ب / ئه‌و پاره ئه‌مانتن ده‌ف ته، و نابيت تو ده‌ستكاريێ ب چو ره‌نگان تێدا بكه‌ي، هه‌كه خودانى ده‌ستويرى نه‌دابيته ته، و دڤێت ئه‌م ئه‌مانه‌تى ب چاڤه‌كێ مه‌زن به‌رێ خۆ بده‌ينێ؛ چونكێ خودايێ مه‌زن ئه‌مرێ مه دكه‌ت دبێژيت:((إِنَّ اللَّهَ يَأْمُرُكُمْ أَن تُؤَدُّوا الْأَمَانَاتِ إِلَىٰ أَهْلِهَا))ئانكو: ب راستى خودێ فه‌رمانا هه‌وه دكه‌ت هوين ئه‌مانه‌تى بده‌نه خودانێت وان. ديسا پێغه‌مبه‌رێ خودێ (سلاڤێت خودێ لێ بن) دبێژيت: ((نيشانا دوروى سێنه: هه‌كه ئاخفت دره‌و كر، و هه‌كه ژڤان دا ب جه نه‌ئينا، و هه‌كه باوه‌رى پێ هاته ئينان خيانه‌ت كر))، و د ريوايه‌ته‌كا ديدا: ((خۆ هه‌كه رۆژيان بگريت و نڤێژان بكه‌ت و خۆ موسلمان بدانيت)).
و ئه‌مانه‌ت ژ وان تشتانه يێت پێغه‌مبه‌رێ خودێ (سلاڤێت خودێ لێ بن) ئه‌م ژێ ترساندين، حوزه‌يفه‌يێ كورێ يه‌مانى (خودێ ژێ رازي بيت)دبێژيت: پێغه‌مبه‌رێ خودێ (سلاڤێت خودێ لێ بن) دوو ئاخفتن بۆ مه كرن، ئێك ژ وان من يا ديتى و ئه‌ز خۆ ل هيڤيا يا دووێ دگرم، گۆته مه: ((دين و فه‌رمانێت تێدا كه‌فتنه بنێ دلێت مرۆڤاندا، پاشى قورئان هاته خوارێ، ب قورئانێ (كاروبار و فه‌رمانێت دينى ژ حه‌لال و حه‌رامان و ژ واجب و سونه‌تان و... هتد ژ كاروبارێت دينى) زانين و ب حه‌ديسێ زانين))، پاشى بۆ مه به‌حسێ بلندكرنا ئه‌مانه‌تى (دينى) كر، و گۆت: ((مرۆڤ نڤستنه‌كێ دێ نڤيت، و ئه‌مانه‌ت (دينێ د دليدا) دێ د دلێ ويدا كێم بيت، جهێ وى دێ وه‌كى ده‌عكاندنێ لێ هێت، پاشى نڤستنه‌كێ دێ نڤيت، و ئه‌مانه‌ت و دينێ د دلێ ويدا دێ كێم بيت، جهێ وى دێ وه‌كى جهێ به‌رێ ده‌ستێ ژ زێده شۆلى ستوير بووى لێ هێت. وه‌كى په‌له‌كى تو د سه‌ر پێ خۆرا گرێلكه‌ى په‌قيچكه‌كێ چێكه‌ت، و تو ببينى يا پفه و تشته‌ك تێدا نينه)). پاشى به‌ره‌شيشكه‌ك هه‌لگرت و د سه‌ر پێ خۆرا گرێلكر. سپێده دێ ل خه‌لكى بيت و دێ كرين و فرۆتنێ كه‌ن، نێزيكه كه‌سێ ئه‌مانه‌ت و دين نه‌بيت، هه‌تا دێ هێته گۆتن: د بێڤان عێلێدا زه‌لامه‌كێ ب دين يێ هه‌ى، حه‌تا خه‌لك دێ بۆ وى زه‌لامى بێژن: چه‌ند يێ ب هێزه چه‌ند يێ تێگه‌هشتيه چه‌ند يێ ب ئاقله، (هۆسا د پێ موعجه‌بن)، و ئه‌و ب خۆ دندكه‌كا خه‌نده‌لكێ ژى ژ ئيمانێ د دلێ ويدا نينه، و وه‌خته‌ك ب سه‌ر مندا هاتبوو ده‌ف من هند فه‌ر نه‌بوو ئه‌ز كرين و فرۆتنێ دگه‌ل كێ بكه‌م، (مه‌خسه‌د پێ زه‌مانێ ئێكێيه يێ نێزيكى پێغه‌مبه‌رى (سلاڤێت خودێ لێ بن)، چونكى دين و ئه‌مانه‌ت د ناڤدا هه‌بوون)، هه‌كه موسلمان بيت دينێ وى دێ ل من زڤرينيت، (دينێ وى ناهێليت خيانه‌تێ ل من بكه‌ت) و هه‌كه فه‌له بيت يان جوى سه‌ركار و به‌رپرس ژ وى دێ ل من زڤرينيت (ئانكو ناهێليت غه‌درێ ل من بكه‌ت)، به‌لێ ئه‌ڤرۆ ئه‌ز كرين و فرۆتنێ دگه‌ل كه‌سێ ناكه‌م (من باوه‌رى ب كه‌سێ نينه) فلان و فلان نه‌بيت.
نه‌خێر نابيت تو بێ ده‌ستويريا وى زه‌كاتێ لێ بده‌ي، چونكى زه‌كات عيباده‌ته و عيبادت ژى ژ مرۆڤى ناهێته وه‌رگرتن هه‌كه ئنيه‌ت بۆ نه‌بيت، ڤێجا هه‌كه وى دليا زه‌كاتێ نه‌بيت ما چ فايده‌يه تو زه‌كاتێ لێ بده‌ى يان نه، به‌لێ يا باشه تو بيرا وى بينى و شيره‌تا خێرێ لێ بكه‌ى، چونكى دڤێت مه خێر بۆ ئێك و دوو بڤێت، خودايێ مه‌زن دبێژيت: ((إِنَّمَا الْمُؤْمِنُونَ إِخْوَةٌ )) ﭼ ئانكو: هندى خودان باوه‌رن برايێت ئێكن، و پێغه‌مبه‌رێ خودێ (سلاڤێت خودێ لێ بن) دبێژيت: ((كه‌س ژ هه‌وه ب دورستى باوه‌ريێ نائينيت هه‌تا وى خێر بۆ برايێ خۆ نه‌ڤێت كا چاوا بۆ خۆ دڤێت)). و بێژێ خودێ به‌ره‌كه‌تێ بۆ ته نائێخيته مالێ ته هه‌كه تو زه‌كاتێ نه‌ده‌ى، و زه‌كات ستوينه‌كا دينێ مه‌يه، و ئيسلاما ته يا كێمه و نه‌يا كامله و يا له‌نگه، هه‌كه تو زه‌كاتێ نه‌ده‌ى. هه‌كه تو كريه وه‌كيلێ خۆ هنگى دورسته تو زه‌كاتا وى بده‌ى، و هه‌كه هۆسا نه‌بيت نه‌دورسته و مانا ئه‌مانه‌تى ل ده‌ف ته و زه‌كات لێ نه‌هێته دان بۆ ته نه‌گونه‌ه ، و گونه‌ه يا ل سه‌ر وى يێ ئه‌ڤ ماله يێ وى و زه‌كاتێ لێ نه‌ده‌ت و خودێ چێتر دزانيت.
