ب / مه دوو ره‌نگێت مالێ حه‌رام يێت هه‌ين، ئێك: چونكى د خۆيا خۆدا يێ حه‌رامه، وه‌كى: عه‌ره‌قێ و به‌رازان، ڤان زه‌كات لێ ناكه‌ڤيت؛ چونكى نه‌دورسته موسلمان ببيته خودانێ ڤى ره‌نگه مالى؛ چونكى د خۆيا خۆدا د حه‌رامن. ره‌نگێ دووێ: د خۆيا خۆدا نه‌يێ حه‌رامه، به‌لكى ژبه‌ر ئه‌گه‌ره‌كى، يان ژبه‌ر ره‌وشه‌كێ و ساخله‌ته‌كێ يێ حه‌رام بووى، ب عه‌ره‌بى دبێژنێ: (محرم لغيره) وه‌كى ئه‌و كرين و فرۆتنێ ب ريبايێ و سه‌له‌فێ بكه‌ت، و مالێ وى هۆسا هه‌مى حه‌رام ببيت، ئه‌رێ ئه‌و دێ زه‌كاتێ ده‌ت يان نه؟
جمهورێ زانايان و گه‌له‌ك زانايێت سه‌رده‌م دبێژن: زه‌كات ل سه‌ر مالێ ڤى ره‌نگى واجب نينه، چونكى دڤێت موسلمان خۆ ژ ڤى مالى خلاسكه‌ت ـ كه خۆ قورتالكرن، نه بده‌ت كه زه‌كات ـ، هنده زانا يێت دى يێت سه‌رده‌م دبێژن: زه‌كات واجبه و دڤێت بده‌ت، دا كه‌س ڤێ بۆ خۆ نه‌كه‌ته هه‌جه‌ت و ژ زه‌كاتێ بره‌ڤيت، و بێژيت: مالێ من يێ حه‌رامه و ئه‌ز زه‌كاتێ ناده‌م، به‌لێ هه‌كه مالێ وى يێ تێكه‌ل بيت ژێده‌ره‌كێ حه‌رامه و هنده ژێده‌رێت حه‌لالن، ل دويف بۆچۆنا دورستتر ئه‌و دێ ـ رێژه‌يا ژێده‌رێ حه‌رام بۆ دهێت ـ ڤه‌ده‌ركه‌ت و زه‌كاتا دى دێ ده‌ت، چونكى پێغه‌مبه‌رێ خۆشتڤى (سلاڤێت خودێ لێ بن) دبێژيت: ((گه‌لى خه‌لكى.. ب راستى خودێ يێ پاك و پاقژه ژ كێماسيان و يێ حه‌لال و پاك و پاقژ نه‌بيت قه‌بويل ناكه‌ت)) و خودێ چێتر دزانيت.
