ب / ئه‌ڤه دوو پسيارن، پسيارا ئێكێ: هه‌كه من گه‌له‌ك مێش هه‌بن ـ سه‌د، دوو سه‌د، يان پتر ـ و ئه‌ز مێشان خودان دكه‌م، كا زه‌كات ل ڤان مێشان دكه‌ڤيت يان نه؟ هه‌كه ئه‌ز بازرگانيێ ب مێشان دكه‌م ـ دكرم و دفرۆشم ـ، به‌لێ.. هنگى ته چه‌ند مێش هه‌بن زه‌كات لێ دكه‌ڤيت، وه‌كى هه‌ر كه‌ل و په‌له‌كێ بازرگانيێ، ده‌مێ زه‌كاتا خۆ دێ وان مێشان بهاكه‌ى و دگه‌ل پارێت خۆ يێت دى حسێبكه‌ى و زه‌كاتا خۆ ده‌ى، ئه‌ڤه هه‌كه تو بازرگانێ مێشان بى، به‌له هه‌كه تو مێشان خودان دكه‌ى بۆ هنگڤينى، نه بۆ تشته‌كێ دى، و تو نه بازرگانێ مێشانى، هات و چۆ هه‌كه تو هه‌وجه بووى يان ئێكى ژ ته خواست تو بفرۆشى ئه‌و چو نينه و حوكمى ناگوهرينيت.
ژ ئه‌ڤا بۆرى بۆ مه دياربوو هه‌كه تو به‌س خودانكه‌رى ـ چند مێش ته هه‌بن ـ تو زه‌كاتا وان ناده‌ى و زه‌كات ل سه‌ر ته نينه، به‌لێ هه‌كه تو بازرگان بى.. هنگى زه‌كات لێ دكه‌ڤيت، زه‌كاتا كه‌ل و په‌لێت بازرگانيێ، به‌لێ هنگڤين كا زه‌كات لێ دكه‌ڤيت يان نه، جهێ ئختيلافێيه د ناڤبه‌را زاناياندا، جمهورێ زانايان خودآ ژ وان رازى بيت، دبێژن: زه‌كات لێ ناكه‌ڤيت ـ كێم بيت يان گه‌له‌ك بيت ـ، و زانايێ ناڤدار بوخارى (خودێ ژێ رازي بيت)دبێژيت: چو تشتێ دورست ل سه‌ر زه‌كاتا هنگڤينى نه‌هاتيه، هه‌ژيه ئه‌م بزانين حه‌نه‌في و ئيمام ئه‌حمه‌د خودآ ژ هه‌ردوويان رازى بيت، دبێژن: زه‌كات ل هنگڤينى دكه‌ڤيت، پاشى د ناڤبه‌را خۆدا يێت جودابووين ل سه‌ر نيسابێ كا چه‌نده ل سه‌ر كۆمه‌كا بۆچۆنان.
و ئه‌ز بۆچۆنا جمهورى ب هێزتر ددانم، چونكى وه‌كى ئيمامێ بوخارى (خودێ ژێ رازي بيت)گۆتى: چو به‌لگه‌يێت دورست ل سه‌ر زه‌كاتا هنگڤينى نه‌هاتينه، و ديسا ئبن مونزر (خودێ ژێ رازي بيت)دبێژيت: چو به‌لگه‌يێت دورست و بنه‌جه و ئيجماع ل سه‌ر واجببوونا زه‌كاتا هنگڤينى نه‌هاتينه، به‌لێ ئه‌بى عوبه‌يد (خودێ ژێ رازي بيت)دبێژيت: ئه‌ڤه هندێ ناراگه‌هينيت خودانێ هنگڤينى چو سه‌دقه و خێران ژێ نه‌ده‌رێخيت، هه‌كه وه‌كر يێ گونه‌هكاره، رۆژا هنگڤينى ده‌ردئێخيت، فه‌ره ئه‌و پشكه‌كێ ژێ بكه‌ته خێر و خودێ چێتر دزانيت.
