ب / ب راستى ئه‌ڤه پسياره‌كا گه‌له‌كا فه‌ره؛ چونكى گه‌له‌ك خه‌لك خه‌له‌ت تێ دگه‌هن، هزر دكه‌ن مه‌خسه‌د سالا زايينيه و ئه‌و ب خۆ وه‌سا نينه، هه‌مى عيباده‌ت ب هه‌يڤێت عه‌سمانيڤه د گرێداينه، و ب سالا مشه‌ختيڤه، و به‌لگه ژى ل سه‌ر ڤێ چه‌ندێ خودايێ مه‌زن دبێژيت: ((يَسْأَلُونَكَ عَنِ الْأَهِلَّةِ قُلْ هِيَ مَوَاقِيتُ لِلنَّاسِ وَالْحَجِّ)) ئانكو: و پسيارا هه‌يڤێ ژ ته دكه‌ن (بۆچى دئێته گوهۆرين، زراڤ دبيت و پاشى به‌ربه‌ر ستوير دبيت هه‌تا ته‌كووز دبيت) بێژه: ئه‌و نيشانێت وه‌ختانه بۆ خه‌لكى، و بۆ حه‌جێ (ده‌مێت په‌رستنا خۆ و ده‌مێ كار و بارێت خۆ پێ دنياسن).
ئيمامێ شافعى (خودێ ژێ رازي بيت)دبێژيت: خودايێ مه‌زن يێ فه‌رزكرى وه‌خت و ده‌م ـ هه‌لبه‌ت يێت ب عيباده‌تانڤه گرێدايى ـ ب هه‌يڤێت عه‌سمانى بن، ديسا خودايێ مه‌زن دبێژيت: ((إِنَّ عِدَّةَ الشُّهُورِ عِندَ اللَّهِ اثْنَا عَشَرَ شَهْرًا فِي كِتَابِ اللَّهِ يَوْمَ خَلَقَ السَّمَاوَاتِ وَالْأَرْضَ مِنْهَا أَرْبَعَةٌ حُرُمٌ ذَٰلِكَ الدِّينُ الْقَيِّمُ)) ئانكو: ب راستى ژ رۆژا خودێ عه‌رد و عه‌سمان چێكرين، هه‌ژمارا مه‌هان ل ده‌ف خودێ دوازده مه‌هن، هه‌روه‌كى خودێ د كتێبا خۆدا (ده‌پێ پارستى) بنه‌جهكرى، ژ وان مه‌هان چار ژێ ب رويمه‌تن [د وان مه‌هاندا (زيلقعده، زيلحيجه، موحه‌ره‌م و ره‌جه‌ب) شه‌ر و كوشتن نه‌دورسته) قورتبى و رازي هه‌ردوو دبێژن: هه‌يڤ و سال د ئيسلامه‌تيێدا بۆ عيباده‌تان ب هه‌يڤێت عه‌سمانينه و ب سالێت مه‌شه‌ختينه. ديسا خودايێ مه‌زن دبێژيت:((هُوَ الَّذِي جَعَلَ الشَّمْسَ ضِيَاءً وَالْقَمَرَ نُورًا وَقَدَّرَهُ مَنَازِلَ لِتَعْلَمُوا عَدَدَ السِّنِينَ وَالْحِسَابَ )) ئانكو: خودێ رۆژ بۆ هه‌وه كريه چرا و هه‌يڤ كريه رۆناهى، و كره قويناخ قويناخ دا هوين هه‌ژمارا سالان و حسێبا خۆ بزانن.
ديسا پێغه‌مبه‌رێ خۆشتڤى (سلاڤێت خودێ لێ بن) د راستا ره‌مه‌زانێ و گرتنا وێ و خوارنا وێدا دبێژيت: ((صُومُوا لِرُۆێتِهِ، وَأَفْطرُوا لِرُۆێتِهِ، فإِن غمي عَليكم، فَأَكْمِلُوا عِدَّه شَعْبانَ پثاثينَ)) ئانكو: ب رۆژى بن هه‌كه هه‌وه هه‌يڤا ره‌مه‌زانێ ديت، و بخۆن هه‌كه هه‌وه هه‌يڤا شه‌والێ ديت، و هه‌كه عه‌ور كه‌فته مابه‌ينا هه‌وه و ديتنا هه‌يڤا ره‌مه‌زانێ، شه‌عبانێ بكه‌نه سيه. و هه‌كه مه زه‌كات دويف سالا زايينى دا.. ئه‌ڤه دێ بيته ئه‌گه‌رێ گيرۆبوونا زه‌كاتێ هه‌ر سال يازده رۆژان، چونكى سالا زايينى يازده رۆژان پتره ژ سالا مشه‌ختى، و ئه‌ڤه دێ بيته ئه‌گه‌رێ هندێ هه‌ر سيه سالان زه‌كات ساله‌كێ نه‌هێته دان، و هۆسا دبيت موسلمان د ژيێ خۆدا دوو سالان يان ساله‌كێ زه‌كاتێ نه‌ده‌ت و خودێ چێتر دزانيت.
