينَ وَفِي سَبِيلِ اللَّهِ وَابْنِ السَّبِيلِ فَرِيضَةً مِّنَ اللَّهِ وَاللَّهُ عَلِيمٌ حَكِيمٌ )) ﭼ (التوبه/60) ئانكو: ب راستى زه‌كات به‌س بۆ وانه: ئه‌وێت هه‌ژار و به‌لنگاز، و ئه‌وێت ل سه‌ر شۆل دكه‌ن [بۆ كۆمكرنا زه‌كاتێ] و ئه‌وێت دلێ وان به‌ر ب ئيسلامێڤه دئێته كێشان [ژ كه‌سێت موسلمان بووين و هێژ موكوم نه‌بووين، يان گره‌گرێت گاوران دا زيانا وان بێته پاشڤه‌برن و دلێ وان بۆ ئيسلامێ بێته نه‌رمكرن] و بۆ ئازاكرنا به‌نده‌يان و بۆ ده‌ينداران و بۆ رێيا خودێ (جيهادێ ب هه‌مى ره‌نگانڤه) و رێڤينگانه، ئه‌ڤه فه‌رزه ژ ده‌ف خودێ، و خودێ ب خۆ يێ زانا و كاربنه‌جهه. و دا به‌س بيت گۆتبا زه‌كات بۆ (سبيل الله) و هه‌وجه نه‌بوو هۆسا ب درێژي دياره‌كربا و هه‌شت جوينێت مرۆڤان گۆتبا، چونكى هه‌مى ب ره‌نگه‌كى ژ ره‌نگان (في سبيل الله) ل ڤێرێ ديار دبيت دڤێت هند زێده به‌رفره‌ه نه‌بيت كو ئه‌ڤێت دى هه‌مى بكه‌ڤنه بنڤه. به‌رته‌نگكرنا رامانا (في سبيل الله) د جيهادا شه‌ريدا ژى نه‌يا دورسته بازنكرنا رامانا (في سبيل الله) د جيهادێدا دورسته، به‌لێ ته‌نگكرنا رامانا جيهادێ د شه‌ريدا ب تنێ نه‌يا دورسته، رامانا جيهادێ و ئارمانج و مه‌ره‌م و مه‌به‌ست و مه‌خسه‌د ژێ مه‌زنتره د شه‌ريدا بێته كۆمكرن، چونكى په‌يڤا جيهاد چه‌ند جاران د قورئانێدا هاتيه وه‌كى: (( وَجَاهِدْهُم بِهِ جِهَادًا كَبِيرًا))((وَجَاهِدُوا فِي اللَّهِ حَقَّ جِهَادِهِ ))((يَا أَيُّهَا النَّبِيُّ جَاهِدِ الْكُفَّارَ وَالْمُنَافِقِينَ وَاغْلُظْ عَلَيْهِمْ )) و رامان ئه‌و نينه شه‌رێ وان بكه، ل ڤێرێ دهێته زانين جيهاد د شه‌ريدا تنێ ناهێته كۆمكرن، و هه‌ر تشتێ ئارمانجا جيهادێ بينيته جه و ب ئنيه‌تا خۆڤه جيهاده، ژبه‌ر هندێ ئه‌م دبينين (مجمع الفقه الاسلامي) ئه‌وا سه‌نگا خۆ ل جيهانا ئيسلامى هه‌ى و هه‌مى ره‌نگێت شاره‌زا و بسپۆران و گه‌له‌ك زانايێت ناڤدار و باوه‌رپێكرى تێدا ل سه‌ر ڤێ ره‌ئيێنه، هه‌ركه‌سێ نسره‌ت و پشته‌ڤانيا دينى بكه‌ت جيهادكه‌ره و ئه‌ڤرۆ جيهاد نه‌يا گرێدايه ب شه‌رى و قيتالێ تنێڤه، به‌لكى هه‌ر بزاڤه‌كا رژد ئه‌وا دئێته‌كرن بۆ پێشئێخستنا دينى جيهاده، ده‌عوا ل سه‌ر راديويێ دئێته‌كرن جيهاده، كارئينانا راگه‌هاندنێ و ده‌زگه‌هێت وێ د خزمه‌تا ده‌عوا ئيسلامێدا جيهاده، ئه‌ڤ ده‌عوا ب شيره‌ت و په‌يڤێ دئێته‌كرن جيهاده، و ئه‌ڤ ده‌عوا ب كتێبا ئيسلامى دئێته‌كرن جيهاده. و پشكا (في سبيل الله) راسته جيهاده به‌لێ و هه‌ر تشته‌كێ دگريت، ئه‌م دبێژينێ ئه‌ڤه جيهاده.
ئيمامێ مه‌ناوى د كتێبا (فيض القدير شرح الجامع الصغير)دا دبێژيت: (الجهاد فهو يشمل المجاهدين بالسنتهم دفاعا عن الاسلام برد المبطلين والكشف عن اباطيلهم التي يريدون بها زعزعه عقائد المسلمين) جيهاد وان هه‌مى جيهادكه‌ران دگريت ئه‌وێت ب ئه‌زمانێت خۆ به‌ره‌ڤانيێ ژ ئيسلامێ دكه‌ن و گۆمانێت نه‌ياران پويچ دكه‌ن و نه‌خشه و پيلانێت وان ئاشكه‌را دكه‌ن ئه‌وێت دڤێن پێ هزروبيرێت موسلمانان سست بكه‌ن.
پشتى ئه‌ڤا بۆرى ئه‌ز دبێژم: ئه‌و جهێت موسلمان تێدا زێده پێدڤى بۆ مزگه‌فتێ و چو جه و ده‌زگه‌هێت ئاشكرا نه‌بن برپرس ژ ئاڤاكرنا مزگه‌فتان، دورسته زه‌كات بۆ ئاڤاكرنا مزگه‌فتان بێته دان، بۆ ڤان جهان، نه‌خاسمه ئه‌ورۆپا، چونكى ل وێرێ مزگه‌فت ب رۆلێ چه‌ند ده‌زگه‌هان رادبن، و مزگه‌فت پارێزيا ناسناما موسلمانان دكه‌ت، و هه‌كه مزگه‌فت ل وان جهان نه‌بن هه‌بوونا ئيسلامێ يا گه‌فلێكريه، به‌لێ ئه‌و جهێت گه‌له‌ك هه‌بن خۆ ل مزگه‌فتان بكه‌نه خودان وه‌كى وه‌لاتێ مه ڤان رۆژان ئه‌م زه‌نگينان ـ خودێ به‌ره‌كه‌تێ بێخيته مالێ وان ـ به‌ره‌بركيێ د ئاڤاكرنا مزگه‌فتاندا دكه‌ن، ئه‌ز نابينم زه‌كات بۆ ئاڤاكرنا مزگه‌فتان بێته دان دا ژ جوداهى و ئيختلافێ ده‌ركه‌ڤين و خودێ چێتر دزانيت.
