ب / نه‌خێر، نه‌دورسته مالێ زه‌كاتێ شۆل پێ بێته‌كرن، و ئنيه‌تا خێرێ ڤێرێ به‌س نينه، و دڤێت زوى زه‌كات ده‌ركه‌ڤيت و بكه‌ڤيته ده‌ستێ خودان مافان، چونكى شۆل پێكرن دبيته ئه‌گه‌رێ گيرۆبوونا زه‌كاتێ ژ وه‌ختێ وێ، و ئه‌م يێت فه‌رمانكرينه ده‌ربێخن، و فه‌رمان و ئه‌مر ژى رامانا وێ ئه‌وه: له‌ز لێ بێته‌كرن و نه‌ئێته گيرۆكرن.
خودايێ مه‌زن دبێژيت: ((وَأَقِيمُوا الصَّلَاةَ وَآتُوا الزَّكَاةَ وَأَطِيعُوا الرَّسُولَ لَعَلَّكُمْ تُرْحَمُونَ)) و ديسا ژ پێغه‌مبه‌رێ خۆشتڤى (سلاڤێت خودێ لێ بن) هاتيه زانين هه‌روه‌كى عه‌قبێ كورێ حارسى (خودێ ژێ رازي بيت)ژێ ڤه‌دگوهێزيت: هند له‌ز ل دانا زه‌كاتێ كريه هه‌تا موسلمان ژ وێ له‌زاتيێ حێبه‌تى بووينه، (خودێ ژێ رازي بيت)دبێژيت: من نڤێژا ئێڤارى ل مه‌دينه‌يێ ل پشت پێغه‌مبه‌رى (سلاڤێت خودێ لێ بن) كر، سلاڤا ملان ڤه‌دا، و زوى رابوو و د سه‌ر ستۆيێ هنده مرۆڤانرا بۆرى، به‌ر ب ژۆرێت هنده‌ك ژنێت خۆڤه چۆ، زڤريڤه ده‌ف وان، ديت ئه‌و يێ ژ له‌زا وى حێبه‌تى بووين، ئينا گۆت: ((بيرا من هاته تشته‌كى ژ پارچه‌كا زێرى ده‌ف مه بوو، من نه‌ڤيا هزرا من مژويلكه‌ت، من فه‌رمان دا به‌لاڤكه‌ن))، و د ريوايه‌ته‌كا ديدا يا وى: ((من پارچه‌كا زێرى هێلابوو ل مال، من نه‌ڤيا شه‌ڤێ بمينيته ده‌ف من)). به‌لێ دويف بريارا مه‌جمه‌عا فقهي يا ئيسلامى و گه‌له‌ك زانايێت هه‌ڤچه‌رخ وه‌كى قه‌رزاوى و زوحه‌يلى و موسته‌فا زه‌رقا.. هه‌كه ده‌وله‌ت زه‌كاتێ وه‌رگريت بۆ هه‌يه بكه‌ته د كارێت به‌رهه‌مئينانێدا و شۆل پێ بكه‌ت بده‌ته كارى و خودێ چێتر دزانيت.
