ب/ ده‌سپێكێ هندى مرۆڤێت كێرهاتى و راستكار و قه‌نجيكار مفاى ژ خێر و خێراتێت مرۆڤى ببينن باشتره، و دڤێت مرۆڤ ل سه‌ر هندێ يێ رژد بيت، چونكى پێغه‌مبه‌رێ خۆشتڤى (سلاڤێت خودێ لێ بن) دبێژيت: ((هه‌ڤالينيا كه‌سێ نه‌كه موسلمان و باوه‌ردار نه‌بيت، و كه‌س زادێ ته نه‌خۆت يێ خودێ ترس و پارێزكار نه‌بيت)). ژ ڤێ حه‌ديسێ دهێته زانين فه‌ره ئه‌م ل مرۆڤێت ديندار و خودێ ترس بگه‌رين و زه‌كاتا خۆ بده‌ينه وان و مرۆڤێت موسلمان فايده‌ى ژ زه‌كاتا مرۆڤى بكه‌ن و هندى يێ موسلمانتر بيت چێتر و باشتره، به‌لێ ئه‌ڤه هندێ ناگه‌هينيت ب موسلمانێت نه‌پێگر ناچيت، پشتى ڤێ.. ئه‌رێ يێ نڤێژان نه‌كه‌ت زه‌كات لێ دچيت يان نه، جهێ ئختيلاف و جودابوونێيه ل ده‌ف وان ئه‌وێت دبێژن: نه‌نڤێژكه‌ر كافره ـ چ ژ بێ باوه‌رى بيت يان ژ خه‌مسارى ـ ده‌ف وان زه‌كات نابيت بێته دان بۆ ڤان، چونكى ئه‌ڤه ب نه‌نڤێژكرنا خۆ ژ بازنێ موسلمانه‌تيێ ده‌ردكه‌ڤيت، و ئه‌و هه‌كه يێ فه‌قير ژى بيت نه ژ فه‌قيرێت موسلمانانه.
پێغه‌مبه‌رێ خۆشتڤى (سلاڤێت خودێ لێ بن) دبێژيت: ((خودێ، زه‌كات ل سه‌ر وان يا فه‌رزكرى، ژ زه‌نگينێ وان دێ هێته وه‌رگرتن و ل سه‌ر هه‌ژارێ وان هێته زڤراندن))، و ئه‌و ب كريارێت خۆ نه ژ هه‌ژارێ وانه هه‌تا سه‌ر ويدا بێته زڤراندن، به‌لێ بۆچۆنا دورستتر هه‌كه ژ خه‌مسارى، نه ژ بێ باوه‌رى، نڤێژان نه‌كه‌ت، ئه‌و نه كافره، و دورسته زه‌كات بۆ بێته دان، به‌لێ ڤێ ژى پرسه‌كا دى يا هه‌ى يێ ب ڤي ره‌نگى يێ گونه‌هكار بيت، و نه‌نڤێژه و نه رۆژيه و خۆ ژ چو گونه‌هان ناده‌ته پاش يا باشتر ئه‌وه زه‌كات بۆ ڤى مرۆڤى نه‌هێته‌دان، نه‌خاسمه هه‌كه نه به‌رپرس بيت د خودانكرنا مالا خۆ و زاروكاندا، و ئه‌و كه‌سێ زه‌كات ببيته هاريكارى بۆ وى ل سه‌ر گونه‌هێ زانا دبێژن: نه‌دورسته زه‌كاتێ بده‌نێ، به‌لێ هه‌كه كێماسيا وى گونه‌ه بن و عه‌يال هه‌بن مرۆڤ زه‌كاتێ بده‌تێ به‌ر عه‌يالێ وى دورسته و چو نينه، به‌لێ هه‌كه تو بزانى زه‌كاتێ دێ كه‌ته د به‌رويكا خۆدا و چو ل مالا خۆ نامه‌زێحيت و دێ ل خرابيان ده‌ت.. نه‌دورسته تو زه‌كاتێ بده‌يێ، چونكى وى ده‌مى تو هاريكارێ وى ل سه‌ر گونه‌ه و خرابيێ و خودێ چێتر دزانيت.
