ب / ده‌ف جمهورێ زانايان خودێ ژ وان رازى بيت، هه‌ر ده‌مێ دندكا ده‌رامه‌تى شديا و كێر خوارنێ هات و فێقى ره‌نگه‌كى ژ ره‌نگان، سۆر ببيت، يان شرين ببيت گه‌هشت، وى ده‌مى زه‌كات ل سه‌ر چاندن و فێقى و ده‌رامه‌تان واجب دبيت، و زه‌كات ژێ ناهێته ده‌رێخستن هه‌تا نه‌گه‌هيته چنين و دورين و پاقژكرنێ، هه‌رچه‌نده ئه‌بى حه‌نيفه (خودێ ژێ رازي بيت)دبينيت: هه‌رگاڤا ده‌رامه‌ت شين بوو، و فێقى ئاشكرا بوو، زه‌كات واجب دبيت، و بۆچۆنا جمهورى دورستتره؛ چونكى به‌س شين بوون و ئاشكرابوونا فێقى رامانا وێ ئه‌و نينه دێ گه‌هنه به‌رى، و ئه‌و فێقي و ده‌رامه‌تێ دهێته خوارن و دياريكرن به‌رى چنين و دورينێ ده‌ف جمهورێ زانايان دگه‌ل زه‌كاتێ ناهێته حسێبكرن، چونكى عاده‌ت هۆسايه: هه‌ر ده‌مێ فێقى ده‌ركه‌فت مال و كه‌س و كار ژێ دخۆن و ژێ دكه‌نه ديارى، و د حه‌ديسا دورستدا هاتيه: پێغه‌مبه‌رێ خودێ (سلاڤێت خودێ لێ بن) سه‌هلێ كورێ ئه‌بى حه‌سه‌نى هنارت بۆ حسێبكرنا زه‌كاتێ و دگۆتێ: ((پشكه‌كێ بۆ خوارنا وان بهێله))، هه‌رچه‌نده ئيمام مالك و ئه‌بو حه‌نيفه دبێژن: ئه‌ڤا دهێته خوارن و دياريكرن هه‌مى دڤێت دويماهيێ بێته حسێبكرن و دگه‌ل كۆمێ بێته هه‌ژمارتن و پاشى زه‌كات بێته حسێبكرن، به‌لێ حه‌ديس و به‌لگه‌يێت دورست پشتگريا بۆچۆنا جمهورى دكه‌ن نه يا وان و خودێ چێتر دزانيت.
